ޕީއެންސީގެ އިންތިޚާބު ކާމިޔާބުކުރެއްވި ހުރިހާ ބޭފުޅުންނަށް ރައީސް މަރުހަބާ ދަންނަވައިފި

ސަރުކާރު ހިންގާ މައި ޕާޓީ، ޕީއެންސީގެ އެތެރޭގެ އިންތިޚާބު ކާމިޔާބު ކުރެއްވި ހުރިހާ ބޭފުޅުންނަށް ރައީސް ޑރ. މުޙައްމަދު މުޢިއްޒު މަރުޙަބާ ދަންނަވައިފިއެވެ.

ރައީސް ޑރ. މުއިއްޒު، "އެކްސް" ގައި ކުރެއްވި ޕޯސްޓެއްގައި ވިދާޅުވީ ކޮންގްރެސް ޕާޓީގެ އެތެރޭގެ އިންތިޚާބު ކާމިޔާބު ކުރެއްވި ބޭފުޅުންނަށް މަރުހަބާ ދަންނަވާ ކަމަށެވެ. އަދި އެކި މަގާމުތަކަށް ވާދަކުރެއްވި ކެންޑިޑޭޓުންނާއި އިންތިޚާބުގެ އިންތިޒާމުތަކުގައި އުޅުއްވި ހުރިހާ ބޭފުޅުންނަށް އެމަނިކުފާނު ޝުކުރު އަދާކުރެއްވިއެވެ.

އަދި ޕީއެންސީގެ އިންތިޚާބުގައި ވޯޓު ދެއްވި ހުރިހާ މެމްބަރުންނަށް ވެސް ރައީސް ޑރ. މުޢިއްޒު ޝުކުރު ދެންނެވިއެވެ.

ޕީއެންސީގެ އެތެރޭގެ އިންތިޚާބު ބޭއްވީ ހޮނިހިރު ދުވަހު ހެނދުނު 10:00 އިން ފެށިގެން މެންދުރު ފަހު 2:00 އަށެވެ. ބައެއް ވޯޓު ފޮށިތަކުގައި ވޯޓުލުން ކަނޑައެޅިފައިވާ ވަގުތަށް ފެށިފައި ނުވާތީ އެ ތަންތަނުގެ ވޯޓުލުން އެއަށް ވުރެ ގިނައިރު ވެސް ކުރިއަށް ދިޔައެވެ.

އެ އިންތިޚާބުގައި ދާއިރާތަކުގެ ރައީސުންނާއި ނައިބު ރައީސުންނާއި ސްޓިއަރިން ކޮމިޓީ ފަދަ ރަށްރަށުގައި ހިންގާ ހަރަކާތްތަކުގެ އެކި މަގާމުތަކަށް މީހުން އިންތިޚާބުކުރިއެވެ. ދާއިރާއެއްގެ ރައްޔިތުންގެ މަޖިލިސް މެމްބަރު ހުންނަ ނަމަ، އެ ދާއިރާއެއްގެ ރައީސެއް އިންތިޚާބު ނުކުރާނެއެވެ. އެ ދާއިރާތަކަށް އިންތިޚާބު ކުރާނީ ދާއިރާގެ ނައިބު ރައީސުންނާއި އެހެނިހެން މަޤާމުތަކަށެވެ.