ރައީސްގެ ވަޢުދާއި އެއްގޮތަށް ޒަމާނީ ޚިދުމަތްތައް ލިބޭ ކެންސަރު ހޮސްޕިޓަލެއް ރާއްޖޭގައި ތަރައްޤީ ކުރަން ނިންމައިފި
ރައީސުލް ޖުމްހޫރިއްޔާގެ ވަޢުދުފުޅާއި އެއްގޮތަށް ޒަމާނީ ޚިދުމަތްތަކާއިއެކު ކެންސަރު ބައްޔަށް ފަރުވާދޭ ޒަމާނީ ހޮސްޕިޓަލެއް ރާއްޖޭގައި ތަރައްޤީކުރުމުގެ މަސައްކަތް ސަރުކާރުން ފަށައިފިއެވެ.
ރާއްޖޭގައި ކެންސަރު ބައްޔަށް ފަރުވާދޭ ޒަމާނީ ހޮސްޕިޓަލެއް ތަރައްޤީ ކުރުމަށް މާލެ ސަރަޙައްދުން ބިމެއް ހަމަޖެއްސުމުގެ މަސައްކަތް މިހާރު ކުރިއަށްދާކަމަށް ސަރުކާރުން ވަނީ ހާމަކޮށްފައެވެ.
މިކަން ހާމަކުރައްވާފައިވަނީ ސިއްޚީ ވުޒާރާގެ ޑިރެކްޓަރ ޖެނެރަލް ހެލްތު ސަރވިސް ޑރ.އަޙުމަދު އަޝްރަފްއެވެ.
ރާއްޖޭގައި ޒަމާނީ ޚިދުމަތްތައް ލިބޭނެ ކެންސަރު ހޮސްޕިޓަލެއް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ދިވެހި ރައްޔިތުންނަށް ވެފައިވާ ވަޢުދެކެވެ.
ދައުލަތުގެ މީޑިއާއަށް މަޢުލޫމާތު ހިއްސާކުރައްވަމުން އަޝްރަފް ވިދާޅުވީ، ކެންސަރަށް ފަރުވާ ދިނުމަށް މާލެ ސަރަޙައްދުގައި ތަރައްޤީކުރަން ނިންމާފައިވާ ހޮސްޕިޓަލުން އެ ބަލީގެ ފަރުވާއާއި ގުޅުންހުރި ހުރިހާ ޚިދުމަތެއް ލިބޭނެކަމަށެވެ. އަދި މީގެ އިތުރުން، ދުރު ރަށްތަކުން ހޮސްޕިޓަލުގެ ޚިދުމަތް ހޯދަން އަންނަ މީހުންނަށް ފަރުވާއަށް މަޑުކޮށްގެން ތިބެވޭނެ އެކޮމޮޑޭޝަން ބްލޮކެއް ޤާއިމްކުރައްވާނެ ކަމަށްވެސް އަޝްރަފް މައުލޫމާތުދެއްވިއެވެ.
މި ހޮސްޕިޓަލަކީ ރާއްޖޭގައި ކެންސަރު ބަލި ފެންނަ މިންވަރު މަދުކޮށް ރައްޔިތުންނަށް ލުއިފަސޭހަ ޚިދުމަތްތައް ދިނުމުގެ ގޮތުން ޤާއިމްކުރާ ހޮސްޕިޓަލެއްކަމަށް އަޝްރަފް ވަނީ ވިދާޅުވެފައެވެ.