ކެންސަރު ބަލި ތަޙައްމަލްކުރާ ކޮންމެ މީހަކަށް ކުލުނާއި އެހީތެރިކަމާއި ހެޔޮދުޢާ މުހިންމު: ރައީސް
ކެންސަރު ބަލި ތަޙައްމަލްކުރާ ކޮންމެ މީހަކަށް ކުލުނާއި އެހީތެރިކަމާއި ހެޔޮދުޢާ މުހިންމު ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ދުނިޔޭގެ ކެންސަރު ބަލީގެ ދުވަހާއި ގުޅިގެން އެކްސްގައި ކުރެއްވި ޕޯސްޓެއްގައެވެ.
ރައީސް މުޢިއްޒު ވިދާޅުވީ ކުލުނާއި، އެހީތެރިކަމާއި، ހެޔޮދުޢާ، ކެންސަރުބަލި ތަޙައްމަލްކުރާ ކޮންމެ އަޚަކާއި އުޚްތަކަށް މުހިންމު ކަމަށެވެ.
ދުނިޔޭގެ ކެންސަރު ބަލީގެ ދުވަހާއި ގުޅިގެން ރައީސުލް ޖުމްހޫރިއްޔާ ހިއްސާ ކުރެއްވި މެސެޖް.
ރާއްޖޭގައި ކެންސަރުބަލި ޖެހިފައިވާ މީހުންގެ އަދަދު އަންނަނީ ދުވަހެއް ދުވަހަކަށް އިތުރުވަމުންނެވެ. އެގޮތުން، ރާއްޖޭގައި މަރުވާމީހުންގެ އަދަދަށްބަލާއިރު 17 އިންސައްތަ މީހުންނަކީ، އެކި ބާވަތުގެ ކެންސަރުބަލީގައި މަރުވާ މީހުންނެވެ.
ރާއްޖޭގައި ޒަމާނީ ޚިދުމަތްތައް ލިބޭނެ ކެންސަރު ހޮސްޕިޓަލެއް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން ދިވެހި ރައްޔިތުންނަށް ވެފައިވާ ވަޢުދެކެވެ.
ރައީސްގެ ވަޢުދުފުޅާއި އެއްގޮތަށް ޒަމާނީ ޚިދުމަތްތަކާއިއެކު ކެންސަރު ބައްޔަށް ފަރުވާދޭ ޒަމާނީ ހޮސްޕިޓަލެއް ރާއްޖޭގައި ތަރައްޤީކުރުމުގެ މަސައްކަތް ސަރުކާރުން މިހާރު ވަނީ ފަށާފައެވެ.
މި ހޮސްޕިޓަލަކީ ރާއްޖޭގައި ކެންސަރު ބަލި ފެންނަ މިންވަރު މަދުކޮށް ރައްޔިތުންނަށް ލުއިފަސޭހަ ޚިދުމަތްތައް ދިނުމުގެ ގޮތުން ޤާއިމްކުރާ ހޮސްޕިޓަލެއްކަމަށް ސަރުކާރުން ވަނީ ހާމަކޮށްފައެވެ.