3 މިނިސްޓްރީއެއްގައި ރޯވުން: ރައީސް ޑރ މުޢިއްޒު އެ ސަރަޙައްދަށް ވަޑައިގެން ޙާލަތު ބައްލަވައިފި

މިއަދު ހެނދުނު 3 މިނިސްޓްރީއެއްގައި އަލިފާން ރޯވެ އަނދަމުން ދިޔުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެތަނަށް ވަޑައިގެން ޙާލަތު ބައްލަވާ ލައްވައިފިއެވެ.

އެމްއެންޑީއެފުން ބުނި ގޮތުގައި އަލިފާންގަނޑު މިހާރުވަނީ ކޮންޓްރޯލް ކުރެވިފައެވެ.

އަދި އަލިފާނުގެ ހާދިސާއާއި އެ ސަރަހައްދުގައި ސްކޫލުތަކުގެ ދަރިވަރުން ވަނީ ގެއަށް ފޮނުވާލާފައެވެ. އެގޮތުން ތާޖުއްދީން ސްކޫލާއި ހިރިޔާ ސްކޫލާއި ފަލާހް ޕްރީ ސްކޫލުގެ ކުދިން ގެއަށް ދޫކޮށްލާފައިވާ ކަމަށް މައުލޫމާތު ލިބެއެވެ. 

މީގެ އިތުރުން އެމްއެންޑީއެފުން ބުނީ އަލިފާން ނިއްވުމަށް އެއަރޕޯޓުގެ ފަޔަރ ފައިޓަރސް ގެ އެހީތެރިކަން ލިބިފައިވާ ކަމަށެވެ. 

މި ޢިމާރާތުގައި ހައުސިންގ މިނިސްޓްރީގެ އިތުރުން ކޮންސްޓްރަކްޝަން މިނިސްޓްރީ ވެސް ހިންގަމުން ގެންދެއެވެ.މި ހާދިސާގައި 3 މިނިސްޓްރީގެ މުދަލާ ތަކެއްޗަށް އެކިވަރުގެ ގެއްލުން ވަނީ ލިބިފައެވެ.

ހާދިސާގައި މީހަކަށް އަނިޔާވިކަން އަދި އެނގިފައެއް ނުވެއެވެ.