ރައީސް މުޢިއްޒުގެ ފުރަތަމަ ރިޔާސީ ބަޔާން ވެގެންދާނީ އެންމެ ވިޝަނަރީ ޤައުމީ ތަސައްވުރުތައް ހާމަކުރައްވާނެ ބަޔާނަށް: ރައީސް އޮފީސް

މާދަމާގެ މަޖިލިސް ޖަލްސާގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވާ ފުރަތަމަ ރިޔާސީ ބަޔާނަކީ ޝާމިލު ތަސައްވުރެއްގެ މައްޗަށް އެކުލެވޭ އުންމީދީ ކަންތައްތަކެއް ހާމަކުރައްވާނެ ރިޔާސީ ބަޔާނެއްކަމަށް ރައީސް އޮފީހުން ބުނެފިއެވެ.

ރައީސް އޮފީހުގެ ސްޓްރެޓެޖިކް ކޮމިއުނިކޭޝަންސް މިނިސްޓަރު އިބްރާހީމް ޚަލީލު ވިދާޅުވީ މާދަމާ ރައީސް ޑރ.މުޢިއްޒު ދެއްވާ ރިޔާސީ ބަޔާނަކީ މިހާތަނަށް ރާއްޖޭގެ ތާރީޚުގައި ޤައުމުގެ އެންމެ އިސްވެރިޔަކު ރައްޔިތުންގެ މަޖިލީހުގައި ހުށަހަޅުއްވާ އެންމެ ޝާމިލު، އެންމެ އުންމީދީ ތަސައްވުރު ހިމެނޭ ބަޔާން ކަމަށެވެ.

އޭގެ އިތުރަށް ޚަލީލު ދެއްވި ޔަޤީންކަމަކީ މާދަމާގެ ބަޔާނުގައި ރާއްޖޭގެ ރައްޔިތުންގެ އުންމީދުތައް އައުވާނެ ގިނަގުނަ ކަންތައްތަކެއް ރައީސް މުޢިއްޒު ހާމަކުރައްވާނެކަމުގެ ޔަގީންކަމެވެ.

މާދަމާގެ ރިޔާސީ ބަޔާނަކީ 2023 ވަނަ އަހަރުގެ ނޮވެންބަރު 17 ވަނަ ދުވަހުގައި ރައީސުލްޖުމްހޫރިއްޔާގެ މަޤާމުގެ ހުވައިކުރެއްވި ރައީސް ޑރ.މުޢިއްޒުގެ ފުރަތަމަ ރިޔާސީ ބަޔާނެވެ.

ރައީސް ޑރ. މުޢިއްޒުގެ ފުރަތަމަ ރިޔާސީ ބަޔާން އިއްވަވާ ޖަލްސާ ފެށުމަށް ހަމަޖެހިފައިވަނީ މާދަމާ ހެނދުނު 9:00 ގައެވެ. ޖަލްސާ ފައްޓަވައިދެއްވާނީ ރައްޔިތުންގެ މަޖިލީހުގެ ރައީސް މުޙައްމަދު އަސްލަމެވެ. އެއަށްފަހު އެ ޖަލްސާގައި އޮންނާނީ ރައީސް މުޢިއްޒު ރިޔާސީ ބަޔާން އިއްވެވުމެވެ.