ޙަޤީޤީ ކުރިއެރުމަކީ ޢިމާރާތްތައް ބިނާކުރުމާއެކު، މުޖުމަޢުގައި ހުރި މައްސަލަތައް ޙައްލުވެ، ފިކުރީ ތަރައްޤީ ލިބި، ބިނާކުރަނިވި ފުދުންތެރި މުޖުތަމަޢެއް ބިނާވުން: ރައީސް

ޙަޤީޤީ ކުރިއެރުމަކީ ޢިމާރާތްތައް ބިނާކުރުމާއެކު މުޖުމަޢެއްގައި ހުރި މައްސަލަތައް ޙައްލުވެ، ފިކުރީ ތަރައްޤީ ލިބި، ބިނާކުރަނިވި ފުދުންތެރި މުޖުތަމަޢެއް ބިނާވުން ކަމަށާއި، އެފަދަ ވަށާޖެހެނިވި ތަރައްޤީއެއް ގެނެސްދެއްވުމަކީ ޚުދު އެ މަނިކުފާނާއި ރައްޔިތުންވެސް އެދިވަޑައިގަންނަވާ ގޮތް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މި ފަދައިން ވިދާޅުވީ، އަރިއަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން، އއ. ރަސްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި، ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި، ސިޔާސީ އޮއިވަރުގައި ނުޖެހި، ޤައުމީ ވިސްނުމެއްގައި، އަމިއްލަ ސިކުނޑިން ވިސްނައި، އެންމެން އެކަތިގަނޑެއްގެ ގޮތުގައި ކުރިއަށް ދާނަމަ، ބިނާކުރަނިވި، ދެމެހެއްޓެނިވި، ޙަޤީޤީ ތަރައްޤީ ލިބިގެންދާނެކަން ފާހަގަކުރެއްވިއެވެ.

އއ. ރަސްދޫގެ ރައްޔިތުންނާ ބައްދަލުކުރައްވައި ރައީސުލްޖުމްހޫރިއްޔާ ވަނީ ރަސްދޫގެ ރައްޔިތުން އެދިތިބި ޢުމްރާނީ ތަރައްޤީގެ މަޝްރޫޢުތަކާ ގުޅިގެންވެސް އުންމީދީ ވާހަކަފުޅުތަކެއް ދައްކަވާފައެވެ. އެގޮތުން ކުރިއަށް އޮތް 2025 ވަނަ އަހަރަށް، ރައްޔިތުންގެ މަޖިލީހުން ފާސްކުރައްވާފައި އޮތް ބަޖެޓަކީ އއ. ރަސްދޫ ހިމެނޭހެން ރާއްޖޭގެ އެކި ކަންކޮޅުތަކުގައި ތަރައްޤީގެ މަޝްރޫޢުތައް ހިންގޭނެ ފަދަ ގޮތަކަށް ފާސްކުރައްވާފައިވާ ބަޖެޓެއް ކަމުގައި ރައީސުލްޖުމްހޫރިއްޔާ ވިދާޅުވިއެވެ.

މިހިނގާ 2024 ވަނަ އަހަރަށް ލިބިވަޑައިގެންނެވި ބަޖެޓަކީ އިންތިޤާލީ މަރުޙަލާގައި ހިއްސާކުރެއްވި ކަންކަމަށް ރިޢާޔަތްކުރެއްވުމަކާ ނުލައި، ކުރީގެ ސަރުކާރުގެ މާލީ ވުޒާރާއިން އެކުލަވާލެއްވެވި ބަޖެޓެއް ކަމުގައިވާތީ، ތަރައްޤީގައި އޮތީ ތަޅެއް އެޅުވިފައި ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ކުރިއަށް އޮތް 2025 އަދި 2026 ވަނަ އަހަރަށް ރާއްވަވާފައި ވާނީ، ކުޑަ ރަށެއް ބޮޑު ރަށެއް ތަފާތު ކުރެއްވުމެއްނެތި، ތަރައްޤީގެ އެކި ދާއިރާތަކުން ހިންގެވުމަށް ވަޢުދުވެވަޑައިގެންފައިވާ މަޝްރުޢޫތައް ޢަމަލީ ގޮތުން ފައްޓަވައި، ނިންމެވުމަށް މަސައްކަތްތައް ހިންގެވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ. މި މޭރުމުން، އއ. ރަސްދޫއަށް އެންމެ މުހިންމު އެއް ކަމަކީ ބަނދަރު ތަރައްޤީ ކުރުން ކަމަށް ވާއިރު، ރައްޔިތުން އެދިވަޑައިގަންނަވާ ފުރިހަމަ މިނުގައި އެ މަސައްކަތްކޮށްދެއްވާނެ ކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ރަސްދޫގެ ރައްޔިތުންނަށް ދެއްވާފައެވެ.

މަސްވެރިކަމަކީވެސް ރަސްދޫއަށް މުހިންމު ދާއިރާއަކަށް ވާއިރު، ސަރުކާރުން ހުރިހާ ކަމެއްގެ ކޮންޓްރޯލް ނެންގެވުމުގެ ބަދަލުގައި މަސްވެރިންނަށް ކަންކަން ދޫކުރެއްވުމުގެ އުސޫލުގެ ތެރެއިން، އަމިއްލަ އޮޑިފަހަރުގައި އައިސް އުފައްދާ، މަހުގެ ތާޒާކަން ކަށަވަރު ކުރުމުގެ ފުރުޞަތު، އއ. ރަސްދޫ ރައްޔިތުންނަށްވެސް އެބަ އޮތް ކަމަށާއި، އެ ކަމަށް ބޭނުންވާ އެހީގެ މަގުތައް ފަހިކޮށްދެއްވުމުގައި، ކައުންސިލްތަކާއި ގުޅިވަޑައިގެން އެ މަނިކުފާނުގެ ސަރުކާރުން ހަރަކާތްތެރިވެވަޑައިގަންނަވާ ކަމަށްވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

އަދި އއ. ރަސްދޫއަކީ ފަތުރުވެރިކަމުގެ ސިނާޢަތްވެސް ފުޅާވެފައި އޮތް ރަށަކަށް ވާއިރު، ވެއްޓާ ރައްޓެހި ދެމެހެއްޓެނިވި ރޫޙެއްގައި ފަތުރުވެރިކަން ކުރިއެރުވުމަށްވެސް ރައީސުލްޖުމްހޫރިއްޔާ ވަނީ ގޮވާލައްވާފައެވެ. އެގޮތުން އއ. ރަސްދޫގައި ހިންގާ ގެސްޓްހައުސްތަކަކީ އިރުގެ އަވިން ހަކަތަ އުފައްދާ ނިޒާމުތަކަށް ބަރޯސާވާ ތަންތަން ކަމުގައި ހަދައި، އިޔާދަކުރަނިވި ހަކަތައަށް ބަދަލުވުމަށް ރައީސުލްޖުމްހޫރިއްޔާ ވަނީ ހިތްވަރު ދެއްވާފައެވެ.

އެދިވަޑައިގެންނެވި ގޮތަށް ކަންކަން ނުކުރެވި މިދިޔަ އަހަރު ފާއިތުވީ ބަޖެޓުގެ ސަބަބުންކަން ފާހަގަކުރައްވަމުން ރައީސުލްޖުމްހޫރިއްޔާ ވިދާޅުވީ، މިދިޔަ އަހަރު ކުރައްވަން ޖެހިވަޑައިގެންނެވި އެންމެ ބޮޑު ކަމަކީ ބަނގުރޫޓު ނުވެ، ސަލާމަތުގެ އައްސޭރިއަށް އިޤްތިޞާދު ގެންދެވުން ކަމަށެވެ. އަދި ޤާއިމުކުރެއްވުނު މި ބިންގަލުގެ މަތީގައި ދިވެހިރާއްޖޭގެ އިޤްތިޞާދު ދާނީ ކުރިއަށްކަން ފާހަގަކުރައްވަމުން، ރައީސުލްޖުމްހޫރިއްޔާ ވަނީ އއ. ރަސްދޫއަކީ މަސްވެރިކަމާއި ފަތުރުވެރިކަމުގެ ސިނާޢަތް އޮތް ރަށެއްކަން ފާހަގަކުރައްވާފައެވެ.

އެގޮތުން ރަށުގެ ތަރައްޤީއަށް ކުރަންޖެހިފައިވާ މަސައްކަތްތަކަކީ، އެމަނިކުފާނު ވެވަޑައިގެންފައިވާ ވަޢުދުތަކަށް އިސްކަންދެއްވައިގެން، 2025 ވަނަ އަހަރުގެ ތެރޭގައި ކުރައްވާނެ މަސައްކަތްތަކެއްކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.