ރައީސް މުޢިއްޒުއާއި ގުޅޭގޮތުން ބުހުތާނު ދޮގު ފެތުރުމަށްފަހު "އަދަދު" ނޫހުން މަޢާފަށް އެދި ޚަބަރު ޑިލީޓްކޮށްފި
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުއާ ބެހޭ ގޮތުން ތަކުރާރުކޮށް ދޮގު ޚަބަރު ގެންނަމުންދާ "އަދަދު" ނޫހުން ރައީސް އެންމެފަހުން ކުރެއްވި ދަތުރުފުޅާއި ގުޅިގެން ދޮގު ޚަބަރެއް ފެތުރުމަށް ފަހު އެ ޚަބަރު ޑިލީޓްކޮށް އާއްމު ރައްޔިތުންގެ ކިބައިން މަޢާފަށް އެދިއްޖެއެވެ.
ރައީސްގެ ދަތުރުފުޅުތަކާ ބެހޭ ގޮތުން މީގެކުރިންވެސް "އަދަދު" ނޫހުންވަނީ ތަކުރާރުކޮށް ދޮގު ޚަބަރުތައް ފަތުރާފައެވެ. އެހެންނަމަވެސް މިއީ މިފަދަ ޚަބަރެއް ފެތުރުމުން އެ ނޫހުން މަޢާފަށް އެދުނު ފުރަތަމަ ފަހަަރެވެ. އެންމެ ފަހުން އެ ނޫހުން ވަނީ އެ ދޮގު ޚަބަރުވެސް ޑިލީޓްކޮށްފައެވެ.
"އަދަދު" ނޫހުން ވަނީ އެނޫހުގެ އެކްސް އާއި ފޭސްބުކް މެދުވެރިކޮށް އެއީ ދޮގު ޚަބަރެއް ކަމަށް އިޢުތިރާފްވެ ކިޔުންތެރިންގެ ކިބައިން މަޢާފަށް އެދިފައެވެ. އަދި ރައީސްގެ ދަތުރުފުޅުތައް ކުރައްވަނީ އެމަނިކުފާނު ވަޢުދުވެ ވަޑައިގެންނެވިފަދައިން ކަމަށް އެނޫހުން ވަނީ ބުނެފައެވެ.
"އަދަދު" ނޫހަކީ ރައީސް ޑރ. މުޢިއްޒުއާއި އަދި ސަރުކާރާ ބެހޭގޮތުން މި ގޮތަށް ބުހުތާނު ދޮގު ޚަބަރު ފަތުރަމުން އެކި މީހުންގެ އަބުރަށް އަރައިގަންނަމުންދާ ނޫހެއް ކަަމަށް ގިނަ ބަޔަކު ދަނީ ބުނަމުންނެވެ.