ރާއްޖޭގެ ކަނޑުގެ ސަރަޙައްދުން ގިނަ އަދަދެއްގެ މަސްތުވާތަކެތި އަތުލައިގަތް ބޮޑު އޮޕަރޭޝަނަށް ރައީސްގެ ތަޢުރީފް!
ރާއްޖޭގެ ކަނޑުގެ ސަރަޙައްދުން ގިނަ އަދަދެއްގެ މަސްތުވާތަކެތި އަތުލައިގަތް ބޮޑު އޮޕަރޭޝަނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަޢުރީފް ކުރައްވައިފިއެވެ.
މިއަދުގެ ވަގުތެއްގައި ހދ. މަކުނުދޫގެ ބޭރުން ލަންކާ މަސް ބޯޓެއް ކަމަށް ބެލެވޭ ބޯޓެއް ހުއްޓުވާ ކޯސްޓް ގާޑުގެ ބެލުމުގެ ދަށުން ހދ. ކުޅުދުއްފުށި ބަނދަރަށް ރޭ ގެންގޮސް މިއަދު ހެނދުނު މި ބޯޓު ބަލައިފާސް ކުރުމުން ބޯޓުން ވަނީ ގިނަ އަދަދެއްގެ ޑްރަގް ފެނިފައެވެ. އެގޮތުން 468.6 ކިލޯގްރާމުގެ މަސްތުވާތަކެތި ވަނީ އަތުލައިގެންފައެވެ. މިތަކެތީގެ އަގަށް ގާތްގަނޑަކަށް އެއް ބިލިއަން ދިވެހި ރުފިޔާ އަރާއިރު މިއީ ރާއްޖޭގަ ފަހުގެ ތާރީޚެއްގައި އަތުލައިގަތް އެންމެ ގިނަ މަސްތުވާތަކެތީގެ ޝިޕްމެންޓްކަން ފާހަގަކުރެވެއެވެ.
މިކަމާއި ގުޅިގެން ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ވަނީ މި އޮޕަރޭޝަންގައި ބައިވެރިވި ސަލާމަތީ ފަރާތްތަކާއި އަދި ކަމާގުޅުންހުރި އިދާރާތަކުން ކުރާ މަސައްކަތް ފާހަގަކުރައްވާ އެފަރާތްތަކަށް ޝުކުރު ދަންނަވާފައެވެ.
ރައީސް ވިދާޅުވީ ދިވެހިރާއްޖެ މަސްތުވާތަކެތިން އެއްކޮށް ސަލާމަތްކުރުމަކީ އެންމެ އިސްކަންދެއްވާ އެއްކަންތައް ކަމަށާއި، ޤާނޫނު ތަންފީޒުކުރާ މުއައްސަސާތަކުން މިދާއިރާއިން ކުރަމުންގެންދާ ބުރަމަސައްކަތް ފާހަގަކޮށް އެފަރާތްތަކަށް ޝުކުރު ދަންނަވާ ކަމަށެވެ.