ޕީއެންސީގެ އަސާސީ ޤަވާއިދާ އެއްގޮތަށް ޕްރައިމަރީއަކާ ނުލައި ރައީސް ޑރ. މުޢިއްޒުއަށް ޕީއެންސީގެ ރިޔާސީ ޓިކެޓު ދެނީ
2028 ވަނަ އަހަރުގެ ރިޔާސީ އިންތިޚާބުގައި ޕީއެންސީގެ ފަރާތުން ވާދަކުރައްވާނެ ކެންޑިޑޭޓެއް ކަނޑައެޅުމަށް ޕްރައިމަރީ އެއް ނުބާއްވާނެ ކަމަށާއި, ޕްރައިމަރީއަކާ ނުލައި ދެވަނަ ދައުރަކަށް ރައީސް ޑރ.މުޙައްމަދު މުޢިއްޒު ވާދަ ކުރައްވާނެ ކަމުގައި ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް މިހެން ވިދާޅުވީ އިއްޔެ ބޭއްވި އެ ޕީއެންސީގެ އެތެރޭގެ އިންތިޚާބާ ގުޅޭގޮތުން މައުލޫމާތު ދިނުމަށް ރޭ ބޭއްވި ނޫސްވެރިންގެ ބައްދަލުވުމުގައެވެ.
ހިނގަމުން އަންނަ ވެރިކަމުގައި އެ ޕާޓީގެ މެންބަރަކު ރައީސްގެ މަޤާމުގައި ހުންނެވި ނަމަ, އެ ބޭފުޅަކަށް ޕްރައިމަރީއަކާ ނުލައި ދެވަނަ ދައުރަކަށް ޓިކެޓު ލިބިވަޑައިގަންނަވާނެ ކަމަށް ޕީއެންސީގެ އަސާސީ ޤަވާއިދުގައި ބަޔާންކޮށްފައިވާ ކަން ފާހަގަކުރައްވައި އަބްދުއްރަހީމް ވިދާޅުވީ, އެ އުސޫލުގެ ދަށުން 2028 ވަނަ އަހަރުގެ އިންތިޚާބުގައި ޕީއެންސީ ޓިކެޓުގައި ވާދަކުރައްވާނީ ރައީސް ޑރ މުޢިއްޒު ކަމަށެވެ.
އަސާސީ ޤަވާއިދު ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް ވަޑައިގަންވާ ބޭފުޅަކު އެ މަގާމުގައި ހުންނަވައި ދެވަނަ ދައުރަކަށް ކުރިމަތިލައްވަން ބޭނުންފުޅު ވަންޏާ ރިޔާސީ ޕްރައިމަރީ އަކާއި ނުލައި އެ ޓިކެޓު އެ ބޭފުޅަކަށް ލިބިވަޑައިގަންނަވާނެ ކަމަށް، އެހެންވެ އެއީ ޕްރައިމަރީ ބާއްވަން ޖެހޭ ކަމެއް ނޫން: އަބްދުއްރަހީމް