ބޮޓްސްވާނާ އަދި ޒެމްބިއާ މުބާރާތުން ރަން ވަނަތައް ހޯދި ދިވެހި އެތުލީޓުންނަށް ރައީސްގެ ތަހުނިޔާ
ބޮޓްސްވާނާ އިންޓަނޭޝަނަލް ސީރީޒް ބެޑްމިންޓަން މުބާރާތާއި ޒެމްބިއާ އިންޓަނޭޝަނަލް ބެޑްމިންޓަން މުބާރާތުގައި ވާދަކުރި ދިވެހި ކުޅުންތެރިން ހޯދި ފަޚުރުވެރި އަދި ތާރީޚީ ކާމިޔާބީއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަރުޙަބާ ވިދާޅުވެއްޖެއެވެ.ބޮޓްސްވާނާ އިންޓަރނޭޝަނަލް ސީރީޒް ބެޑްމިންޓަން މުބާރާތާއި ޒެމްބިއާ އިންޓަނޭޝަނަލް ބެޑްމިންޓަން މުބާރާތުގައި ވާދަކުރި ކުޅުންތެރިންނަށް މަރުޚަބާ ވިދާޅުވެ ރައީސުލްޖުމްހޫރިއްޔާ ހިއްސާކުރެއްވި ސޯޝަލް މީޑިއާ ޕޯސްޓުގައި ވިދާޅުވީ މިއީ ތާރީޚީ ކާމިޔާބީއެއް ކަމަށެވެ. ބެޑްމިންޓަން ވޯލްޑް ފެޑެރޭޝަންގެ މުބާރާތެއްގައި ވާދަކޮށް ދިވެހި ކުޅުންތެރިން ހޯދި ކާމިޔާބީއާ ފަޚުރުވެރިވެވަޑައިގަންނަވާކަމަށެވެ.
ދިވެހި ކުޅުންތެރިންނަށް ސާބަސް ދެއްވާ ރައީސް ވިދާޅުވީނމި ޝަރަފްވެރި ކާމިޔާބީ ރާއްޖެއަށް ހޯދަައިދިން ހުނަރުވެރި ކުޅުންތެރިންނާއި މުޅި ޓީމަށް ތަހުނިޔާ ދަންނަވާކަމަށެވެ.
ބޮޓްސްވާނާ އިންޓަރނޭޝަނަލް ސީރީޒް ބެޑްމިންޓަން މުބާރާތުގައި އަންހެން ސިންގަލްސްގެ ފައިނަލްގައި ބައްދަލުކުރީ ރާއްޖޭގެ ދެ ކުޅުންތެރިންނެވެ. މި ކެޓަގަރީގެ ޗެމްޕިއަންކަން ފާތިމަތު ނަބާހާ އަބްދުއްރައްޒާގް ހޯދިއިރު ރަނަރަޕްކަން ލިބުނީ އާމިނަތު ނަބީހާ އަބްދުއްރައްޒާގަށެވެ. ނަބާހާ އާއި ނަބީހާގެ މި ކުރިމަތިލުމަކީ ދުނިޔޭގެ ބެޑްމިންޓަން ފެޑެރޭޝަނުން ގަބޫލުކުރާ މުބާރާތެއްގެ ފައިނަލުގައި ރާއްޖެ ދެ ކުޅުންތެރިން ކުރިމަތިލި ފުރަތަމަ މެޗެވެ.
މީގެއިތުރުން މިކްސް ޑަބަލްސްއިން ރާއްޖޭގެ ނަބާހާ އާއި ޒަޔާން ޝަހީދު ޒަކީގެ ޕެއާ ރިހި މެޑަލް ހޯދާފައިވާއިރު، މިއީ ބެޑްމިންޓަން ވޯލްޑް ފެޑެރޭޝަން (ބީޑަބްލުއެފް) ގެ ރުހުން ލިބިފައިވާ މުބާރާތަކުން މި ޕެއާ ހޯދި ފަސްވަނަ މެޑަލްއެވެ. ފިރިހެން ޑަބަލްސް އިން ޒަޔާން ޒަކީ އާއި ނިބާލް އަހުމަދުގެ ޕެއާގެ ލޯ މެޑަލް ހޯދާފައިވާއިރު އަންހެން ޑަބަލްސްގައި ފާތިމަތު ނަބާހާ އާއި އައިމިނަތު ނަބީހާގެ ޕެއާއިން ވަނީ ލޯ މެޑަލް ހޯދާފައެވެ.
ބޮޓްސްވާނާ މުބާރާތުގެ މިކްސް ޑަބަލްސް ފައިނަލުގައި ޒަޔާން އާއި ނަބާގެ ޕެއާއިން ނުކުތީ އަޒަރުބައިޖާންގެ އާގިލް ގަބިލޯވް އާއި އީރާ މަފްތުހާގެ ޕެއާއާ ދެކޮޅަށެެވެ. މި މެޗުން އާގިލް އާއި އީރާގެ ޕެއާ މޮޅުވީ، 23-21 އާއި 21-18 އިންނެވެ.
މިއީ ބެޑްމިންޓަން ވޯލްޑް ފެޑެރޭޝަންގެ މުބާރާތެއްގައި ރާއްޖޭން މިހާތަނަށް ހޯދި އެންމެ ބޮޑު ކާމިޔާބީއެވެ.