ރައީސުލްޖުމްހޫރިއްޔާގެ އަނބިކަނބަލުން، "ފިޔަވަތި" ގެ އަހަރީ ޙަފުލާ ޝަރަފުވެރިކޮށްދެއްވައިފި
ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، ހުޅުމާލޭގައި ހުންނަ ކުޑަކުދިންގެ މަރުކަޒު، "ފިޔަވަތި"ގެ އަހަރީ ޙަފުލާ ޝަރަފުވެރިކޮށްދެއްވައިފިއެވެ. މިއަދު ހަވީރު ފަރުކޮޅުފުށީގައި ބޭއްވި މި ޙަފުލާގައި އެކަމަނާ ވަނީ، ފިޔަވަތީގެ ކުދިން ހުށަހަޅައިދިން، ތަފާތު ހަރަކާތްތައް ބައްލަވާލައްވައި، އެކުދިންނަށް ހަދިޔާ ޙަވާލުކޮށްދެއްވާފައެވެ.
މި ޙަފުލާގައި ރައީސުލްޖުމްހޫރިއްޔާގެ އަނބިކަނބަލުން ވަނީ، ފިޔަވަތީގެ ކުދިންނާއެކު ހަވީރުގެ ސައިފޮދެއްގައި ބައިވެރިވެވަޑައިގެން، އެކުދިންނާ ބައްދަލުކުރައްވައި، އެކުދިންނާއެކު ވަގުތު ހޭދަކުރައްވާފައެވެ.
ހައުސިންގް ޑިވެލޮޕްމަންޓް ކޯޕަރޭޝަން (އެޗް.ޑީ.ސީ)އިން ފިޔަވައްޗަށް ހަދިޔާކުރި "ގޭމް ރޫމް" އެ މަރުކަޒާ ރަސްމީކޮށް ހަވާލުކޮށްދެއްވާފައިވަނީވެސް މިއަދުގެ ޙަފުލާގައެވެ.
ފިޔަވައްޗަކީ، ކުޑަކުދިންގެ ހިޔާގެ ބައެއްގެ ގޮތުގައި، ހުޅުމާލޭގައި ހިންގާ މަރުކަޒެކެވެ. މި މަރުކަޒުގައި ދައުލަތުން ބަލަހައްޓަނީ، އުމުރުން 13 އަހަރު ނުފުރޭ ކުޑަކުދިންނެވެ.