ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ މުނާސަބަތުގައި، ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު މިއަދު މެސެޖެއް ފޮނުއްވައިފިއެވެ. ސޯޝަލް މީޑިއާ މެދުވެރިކުރައްވައި އެކަމަނާ ދެއްވި މި މެސެޖުގައި، ކާބޯތަކެތީގެ ރައްކާތެރިކަން ކަށަވަރުކުރުމުގެ މުހިންމުކަމުގެ މައްޗަށް ވަނީ އަލިއަޅުއްވާލައްވާފައެވެ.

މެޑަމް ސާޖިދާގެ ޕޯސްޓުގައި ވިދާޅުވެފައިވަނީ، ކާބޯތަކެތީގެ ޒަރީއާއިން ފެތުރޭ ބަލިތައް ނައްތާލުމަށާއި، އެފަދަ ބަލިތަކުގެ ސަބަބުން ސިއްހީ ނިޒާމަށާއި އާންމު ދިރިއުޅުމަށް ކުރިމަތިވާ ބުރަ ކުޑަކުރުމުގައި ރައްކާތެރި ކާބޯތަކެތި މުހިންމު ދައުރެއް އަދާކުރާ ކަމަށެވެ.

ކާބޯތަކެތީގެ ރައްކާތެރިކަމަކީ އެންމެންގެ ހިއްސާ އޮތް ޒިންމާއެއްކަން ފާހަގަކުރައްވަމުން އެކަމަނާ ވިދާޅުވީ، ކާބޯތަކެތީގެ ވިޔަފާރިކުރާ ފަރާތްތަކާއި، ސިއްހީ ދާއިރާގެ މާހިރުންގެ އިތުރުން ކޮންމެ ކަނބަލަކީވެސް މިކަމުގައި މުހިންމު ދައުރެއް އޮތް ބައެއް ކަމަށެވެ. އަދި އުފައްދާ، ތައްޔާރުކުރާ، ވިއްކާ އަދި ބޭނުންކުރާ ކާބޯތަކެއްޗަކީ ތަޣައްޔަރުވުމުންނާއި ގެއްލުންހުރި މާއްދާތަކުން ސަލާމަތްވެފައިވާ ތަކެތިކަން ކަށަވަރުކުރުމަށް އެންމެން ގުޅިގެން މަސައްކަތްކުރުމަށް އެކަމަނާ ގޮވާލެއްވިއެވެ.

މީގެއިތުރުން، އެންމެން ގުޅިގެން ކާބޯތަކެތީގެ ރައްކާތެރިކަމުގެ އާދަތައް ކުރިއެރުވުމުން، އާންމު ސިއްހަތު ރައްކާތެރިކުރެވި، މުޖުތަމައަށް ކުރިމަތިވެދާނެ ނޭދެވޭ އަސަރުތަކުން ސަލާމަތްވެވޭނެ ކަމަށް މެޑަމް ސާޖިދާ ވިދާޅުވިއެވެ. އަދި މިއީ އެންމެހައި ރައްޔިތުންނަށް ސިއްހަތު ރަނގަޅު މުސްތަގުބަލެއް ބިނާކުރުމަށް އެޅޭ މުހިންމު ފިޔަވަޅެއްކަންވެސް އެކަމަނާ ފާހަގަކުރެއްވިއެވެ.

ދުނިޔޭގެ ކާބޯތަކެތީގެ ރައްކާތެރިކަމުގެ ދުވަސް ފާހަގަކުރަނީ ކާބޯތަކެތީގެ ސަބަބުން ކުރިމަތިވާ ސިއްހީ ނުރައްކާތައް ދެނެގަނެ، އެކަންކަމުން ސަލާމަތްވުމަށް އާންމުން ހޭލުންތެރިކުރުވުމުގެ މަގުސަދުގައެވެ.

ކާބޯތަކެތީގެ ރައްކާތެރިކަން ކަށަވަރުކުރުމަކީ އެންމެންގެ ޒިންމާއެއް ކަމަށް މެޑަމް ސާޖިދާ ވިދާޅުވެއްޖެ

ދުނިޔޭގެ ކާބޯތަކެތީގެ ރައްކާތެރިކަމުގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ކުރެއްވި ޕޯސްޓެއްގައި، ރާއްޖޭގައި ބޭނުންކުރާ ކާބޯތަކެތީގެ ރައްކާތެރިކަން ކަށަވަރުކުރުމަށް ސަރުކާރުން ދެއްވާ އިސްކަން ހާމަކުރައްވައިފިއެވެ.

ރައީސުލްޖުމްހޫރިއްޔާ މިއަދު ކުރެއްވި ޕޯސްޓުގައި ވިދާޅުވީ، ކާބޯތަކެތީގެ ޒަރީއާއިން ފެތުރޭ ބަލިތައް ނައްތާލުމަށާއި، އާންމު ސިއްހަތު ރައްކާތެރިކުރުމަށާއި، ދެމެހެއްޓެނިވި ތަރައްގީއަށްޓަކައި ރައްކާތެރި ކާބޯތަކެތި ލިބުމަކީ ކޮންމެހެން މުހިންމު ކަމެއް ކަމަށެވެ. އަދި ކާބޯތަކެތިން ޖެހޭ ގިނަ ބަލިތަކަކީ، މައުލޫމާތާއި ހެކީގެ މައްޗަށް ބިނާވެފައިވާ ވަރުގަދަ ނިޒާމުތަކެއްގެ ތެރެއިންނާއި، މުޅި މުޖުތަމައުގެ އެއްބާރުލުމާއެކު ހުއްޓުވިދާނެ ބަލިތަކެއްކަން އެމަނިކުފާނު ފާހަގަކުރެއްވިއެވެ.

ރާއްޖޭގައި ބޭނުންކުރާ ހުރިހާ ކާބޯތަކެއްޗަކީ ރައްކާތެރި، ސިއްހަތަށް ފައިދާހުރި، އަދި އިތުބާރު ހިފޭ ތަކެތިކަން ކަށަވަރުކުރުމަށް ސަރުކާރުން ސާބިތުކަމާއެކު މަސައްކަތް ކުރައްވާނެ ކަމަށް ރައީސް ވިދާޅުވިއެވެ. މިގޮތުން ސަރުކާރުން ކުރިއަށްގެންދަވާ މުހިންމު މަސައްކަތްތަކުގެ ތެރޭގައި:

މީގެ އިތުރުން، ރައީސުލްޖުމްހޫރިއްޔާގެ މެސެޖުގައި ވަނީ މިވަގުތު ދުނިޔޭގެ އެކި ކަންކޮޅުތަކުގައި ހާލުގައި ޖެހިފައިވާ ފަރާތްތަކުގެ ހަނދާން އާކުރައްވާފައެވެ. ވަކިން ހާއްސަކޮށް ފަލަސްތީނުގެ ގައްޒާގެ ރައްޔިތުން ތަހައްމަލު ކުރަމުންދާ އިންސާނީ ކުއްލި ނުރައްކަލުގެ ހާލަތަށް އިޝާރާތް ކުރައްވައި، އެ ތަނުގައި ރައްކާތެރި ނޫން ކާބޯތަކެއްޗާއި ތަޣައްޔަރުވެފައިވާ ފެން ބޭނުންކުރަން ޖެހުމުގެ ސަބަބުން ރައްޔިތުން އުފުލަމުންދާ ތަކުލީފުތަކާ މެދު ކަންބޮޑުވުން ފާޅުކުރެއްވިއެވެ.

ބައިނަލްއަގުވާމީ މުޖުތަމައަށް ގޮވާލައްވަމުން ރައީސް މުޢިއްޒު ވިދާޅުވީ، މިފަދަ ގޮންޖެހުންތަކުން އަރައިގަތުމަށް ހުރިހާ ގައުމުތަކުން ގުޅިގެން މަސައްކަތް ކުރަންޖެހޭ ކަމަށެވެ. އަދި ބައިނަލްއަގުވާމީ މިންގަނޑުތަކަށް ތަބާވެ، އެއްބާރުލުން އިތުރުކޮށްގެން އެންމެނަށް ރައްކާތެރި މުސްތަގުބަލެއް ބިނާކުރެވޭނެ ކަމަށް އެމަނިކުފާނު ވިދާޅުވިއެވެ.

ކާބޯތަކެތީގެ ރައްކާތެރިކަން ކަށަވަރުކުރުމަކީ ސަރުކާރުގެ މުހިންމު އަމާޒެއް: ރައީސުލްޖުމްހޫރިއްޔާ

ދިވެހި ދައުލަތުގެ މަތީ މަގާމުތަކެއް ފުރުއްވި ބޭފުޅެއް ކަމަށްވާ މއ. އަލިތަރި، އިބްރާހިމް ރަޝާދު ނިޔާމުވާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އޭނާގެ އާއިލާއަށް ތައުޒިޔާ ފޮނުއްވައިފިއެވެ.

އިބްރާހީމް ރަޝާދު ނިޔާވުމާ ގުޅިގެން މީސް މީޑިއާގައި ހިއްސާކުރެއްވި ޕޯސްޓެއްގައި ރައީސް މުޢިއްޒު ވިދާޅުވީ، ދިވެހި ދައުލަތަށް ދިގު މުއްދަތަކަށް ހިދުމަތްކުރެއްވި އިއްޒަތްތެރިއެއްގެ ލަގަބު އަރުވައިފައިވާ، އަދި ދިވެހި ދައުލަތުގެ މަތީ މަގާމުތަކެއްގައި އިހުލާސްތެރި ހިދުމަތްތަކެއް ކުރެއްވި، އިބްރާހީމް ރަޝާދު އަވަހާރަވި ހަބަރު އަޅުގަނޑު އަޑުއެއްސެވީ ފުން ހިތާމައާއެކުގައި ކަމަށެވެ.

އިބްރާހީމް ރަޝާދަކީ އިލެކްޝަންސް ކޮމިޝަންގެ ރައީސްކަމާއި، ޕްރިންސިޕަލް ކަލެކްޓަރ އޮފް ކަސްޓަމްސްގެ މަގާމާއި، އަތޮޅުވެރިކަމުގެ އިތުރުން ވެސް އެ ވަގުތަކު ދައުލަތުން ހަވާލުކުރެއްވި ކޮންމެ މަސްއޫލިއްޔަތެއް މުރާލިކަމާއި ތެދުވެރިކަމާއި ރޭވުންތެރިކަމާއެކު އަދާކުރެއްވުމުގައި ލާމަސީލު ނަމޫނާއެއްކަން ފާހަގަކުރައްވަމުން ރައީސް ވިދާޅުވީ، އޭނާއަކީ ހިކްމަތްތެރި ހިންގުންތެރި ޝަހްސިއްޔަތެއް ކަމަށެވެ. އަދި ގައުމަށް ގެއްލިގެން އެ ދިޔައީ ބޭނުންތެރި އަގުހުރި ތަޖުރިބާކާރެއް ކަމަށް ވެސް އެމަނިކުފާނު ވަނީ ވިދާޅުވެފައެވެ.

ރައީސް މުޢިއްޒު ވަނީ މާތްﷲ ގެ ރުއްސެވުމާއި ފުއްސެވުމުގައި އަދި ސުވަރުގޭގެ ދާއިމީ ނިއުމަތާއި ރަހްމަތުގައި މަރްޙޫމް އިބްރާހީމް ރަޝާދު ލެހެއްޓެވުން އެދި ދުއާކުރައްވައިފައެވެ.

ދައުލަތުގެ މަތީ މަގާމުތަކެއް ފުރުއްވި އިބްރާހީމް ރަޝާދު ނިޔާވުމާ ގުޅިގެން ރައީސްގެ ތައުޒިޔާ

ސަރުކާރުން އިސްނަގައިގެން ކުރިއަށްގެންދާ ފަސް މިލިއަން ގަސް އިންދުމުގެ ހަރަކާތުގައި ދިވެހި ކޮންމެ ރައްޔިތަކު ވެސް ބައިވެރިވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.

ދުނިޔޭގެ ތިމާވެށީގެ ދުވަހާ ގުޅިގެން މުލިއާގޭގައި ގަހެއް އިންދަވައި، އާންމުކުރެއްވި ވީޑިއޯ މެސެޖެއްގައި ރައީސް މުޢިއްޒު ވިދާޅުވީ، ރާއްޖެ ފެހިކުރުމުގެ މަސައްކަތަކީ ދިވެހި ކޮންމެ ރައްޔިތެއްގެ ބޮލުގައި އެޅިފައިވާ ޒިންމާއެއްގެ ގޮތުގައި ދެކެންޖެހޭ ކަމަށެވެ. އެގޮތުން މި އަހަރުގެ ތެރޭގައި ރާއްޖޭގެ އެކި ކަންކޮޅުތަކުގައި ގަސް އިންދުމާ ގުޅޭ މަސައްކަތްތައް ކޮށްދެއްވުމަށް ހުރިހާ ރައްޔިތުންގެ ކިބައިން ވަކިން ހާއްސަކޮށް ޒުވާނުންގެ ކިބައިން އެދިވަޑައިގަންނަވާ ކަމަށް އެމަނިކުފާނު ވިދާޅުވިއެވެ.

މި ހަރަކާތް ކުރިއަށް ގެންދިއުމަށް ނިންމާފައިވާކަން ރައީސް މުޢިއްޒު ހާމަކުރެއްވީ ކޮޕް 28 ސަމިޓުގައި ވާހަކަދައްކަވަމުންނެވެ. އެމަނިކުފާނު ވިދާޅުވީ، މި ހަރަކާތަކީ މޫސުމީ ބަދަލުތަކުން ރާއްޖެ ސަލާމަތްކުރުމަށާއި، ރަށްގިރުމުގެ މައްސަލައަށް ހައްލެއް ހޯދުމަށް ފެށި ހަރަކާތެއް ކަމަށެވެ.

މި ހަރަކާތް ކުރިއަށް ގެންދިއުމުގައި ސަރުކާރު ހިއްސާވާ ކުންފުނިތަކުން ވަނީ ބޮޑެތި ލަނޑުދަނޑިތަކެއް ކަނޑައަޅައިފައެވެ. އެގޮތުން ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކޮންމެ ކުންފުންޏަކުން އެއް މިލިއަން ގަސް އިންދުމަށް ވަނީ ނިންމައިފައެވެ. އަދި ސްޓެލްކޯއިން 500,000 ގަސް އިންދާނެ ކަމަށް މީގެ ކުރިން ވަނީ ހާމަކޮށްފައެވެ.

މި ހަރަކާތުގެ ދަށުން ޖުމުލަ 90 ބާވަތެއްގެ ގަސް އިންދުމަށް ވަނީ ނިންމައިފައެވެ. އޭގެ ތެރޭގައި ރާއްޖެއިން މަދުވަމުންދާ ކަޅުވަކަރު ފަދަ ގަސް ވެސް ހިމެނެއެވެ. މިފަދަ ގަސްތައް އިންދުމުގެ އެންމެ ބޮޑު އެއް މަގުސަދަކީ ރާއްޖޭގެ ތިމާވެށީގެ މުއްސަނދިކަން ދެމެހެއްޓުން ކަމަށް ސަރުކާރުން ވަނީ ބުނެފައެވެ.

ދުނިޔޭގެ ތިމާވެށީގެ ދުވަސް: ރައީސް އެދިވަޑައިގަތީ ގަސް އިންދުމުގެ ހަރަކާތުގައި އެންމެން ވެސް ބައިވެރިވުމަށް

ރާއްޖޭގެ ރަށްރަށަށް ދިމާވެފައިވާ ރަށްގިރުމުގެ މައްސަލަ ހައްލުކުރުމަށް ސަރުކާރުން ފަށާފައިވާ ގޮނޑުދޮށް ހިމާޔަތްކުރުމުގެ މަޝްރޫއުތައް ލަސްވަނީ، މެދުއިރުމަތީގައި ހިނގަމުންދާ ހަމަނުޖެހުންތަކާ ގުޅިގެން މަސައްކަތަށް ބޭނުންވާ ބޮޑު ހިލަ ލިބުމުގައި ހުރި ދަތިތަކުގެ ސަބަބުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ފެއްޓެވި "ދަ ޕަލްސް" ޕޮޑްކާސްޓުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ރަށްގިރުމުގެ ސަބަބުން ބައެއް ރައްޔިތުންގެ ގެދޮރާއި، އޮޑިދޯނިފަހަރު ބަންނަ ސަރަހައްދުތަކަށް ބޮޑެތި ގެއްލުންތަކެއް ލިބެމުންދާ މައްސަލައާ ގުޅިގެން ވަރަށް ގިނަ ރަށްރަށުގެ މަޝްރޫއުތައް ކުންފުނިތަކާ ހަވާލުކޮށްފައިވާ ކަމަށެވެ. ނަމަވެސް، މި މަސައްކަތްތަކަށް ބޭނުންވާ ބޮޑުހިލައާއި އެހެނިހެން ބައެއް ސާމާނު ގެނައުމުގައި ބޮޑެތި ދަތިތަކެއް ކުރިމަތިވެ، މަޝްރޫއުތައް މަޑުޖެހިފައިވާކަން އެމަނިކުފާނު ފާހަގަކުރެއްވިއެވެ.

މިފަދަ ދަތިތައް ދިމާވަނީ މެދުއިރުމަތީގައި ހިނގަމުން އަންނަ ހަމަނުޖެހުންތަކާ ގުޅިގެން ކަމަށް ރައީސް ވަނީ ވިދާޅުވެފައެވެ.

ރައީސް ވިދާޅުވި ގޮތުގައި، މި އަހަރުގެ ރިޔާސީ ބަޔާނުގައި މިފަދަ މަޝްރޫއުތައް ކުރިއަށް ގެންދާނެ ތާރީހުތައް އިއުލާން ކުރެއްވިއިރު، ދުނިޔޭގެ ބާޒާރުން މިފަދަ ތަކެތި ލިބުމުގައި އެއްވެސް ހުރަހެއް ނެތެވެ. ނަމަވެސް ރިޔާސީ ބަޔާން އިއްވެވިތާ 25 ދުވަސް ފަހުން މެދުއިރުމަތީގެ ހަމަނުޖެހުންތައް ފެށި، އެކަމުގެ ސަބަބުން ސަޕްލައި ޗެއިނަށް ނޭދެވޭ އަސަރުކޮށްފައިވާ ކަމަށް އެމަނިކުފާނު ވިދާލުވިއެވެ.

ރައީސް މުޢިއްޒު އިތުރަށް ވިދާޅުވީ، މެދުއިރުމަތީގެ ގައުމުތަކުން ބޮޑު ހިލަ ހޯދުމުގެ ބަދަލުގައި އިތުރު އެހެން ގޮތްތަކެއް ހޯދުމުގެ މަސައްކަތް ކުރަމުންދާ ކަމަށެވެ. އަދި ހާލަތަށް ބަލައި ސަރުކާރުގެ ޕްލޭންތައް މަޑުމަޑުން ބަދަލުކޮށްގެން ނަމަވެސް، ގޮނޑުދޮށްތައް ހިމާޔަތްކުރުމުގެ މަޝްރޫއުތައް އެއްކޮށް ނިންމަވާލައްވާނެކަމުގެ ޔަގީންކަން އެމަނިކުފާނު ވަނީ ދެއްވައިފައެވެ.

ގޮނޑުދޮށް ހިމާޔަތްކުރުމުގެ މަޝްރޫއުތައް ލަސްވަނީ ބޮޑުހިލަ ލިބުމުގައި ދިމާވާ ދަތިތަކުގެ ސަބަބުން: ރައީސް

އދގެ މެންބަރު ގައުމެއްގެ ގޮތުގައި ދިވެހިރާއްޖެ މި ވޭތުކުރި 60 އަހަރު ދުވަހުގެ ތެރޭގައި ފުރަތަމަ ފަހަރަށް، އދގެ އިކޮނޮމިކް އެންޑް ސޯޝަލް ކައުންސިލް (އިކޯސޮކް)ގެ ގޮނޑިއަކަށް ދިވެހިރާއްޖެ އިންތިހާބުވުމަކީ، ތާރީހީ ކާމިޔާބީއެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު މި މޭރުމުން ވިދާޅުވީ، އިކޯސޮކްގެ 2027 - 2029 ދައުރުގެ ގޮނޑިއަކަށް ދިވެހިރާއްޖެ އިންތިހާބުވުމުގެ ފަހުރުގައި މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެމަނިކުފާނު ވިދާޅުވީ، މި ތާރީހީ ކާމިޔާބީން ރަމްޒުކޮށްދެނީ، ބައިނަލްއަގުވާމީ މަސައްކަތްތައް ކުރުމަށް، ބައިނަލްއަގުވާމީ މުޖުތަމައުގައި ދިވެހިރާއްޖެއާ މެދު އޮންނަ ޔަގީންކަމާއި، އެ މުޖުތަމައު ދިވެހިރާއްޖެއަށް ކުރާ އިތުބާރު ކަމަށެވެ.

ތަރައްގީވަމުން އަންނަ ކުޑަ ޖަޒީރާ ގައުމެއްގެ ހައިސިއްޔަތުން، މޫސުމީ ބަދަލުތަކާއި، އިގްތިސާދީ ވިލުންތެރިކަމާއި، ދެމެހެއްޓެވި ތަރައްގީ ގާއިމުކުރުން ފަދަ، ނާޒުކު ހާލަތްތަކަށް ހުށަހެޅިފައިވާ ގައުމުތަކަށް ކުރިމަތިވާ ގޮންޖެހުންތަކާއި، އެ ގޮންޖެހުންތަކުގެ ހައްސާސްކަން، ދިވެހިރާއްޖެއަށް ސީދާގޮތެއްގައި ފަހުމުވާކަން ރައީސް ފާހަގަކުރެއްވިއެވެ.

އިކޯސޮކް ވެގެންދާނީ، ތަރައްގީވަމުން އަންނަ ކުދި ޖަޒީރާ ގައުމުތަކާއި، ތަރައްގީވަމުން އަންނަ އެހެނިހެން ގައުމުތަކުގެ މަސްލަހަތުތައް އިސްކޮށް، އެ ގައުމުތަކުގެ އުންމީދުތަކުގެ އަޑުއުފުލަން ލިބޭ މަންސައަކަށް ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ބައިނަލްއަގުވާމީ ފެންވަރުގައި އެއްބާރުލުންދިނުން އިތުރުކޮށް، ދެމެހެއްޓެނިވި ތަރައްގީއަށް ވާސިލުވާން ކުރާ މަސައްކަތްތަކުގެ ދުވެލި އަވަސްކޮށް، މިހާރަށްވުރެ އިންސާފުވެރި އަދި ވިލުންތެރި ބައިނަލްއަގުވާމީ ނިޒާމެއް ގާއިމުކުރުމަށް އެހީތެރިކަން ފޯރުކޮށްދިނުމުގައި، ރާއްޖެއިން، ބައިނަލްއަގުވާމީ ބައިވެރިންނާއެކު ގާތުން މަސައްކަތްކުރާނެކަމުގެ ޔަގީންކަން ވެސް ރައީސް މުޢިއްޒު ވަނީ ދެއްވައިފައެވެ.

ތާރީހީ ކާމިޔާބީއެއް: 60 އަހަރުގެ ދިގު މުއްދަތަކަށްފަހު އިކޯސޮކްގެ ގޮނޑިއެއް ރާއްޖެއަށް

މޫސުމީ ބަދަލުތަކާ ދެކޮޅަށް، އަދި ތިމާވެށި ރައްކާތެރިކުރުމަށް މަސައްކަތްކުރެއްވުން މަތީ ދެމިހުންނަވާނޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މި މޭރުމުން ވިދާޅުވީ، ދުނިޔޭގެ ތިމާވެށީގެ ދުވަހުގެ މުނާސަބަތުގައި މީސް މީޑިއާގައި ހިއްސާކުރެއްވި ޕޯސްޓެއްގައެވެ. އެމަނިކުފާނުގެ ޕޯސްޓުގައި އިންސާނިއްޔަތުގެ މުސްތަގުބަލާއި ތިމާވެށީގެ ދުޅަހެޔޮކަމާ އޮންނަ ގުޅުމުގެ މައްޗަށް ވަނީ އަލިއަޅުއްވާލައްވައިފައެވެ. އަދި، މޫސުމަށް އަންނަ ބަދަލުތަކުގެ ސަބަބުން ދިމާވާ ގޮންޖެހުންތަކާ ކުރިމަތިލާންޖެހޭ ކުޑަ ޖަޒީރާ ގައުމެއްގެ ހައިސިއްޔަތުން، ތިމާވެށި ރައްކާތެރިކޮށް ދެމެހެއްޓުމުގެ މުހިންމުކަން، ދިވެހިން ރަނގަޅަށް ދަންނަކަމަށް އެމަނިކުފާނު ވިދާޅުވިއެވެ.

އެގޮތުން، ސޯލާ ސިޓީ މަޝްރޫއާއި، ކާރިސާތަކަށް ތައްޔާރުވުމާއި، ދުރާލާ އިންޒާރުދޭ ނިޒާމުތަކާއި، މޫސުމަށް އަންނަ ބަދަލުތަކުން ކުރާ އަސަރުތަކަށް ހޭނުމަށާއި މާހައުލީ ނިޒާމު ރައްކާތެރިކުރުމަށް ޖަމައީ ފެންވަރުގައި މަސައްކަތްކުރުން ފަދަ، އުންމީދީ، މޫސުމީ ފިޔަވަޅުތައް ރާއްޖެއިން އަޅަމުންގެންދާނޭ ކަމަށް ރައީސް ވިދާޅުވިއެވެ.

މޫސުމީ ބަދަލުތަކުގެ ސަބަބުން ބައިނަލްއަގުވާމީ ފެންވަރުގައި، ވަކި ވަކި ފަރުދުންނަށާއި، މާހައުލީ ނިޒާމުތަކަށާއި، ގުދުރަތީ ވަސީލަތްތަކަށް، އަސަރުކުރަމުންދާކަން ފާހަގަކުރައްވަމުން ރައީސް ވިދާޅުވީ، މި ގޮންޖެހުންތަކުން އަރައިގަތުމަށް ބޭނުންވަނީ، މި ބަދަލުތަކަށް ހޭނުމަށާއި، ބަދަލުތަކުން ކުރާ ނޭދެވޭ އަސަރު ކުޑަކުރުމަށާއި، ދެމެހެއްޓެނިވިކަން އިސްކުރުމަށް، ބައިނަލްއަގުވާމީ މުޖުތަމައުން އެކުގައި ކުރާ މަސައްކަތްތަކެއް ކަމަށެވެ.

އެމަނިކުފާނުގެ މެސެޖު ނިންމަވާލައްވާފައިވަނީ، ތިމާވެށި ހިމާޔަތްކޮށް، އަންނާން އޮތް ޖީލުތަކަށް މިހާރަށްވުރެ ރައްކާތެރި އަދި ފުދުންތެރި މުސްތަގުބަލެއް ބިނާކުރުމަށްޓަކައި، ހޭލުންތެރިކަން އިތުރުކުރުމަށާއި، މަސްއޫލިއްޔަތުތައް ހިއްސާކުރުމަށާއި، އެކުގައި މަސައްކަތްކުރުމަށް ހުރިހާ މަސްލަހަތުވެރިންނަށް އިލްތިމާސްކުރައްވަމުންނެވެ.

މޫސުމީ ބަދަލުތަކާ ދެކޮޅަށް މަސައްކަތްކުރެއްވުން މަތީ ދެމިހުންނަވާނޭކަމުގެ ޔަގީންކަން ރައީސް ދެއްވައިފި

ރައްޔިތުންގެ ލާބައާ ގުޅިފައިވާ މުހިންމު ކަންކަމަށް އަމާޒުކޮށްގެން ރައީސުލްޖުމްހޫރިއްޔާގެ އޮފީހުން 'ދަ ޕަލްސް' ގެ ނަމުގައި ޕޮޑްކާސްޓް ސިލްސިލާއެއް ފަށައިފިއެވެ.

ރައްޔިތުންގެ ވިންދާ ގުޅޭ މުހިންމު ދާއިރާތަކާމެދު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވިސްނުންފުޅު، ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފާ ހިއްސާކުރެއްވުމާއި، ޒިންމާދާރު ނޫސްވެރިއެއްގެ ސުވާލުތަކަށް އެމަނިކުފާނު ޖަވާބުދާރީވެވަޑައިގަންނަވާ އުސޫލުން ފަރުމާކުރެވިފައިވާ މި ޕޮޑްކާސްޓުގެ ފުރަތަމަ އެޕިސޯޑް، ރައީސުލްޖުމްހޫރިއްޔާގެ އޮފީހުގެ މީސްމީޑިއާ މަންސަތަކުގައި މިއަދު މެންދުރުފަހު ވަނީ ހިއްސާކޮށްފަވެ.

"ދަ ޕަލްސް" ގެ ފުރަތަމަ އެޕިސޯޑް އިފްތިތާހުކުރެވުނު ދުވަހަކީ ދުނިޔޭގެ ތިމާވެށީގެ ދުވަސްކަމަށް ވުމާއެކު، މި އެޕިސޯޑް ހާއްސަކޮށްފައިވަނީ ތިމާވެށީގެ މައުޟޫއަށެވެ. ޕޮޑްކާސްޓް ފަރުމާކޮށްފައިވަނީ، ކޮންމެ އެޕިސޯޑެއް ވެސް އެއް މައުޟޫއަކަށް ހާއްސަވާ ގޮތަށެވެ. މި މޭރުމުން، ތިމާވެއްޓާ ގުޅިގެން އާންމު ރައްޔިތުން ފާޅުކޮށްފައިވާ ބައެއް ހިޔާލާއި ޝުއޫރު، އަދި ކަންބޮޑުވުންތައް، ރައީސް މުޢިއްޒު ވަނީ ބައްލަވާލައްވައިފައެވެ.

ދިވެހިރާއްޖޭގެ ތިމާވެށީގެ ހާލަތާ ގުޅިގެން ރައްޔިތުން ހިއްސާކުރި ބައެއް ކަންބޮޑުވުންތަކުގެ ތެރޭގައި މޫސުމީ ނޭދެވޭ ބަދަލުތަކުގެ ސަބަބުން ރަށްރަށަށް އުދައެރުމާއި، ކުނި ނައްތާލުމުގައި އަދިވެސް ދަތިތައް ކުރިމަތިވުމާއި، ބިން ހިއްކުން ފަދަ މަޝްރޫއުތަކުގެ ސަބަބުން ސިނާއީ ގޮތުން އުނދަގޫތަކާ ކުރިމަތިލާންޖެހުން ފަދަކަންކަން ހިމެނެއެވެ.

މިކަންކަމަށް ރިއާޔަތްކުރައްވާ، ރައީސް ދެއްކެވި ވާހަކަފުޅުގައި، ދިވެހިރާއްޖެއަކީ ދުނިޔޭގެ ނިސްބަތުން ވެސް ނާޒުކު ފައްތަރެއްގައި އޮތް ގައުމެއް ކަމަށާ، ނަމަވެސް ދިވެހިރާއްޖެއަކީ ގޮތް ހުސްވެފައި އޮތުމުގެ ބަދަލުގައި، ތިމާވެށީގެ ކަންކަމުގައި ލީޑަރޝިޕް ނަގާ ގައުމެއްކަން ވަނީ ފާހަގަކުރައްވައިފައެވެ. ސަރުކާރުގެ ސިޔާސަތުތައް ބައްޓަންކުރައްވާފައިވަނީ، ތިމާވެށި ހިމާޔަތްކުރުމަކީ އަސާސީ ކަމެއްގެ ގޮތުގައި ދެކެވަޑައިގެން ކަމަށާއި ތަރައްގީއާއި ތިމާވެއްޓަކީ އެކުއެކުގައި ގުޅިލާމެހިގެން، އެއްކަމަކުން އަނެއްކަމަކަށް ފައިދާކުރާ، ވަށާޖެހޭ ގޮތަށް އޮންނަ ދެ ކަންތައް ކަމަށް އެމަނިކުފާނު ވަނީ ވިދާޅުވެފައެވެ.

ރައީސް ވަނީ ސަރުކާރުން ކުރިއަށްގެންދާ ތަރައްގީގެ މަޝްރޫއުތަކުގައި، ތިމާވެށި ހިމާޔަތްކުރުމަށް ދޭ އަހައްމިއްޔަތު ފާހަގަކުރައްވައި، އެކަންކަމުގެ މައްޗަށް އަލިއަޅުއްވާލައްވައިފައެވެ. އެގޮތުން ސިޓީތަކާއި ރަށްތައް ފެހިކުރުމަށް ހިންގޭ ހަރަކާތްތަކުގެ ތެރެއިން، ފަސް މިލިއަން ގަސް އިންދުމުގެ ޕްރޮގްރާމަށް ތަފްސީލީ ގޮތެއްގައި އަލިއަޅުއްވާލައްވައި، ކޮންމެ ރައްޔިތަކު ވެސް އެ ރައްޔިތެއްގެ އަމިއްލަ އިސްނެގުމުގެ މަތިން ޕްރޮގްރާމްގައި ބައިވެރިވެވަޑައިގަތުމަށް އެމަނިކުފާނު ވަނީ އެދިވަޑައިގެންފައެވެ.

"ދަ ޕަލްސް" ޕޮޑްކާސްޓްގެ ދެވަނަ ސެގްމަންޓް ކުރިއަށް ގެންދަވަނީ ރާއްޖޭގެ ޒިންމާދާރު ނޫސްވެރިއަކަށް ނުވަތަ މީޑިއާއަކަށް، އެކްސްލޫސިވް ބަސްދީގަތުމެއް ދެއްވާ ގޮތަށެވެ. އެގޮތުން ފުރަތަމަ އެޕިސޯޑުގައި ބައިވެރިވެފައިވަނީ ވަގުތު ނޫހުގެ ނޫސްވެރިޔާ ޔާމީން މުޙައްމަދެވެ. މި ފަހަރުގެ މައުޟޫއުގައި ނޫސްވެރިޔާ ކުރި ސުވާލުތަކަށް ރައީސް ވަނީ ޖަވާބުދާރީވެވަޑައިގެންފައެވެ. މި ބަސްދީގަތުމުގައި އެމަނިކުފާނު ދެއްކެވި ވާހަކަފުޅުގައި ތިމާވެށި ހިމާޔަތްކުރުމަށް ސަރުކާރުން ހާއްސަ އިސްކަމެއް ދެއްވާ ކަމާއި، އަމަލީ ގޮތުން އެކަން ތަންފީޒުކުރައްވަމުން ގެންދަވާ ގޮތުގެ މައްޗަށް އަލިއަޅުއްވާލެއްވިއެވެ.

މި ސިލްސިލާގެ ފުރަތަމަ އެޕިސޯޑް ފައްޓަވަމުން، ސަރުކާރުގެ އިސް ތަރުޖަމާނު ވަނީ، "ދަ ޕަލްސް" އަކީ އެ ވަގުތެއްގައި، ރައްޔިތުންގެ ވިންދު، އެކަމަކާ ގުޅިފައިވާ ކޮންމެ ވެސް އެއް މައުޟޫއެއް ނުވަތަ ކޮންމެ ވެސް އެއް ދާއިރާއަކަށް އަމާޒުކުރައްވައިގެން، އެކަމަކާ ގުޅޭގޮތުން ރައްޔިތުންގެ ވިންދު ހުރި ގޮތް، ދެނެގަނެވޭތޯ މަސައްކަތްކުރައްވައިގެން، އެކަންކަން ރައީސަށް ހުށަހަޅުއްވައި، އެކަމާ މެދު އެމަނިކުފާނު ދެކެވަޑައިގަންނަވާ ގޮތް، ނުވަތަ އެ ދާއިރާއެއްގައި އެމަނިކުފާނު ގެންގުޅުއްވާ ސިޔާސަތުތައް، އަދި އެ ދާއިރާއަކުން ސަރުކާރުގެ މަސައްކަތްތައް ހުރިނެތް ގޮތް ހިއްސާކުރެއްވުމަށް އެކުލަވާލެވިފައިވާ ޕްރޮގްރާމެއްކަން ފާހަގަކުރައްވައިފައެވެ.

ރައްޔިތުންގެ ލާބައާ ގުޅިފައިވާ މުހިންމު ކަންކަމަށް އަމާޒުކޮށްގެން ރައީސް އޮފީހުން 'ދަ ޕަލްސް' ގެ ނަމުގައި ޕޮޑްކާސްޓް ސިލްސިލާއެއް ފަށައިފި

ދައުލަތަށް ދިގު މުއްދަތަކަށް ހިދުމަތްކޮށްދެއްވި ޞިއްދީޤު ޢަލީ ނިޔާވުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އޭނާގެ އާއިލާއަށް ތައުޒިޔާ ފޮނުއްވައިފިއެވެ.

މީސް މީޑިއާގައި ހިއްސާކުރެއްވި 

 ރައީސް ވިދާޅުވީ، ދ. މީދޫގެ ވެރިކަމުގެ އިސް މަގާމުތަކެއް ފުރުއްވައިފައިވާ، މީދުއަށާއި ދައުލަތަށް ދިގު މުއްދަތެއްގައި އިހުލާސްތެރި ހިދުމަތްތަކެއް ކޮށްދެއްވި، އެރަށު ސާޔާ ޞިއްދީޤު ޢަލީ، ދެމިއޮތުމުގެ އާލަމަށް ދަތުރުކުރެއްވުމާ ގުޅިގެން، މަރްހޫމްގެ އާއިލާއަށް ވަރަށް އިހްލާސްތެރިކަމާއެކު ތައުޒިޔާ ދަންނަވާ ކަމަށެވެ.

ފާހަގަކޮށްލެވޭ ގޮތުގައި ޞިއްދީޤަކީ ދައުލަތަށް 31 އަހަރަށްވުރެ ދިގު މުއްދަތަކަށް ހިދުމަތް ކުރެއްވި ބޭފުޅެކެވެ.

ރައީސް ވަނީ، މާތްﷲ ގެ ތަނަވަސް ރަހްމަތުގައި، ސުވަރުގޭގެ ދާއިމީ ނިއުމަތުގައި ޞިއްދީގު ލެހެއްޓެވުމަށް އެދިވަޑައިގެން ދުއާ ކުރައްވައިފައެވެ.

ޞިއްދީޤު ޢަލީ ނިޔާވުމާ ގުޅިގެން ރައީސްގެ ތައުޒިޔާ

ދުނިޔޭގެ ބާޒާރުގައި ހަނގުރާމައާއި ނުތަނަވަސްކަން ބޮޑުވެފައިވާ ދަނޑިވަޅެއްގައި ވެސް، ރާއްޖޭގެ އިގުތިސާދު ހަމަމަގަށް އެޅުވުމަށް ކުރެވުނު މަސައްކަތުގެ ސަބަބުން ފިޗް ރޭޓިންގސްއިން ރާއްޖެއަށް ދީފައިވާ ކްރެޑިޓް ރޭޓިންގ މަތިކޮށްފިއެވެ.

ފިޗް ރޭޓިންގްސްއިން ނެރެފައިވާ ސޮވެރިން ރޭޓިންގ ރިޕޯޓުގައި ބަޔާންކޮށްފައިވާ ގޮތުގައި، ދުނިޔޭގެ ބާޒާރަށް ކުރިމަތިވެފައިވާ ގޮންޖެހުންތަކާއެކުގައި ވެސް، މެދު ރާސްތާގައި ރާއްޖޭގެ އިގްތިސާދު ހަލުވި މިނެއްގައި ކުރިއަރާނެ ކަމަށް ވަނީ އަންދާޒާކޮށްފައެވެ. މި ކުރިއެރުން މައިގަނޑު ގޮތެއްގައި ބިނާވެފައިވަނީ ފަތުރުވެރިކަމުގެ ދާއިރާއަށް އަންނަ ހެޔޮ ބަދަލުތަކުގެ މައްޗަށެވެ. އެގޮތުން އާ ރިސޯޓުތަކަށް ކުރެވޭ އިންވެސްޓްމަންޓްތަކާއި، ފަތުރުވެރިކަމުގެ އިންފްރާސްޓްރަކްޗަރއަށް ގެނެވޭ ތަރައްގީގެ ސަބަބުން އިގްތިސާދީ ދުވެލި ވަރުގަދަވާނެ ކަމަށް އެ ރިޕޯޓުގައި ފާހަގަކޮށްފައިވެއެވެ.

ދުނިޔޭގެ ހަކަތައިގެ ބާޒާރަށް އަންނަ ލޮޅުންތަކާއި، މެދުއިރުމަތީގެ ހަމަނުޖެހުންތަކުގެ ސަބަބުން ދަތުރުފަތުރަށް ކުރިމަތިވާ ހުރަސްތަކާއެކު، ކައިރި މުސްތަގުބަލެއްގައި ބައެއް ގޮންޖެހުންތައް ދިމާވި ނަމަވެސް، ރާއްޖޭގެ އިގްތިސާދީ ކުރިއެރުން 2027 ވަނަ އަހަރާ ހަމައަށް 4.5 އިންސައްތައިގައި ހުންނާނެ ކަމަށް ފިޗުން ވަނީ ލަފާކޮށްފައެވެ.

މިއީ ދުރު ރާސްތާގެ ގައުމުތަކުން އަންނަ، މަތީ ފަންތީގެ ފަތުރުވެރިން އިތުރުވަމުންދިއުމާ ގުޅިފައިވާ ކުރިއެރުމެކެވެ.

މިނިސްޓްރީ އޮފް ފިނޭންސްއިން ހާމަކޮށްފައިވާ ގޮތުގައި، ފިޗްގެ އަންދާޒާތަކުން ދޭހަވަނީ ބައިނަލްއަގްވާމީ ގޮންޖެހުންތަކާއެކުގައި ވެސް ރާއްޖޭގެ އިގްތިސާދާއި ފަތުރުވެރިކަމުގެ ދާއިރާގައި ހުރި ވަރުގަދަކަމެވެ. އަދި ސަރުކާރުގެ ހަރުދަނާ ސިޔާސަތުތަކުގެ ސަބަބުން އިގްތިސާދަށް އިތުބާރު ލިބެމުންދާކަން ވެސް މިނިސްޓްރީން ވަނީ ފާހަގަކޮށްފައެވެ.

ސަރުކާރުން އެޅި ހަރުދަނާ ފިޔަވަޅުތަކުގެ ސަބަބުން ފިޗްގެ ކްރެޑިޓް ރޭޓިންގ މަތިކޮށްފި

ކުޑަކުދިންގެ ހައްގުތަކާ ގުޅޭގޮތުން ކުރެވޭ ގައުމީ މަޝްވަރާގެ ހަގީގީ ނަތީޖާ ފެންނާނީ، ހަމައެކަނި ދެކެވޭ ވާހަކައަކުން ނޫން ކަމަށާއި، ހަމައެއާއެކު، އެ މަޝްވަރާތައް ނިންމާލުމަށްފަހު އަމަލީ ގޮތުން ގެނެވޭ ހެޔޮ ބަދަލުތަކުން ކަމަށް ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު ވިދާޅުވެއްޖެއެވެ.

މެޑަމް ސާޖިދާ މި މޭރުމުން ވިދާޅުވީ، ހެލްތް މިނިސްޓްރީގެ ފަރާތުން އިންތިޒާމުކޮށްގެން ބޭއްވި، ގައުމީ ކުޑަކުދިންގެ ދުވަހުގެ "މަޝްވަރާ" ފޯރަމް އިފްތިތާހްކޮށްދެއްވައި، ވާހަކަފުޅު ދައްކަވަމުންނެވެ. އެކަމަނާ ފާހަގަކުރެއްވި ގޮތުގައި، ކުދިންނަށް އަޅާލުމަކީ ހަމައެކަނި އެކުދިންގެ ޒަރޫރީ ބޭނުންތައް ފުއްދައިދިނުމެއް ނޫނެވެ. އެކުދިންގެ ވިސްނުން ތަރައްގީކުރުމާއި، ހުލްގު ހެޔޮ ދަރިންތަކަކަށް އެ ކުދިން ހެދުމުގެ އިތުރުން، އެ ކުދިންގެ ހިތްތަކުގައި އީމާންތެރިކަމާއި، ހަމްދަރުދީއާއި، ސާބިތުކަން އަށެގެންނެވުމަށް މަސައްކަތް ކުރުމަކީ ވެސް އެކަމުގެ ތެރޭގައި ހިމެނޭ ކަމެއްކަމަށް އެކަމަނާ ވިދާޅުވިއެވެ.

ހަމައެހެންމެ، ހަގީގީ ރައްކާތެރިކަން ފެނިގެންދާނީ ގޭތެރެއާއި، ސުކޫލުތަކާއި، މުޖުތަމައުގައި ދެމެހެއްޓޭ އުސޫލުތަކާއި އަމަލުތަކުންކަން ފާހަގަކުރައްވައި މެޑަމް ސާޖިދާ ވަނީ، ކުދިންނަށް އޯގާތެރިކަމާއި، އަދަބުވެރިކަމާއި، އިހުތިރާމާއި، ރަނގަޅު އާދަތައް އަބަދު ވެސް ފެންނާނެ ފަދަ މާހައުލެއް ބިނާކުރުމަށް މައިންބަފައިންނަށާއި، މުދައްރިސުންނަށާއި، މުޖުތަމައުގެ އަފްރާދުންނަށް ގޮވާލައްވައިފައެވެ. އަދި އެއީ ކުދިންގެ އަޑުއަހާ، އެ ކުދިން ބަލައިގަނެ، އެ ކުދިންގެ އަގުވަޒަންކުރުމާއިއެކު ލޯބިދޭ މާހައުލަކަށް ވާންޖެހޭނެ ކަމަށް ވެސް އެކަމަނާގެ ވާހަކަފުޅުގައި ވިދާޅުވިއެވެ.

ކުދިންނަށް ކުރިމަތިވާ އަނިޔާއާއި، އިހުމާލުވުމާއި، ނަފްސާނީ ތަކްލީފުތަކަކީ ގިނަ ފަހަރަށް ހަނުހިމޭންކަމުގެ ތެރޭގައި ހިނގާ ކަންކަން ކަމުގައި ފާހަގަކުރައްވައި، މުޖުތަމައުތަކުން އަބަދު ވެސް ފާރަވެރިވެ ތިބުމަށާއި، ކުދިންގެ ވާހަކަތައް ކަނުލާ އެހުމަށާއި، ކަންބޮޑުވުމެއް އުޅޭނަމަ އެކަމަކަށް ފިޔަވަޅު އެޅުމަށް، މެޑަމް ސާޖިދާ ބާރުއެޅުއްވިއެވެ.

ޑިޖިޓަލައިޒޭޝަންގެ ސަބަބުން ކުރިމަތިވާ ގޮންޖެހުންތަކަށް އަލިއަޅުއްވާލައްވަމުން، ޑިޖިޓަލް މާހައުލުގައި ކުދިންނަށް ޒިންމާދާރުކަމާއިއެކު މަގުދައްކައިދިނުމަށް މައިންބަފައިންނަށާއި، ބެލެނިވެރިންނަށާއި، ތައުލީމީ ދާއިރާގެ ހިދުމަތްތެރިންނަށް މެޑަމް ސާޖިދާ ގޮވާލެއްވިއެވެ. ޓެކްނޮލޮޖީގެ ސަބަބުން އުނގެނުމާއި، ގުޅުން ބަދަހިކުރުމާއި، އާ އީޖާދުތަކަށް ފުރުސަތު ލިބުނު ނަމަވެސް، ފާރަވެރިވެ ތިބުމާއި، ހޭލުންތެރިކަމާއި، އިރުޝާދުތަކަށް ލާޒިމުކުރާ ފަދަ ހިރާސްތަކެއް ވެސް އެކަމުގައި ހުރި ކަމަށާއި ޓެކްނޮލޮޖީގެ ކުރިއެރުންތައް ހޯދަންވާނީ ކުދިންގެ ރައްކާތެރިކަމާއި، މައުސޫމުކަމާއި، ނަފްސާނީ ދުޅަހެޔޮކަން ގުރުބާން ނުކޮށް ކަމުގައި އެކަމަނާ ވިދާޅުވިއެވެ.

ކުޑަކުދިންގެ ރައްކާތެރިކަމަށްޓަކައި ސަރުކާރުން ފަށާފައިވާ ބައެއް މުހިންމު މަޝްރޫއުތަކަށް މެޑަމް ސާޖިދާ ވަނީ އަލިއަޅުއްވާލައްވައިފައެވެ. އެގޮތުން ނޭޝަނަލް އެކްޝަން ޕްލޭން އޮން ޕްރިވެންޝަން އެންޑް ރެސްޕޮންސް ޓު ވައިލެންސް އެގެއިންސްޓް ޗިލްޑްރަން 2024-2028، ކުޑަކުދިންގެ ހޮޓްލައިން 1412، އަދި އަންހެނުންނާއި ކުޑަކުދިންނަށް ހާއްސަ ހޮސްޕިޓަލެއް ތަރައްގީކުރުމުގެ މަޝްރޫއު ފާހަގަކުރެއްވިއެވެ. އަދި އޮންލައިންވެށީގައި ކުދީން ރައްކާތެރިކުރުމަށް އަޅަމުންދާ ފިޔަވަޅުތަކުގެ ތެރެއިން، އުމުރުން 16 އަހަރުން ދަށުގެ ކުދިން، ބައެއް މީސް މީޑިއާ ޕްލެޓްފޯމްތަކަށް ވަނުން މަނާކުރުމަށް ނިންމާފައިވާ ނިންމުން ވެސް އެކަމަނާގެ ވާހަކަފުޅުގައި ފާހަގަކުރެއްވިއެވެ.

މި ރަސްމިއްޔާތުގައި، ކުޑަކުދިންގެ ހައްގުތަކާއި ތަރައްގީއަށް ހާއްސަކޮށްގެން ތައްޔާރުކޮށްފައިވާ މަޖައްލާ އިފްތިތާހްކޮށްދެއްވަމުން މެޑަމް ސާޖިދާ އިތުރަށް ވިދާޅުވީ، މިފަދަ މަސައްކަތްތަކަކީ ހޭލުންތެރިކަން އިތުރުކުރުމަށާއި، ކުޑަކުދިން ރައްކާތެރިކޮށް އެ ކުދިންނަށް އެހީތެރިވުމަށް މުޖުތަމައުގެ ގާބިލުކަން އިތުރުކުރުމަށް ވަރަށް މުހިންމު ދައުރެއް އަދާކުރާނެ ކަންކަން ކަމަށެވެ.

ގައުމީ މަޝްވަރާގެ ހަގީގީ ނަތީޖާ ފެންނާނީ ހަމައެކަނި ދެކެވޭ ވާހަކައަކުން ނޫން، ކުރާ އަމަލުން: މެޑަމް ސާޖިދާ

ދިވެހި ވަތަނީ ހިދުމަތުގެ ފަންނީ ތަމްރީނު ޕްރޮގްރާމް ފުރިހަމަކުރުމަށްޓަކައި ބައިވެރިން މިއަދު ބ. ކިހާދޫއަށް ފުރައިފިއެވެ.

މިކަން އިއުލާންކުރައްވައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީސް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، ދިވެހި ވަތަނީ ހިދުމަތުގެ ފަންނީ ތަމްރީނުގައި ބައިވެރިވުމަށް ކުރިމަތިލި ބައިވެރިން ބ. ކިހާދޫގައި ގާއިމުކޮށްފައިވާ އެމްއެންޑީއެފްގެ ސްކޫލް އޮފް އިންޖިނިއަރިންގ އެންޑް ލޮޖިސްޓިކްސްއަށް މިއަދު ފުރާފައިވާ ކަމަށެވެ.

އެގޮތުން ރާއްޖޭގެ 17 އަތޮޅެއްގެ 50 ރަށަކަށް ނިސްބަތްވާ، 16 އަހަރާއި 19 އަހަރާއި ދެމެދުގެ 77 ޒުވާނުން ބައިވެރިވާ މި ތަމްރީނުގައި ތަފާތު 6 ފަންނީ ދާއިރާތަކުން ތަމްރީނު ފުރިހަމަކުރުމުގެ ފުރުސަތު ލިބިގެންދާނެ ކަމަށް އެމަނިކުފާނު ވަނީ ވިދާޅުވެފައެވެ.

https://twitter.com/MMuizzu/status/2062081567087120414

މިއަދު ބ. ކިހާދޫއަށް ފުރާފައިވަނީ ވަތަނީ ހިދުމަތުގެ ތަމްރީނުގެ ދެވަނަ ބެޗް ފުރިހަމަކުރި ބައިވެރިންގެ ތެރެއިން، އިތުރު ފަންނީ ތަމްރީނުތައް ހާސިލުކުރުމަށް ޝައުގުވެރިކަން ފާޅުކުރި ބައިވެރިންނެވެ. މި ތަމްރީނު ޕްރޮގްރާމުގެ މައިގަނޑު މަގުސަދަކީ ގައުމީ ހިދުމަތަށް ނުކުންނަ ޒުވާނަކީ މަސައްކަތުގެ މައިދާނަށް އަހުލުވެރި، ހުނަރުވެރި ބަޔަކަށް ހެދުމެވެ.

މީގެ އިތުރުން ރޫހާނީ އަދި ޖިސްމާނީ ގޮތުން ދުޅަހެޔޮ، ޒިންމާދާރު ރައްޔިތުންތަކެއް ބިނާކުރުމުގެ އިތުރުން، ދިވެހި ގައުމަށް ވަފާތެރި، އަހުލާ ރަނގަޅު، އަދި އަމިއްލަ ފައިމައްޗަށް ތެދުވެ ތިބި ޒުވާނުންތަކެއް މުޖުތަމައަށް ނެރުމަކީ ވެސް މި ޕްރޮގްރާމުގެ މައިގަނޑު އެއް މަގުސަދެވެ.

މިދިޔަ އަހަރުގެ އޮކްޓޫބަރު މަހުގެ 1 ވަނަ ދުވަހު ދިވެހި ވަތަނީ ހިދުމަތް އިފްތިތާހުކޮށްދެއްވީ ޅ. މާފިލާފުށީގައި ހުންނަ ދިވެހި ގައުމީ ދިފާއީ ބާރުގެ ކޮމްޕޮސިޓް ޓްރެއިނިން ސެންޓަރގައި ބޭއްވި ރަސްމިއްޔާތެއްގައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒެވެ.

ދިވެހި ވަތަނީ ހިދުމަތުގެ ޕްރޮގްރާމަށް ގިނަ ރައްޔިތުންގެ ތާއީދު ލިބެމުން އަންނައިރު އޭގެ ތެރޭގައި މި ޕްރޮގްރާމުގައި ބައިވެރިވެފައިވާ ޒުވާނުންގެ ބެލެނިވެރިންގެ ޝުކުރާއި ތައުރީފް ވެސް ރައީސް މުޢިއްޒަށާއި ސަރުކާރަށް ދަނީ އޮހެމުންނެވެ.

ދިވެހި ޖުމްހޫރިއްޔާގެ 8 ވަނަ ރައީސުލްޖުމްހޫރިއްޔާ

ޑޮކްޓަރ މުޙައްމަދު މުޢިއްޒު