ފައިސާ ޗާޕުކުރުން ހުއްޓާލުމާއެކު ސޮވެރިން ޑިވެލޮޕްމެންޓް ފަންޑަށް ޑޮލަރު ޖަމާކުރަން ފަށައިފިން: ރައީސް

ނިމިދިޔަ ސަރުކާރުގައި ފައިސާ ޗާޕުކުރަން ފަށާފައި އޮތް އޮތުން ނިމުމަކަށް ގެނައުމާއެކު، ދަރަނި އަދާކުރުމުގެ ބުރަ ކުޑަކުރުމަށް ޤާއިމުކޮށްފައިވާ ސޮވެރިން ޑިވެލޮޕްމެންޓު ފަންޑަށް ޑޮލަރުން ފައިސާ ޖަމާކުރަން ފަށާފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

މިއަދު އޮތް ރައްޔިތުންގެ މަޖިލީހުގައި އެމަނިކުފާނު އިއްވަވާ ރިޔާސީ ބަޔާނުގައި ފާހަގަކުރެއްވި ގޮތުގައި ރާއްޖޭގެ އިޤުތިޞާދަށް ތަދު އަހަރުތަކެއް ކުރިމަތިވުމަށްފަހު، އެ ދަތިތަކުން އަރައިގަތުމަށް ރައީސް މުޢިއްޒުގެ ސަރުކާރުން ގެންދަނީ މެދުކެނޑުމެއްނެތި މަސައްކަތްތަކެއް ކުރަމުންނެވެ.

އިޤުތިޞާތުދީ ޙާލަތު ރަނގަޅުވި ނަމަވެސް ދައުލަތުގެ މާލިއްޔަތަށް ބޮޑެތި ގޮންޖެހުންތަކެއް ކުރިމަތިވެފައިވާކަމަށާއި، އާމްދަނީއާއި ޚަރަދުގެ ފަރަގު ބޮޑެ ފިސްކަލް ޑެފިސިޓު ދެމެހެއްޓެނި ނޫން މިންވަރަކަށް ފުޅާވެފައިވާ ކަން ރައީސް ފާހަގަ ކުރެއްވިއެވެ. އެގޮތުން ކޮވިޑާ ގުޅިގެން ކުރިމަތިވި އިޤުތިޞާދީ ހީނަރުކަމާ ގުޅިގެން 2020 ވަނަ އަހރުގައި ބަޖެޓު ޑެފިސިޓު 13.5 ބިލިއަން ރުފިޔާއަށް އިތުރުވި ނަމަވެސް، ސަރުކާރުން ހިންގަމުން އައި އިސްރާފާއި، ސަރުކާރުގެ އެއިރުގެ ސިޔާސަތުތައް ބައްޓަންކޮށްފައި ހުރި ގޮތުގެ ސަބަބުން އިޤުތިޞާދީ ހާލަތު ބަލިމަޑުކަމުގެ ކުރިން އޮތް ރަނގަޅު ހާލަތަށް ރުޖޫއަވީއިރުވެސް، ދައުލަތުގެ ބަޖެޓު ޑެފިސިޓު ކުޑަނުވިކަމަށް ރައީސް ވިދާޅުވިއެވެ.

މިގޮތުން، 2023 ވަނަ އަހަރު އިގުތިސާދުގެ އުފެއްދުންތެރިކަން 2019 ވަނަ އަހަރު ހުރި މިންވަރަށް އިއާދަވިނަމަވެސް، އެ އަހަރުގެ ބަޖެޓު ޑެފިސިޓް ހުރީ 2020 ވަނަ އަހަރުގެ ޑެފިސިޓަށްވުރެވެސް ފުޅާކޮށް، 14.6 ބިލިއަން ރުފިޔާގައި. ރައީސް މުޢިއްޒު

ރައީސް ވިދާޅުވީ ސަރުކާރުން ރާއްޖެއާމެދު ގެންގުޅޭ ތަސައްވުރު ޙަޤީޤަތަކަށް ހެދޭނީ މާލީގޮތުން ޤައުމު ވެއްޓިފައިވާ އަޑިގަނޑުން ނަގައި، ހިންދެމިލެވިގެން ކަމަށެވެ. ރާއްޖޭގެ ތާރީޚުގައިވެސް މާލީ ގޮތުން ރާއްޖެ ނުދާފަދަ ނުރައްކާތެރި ހާލަތަކަށް ފާއިތުވި ފަސް އަހަރު ނިމުނުއިރު ގޮސްފައިވާކަން ފާހަގަކުރައްވަމުން އެމަނިކުފާނު ވިދާޅުވީ ޑެފިސިޓު ފައިނޭންސްކުރުމަށް ކުރީ ސަރުކާރުން ނެގި ދަރަނީގެ ސަބަބުން ޤައުމީ އުފެއްދުންތެރިކަމުގެ ނިސްބަތުން 115.9 އިންސައްތައަށް ދަރަނި އުފުލިފައިވާ ކަމަށެވެ.

މީގެ އިތުރުން ފާއިތުވި 5 އަހަރު ދައުލަތުގެ ޚަރަދުތައް ފޫބެއްދުމުގެ ނަމުގައި 8 ބިލިއަނެއްހައި ރުފިޔާ ޗާޕުކޮށްފައިވާ ކަމަށާއި، އެއީ އޭގެ ކުރީގެ 40 އަހަރު ފައިސާ ޗާޕުކޮށްފައިވާ މިންވަރާ ނުބައްދަލު މިންވަރެއްކަމަށް ރައީސް ވިދާޅުވިއެވެ.

އޭގެ ނަތީޖާއެއްގެ ގޮތުން ދިވެހި ރުފިޔާގެ ހަމައަގު ހިފެހެއްޓުމުގައި މިވަނީ ބޮޑެތި ދަތިތަކަކާ ކުރިމަތިވެފައި: ރައީސް މުޢިއްޒު

އޭގެ އިތުރަށް ރައީސް ވިދާޅުވީ ދައުލަތުގެ ދަރަނި އަދާކުރަން ދުރާލާ ތައްޔާރުވުމުގެ ގޮތުން އުފައްދާފައިވާ ސޮވެރިން ޑިވެލޮޕްމެންޓު ފަންޑުގައި ހުރި ބޭރު ފައިސާވެސް ނަގައި މާރުކޮށްފައިވާ ކަމަށެވެ. އަދި މިހާރު އަލުން އެފަންޑަށް ޑޮލަރުން ފައިސާ ޖަމާކުރަން ފަށާފައިވާކަމަށް ރައީސް ވިދާޅުވިއެވެ.

އަޅުގަނޑުމެން ހަވާލުވި އިރު ސަރުކާރު ކުންފުނިތަކުގެ ދަރަނި އެހާ ބޮޑު. ލިބޭ އެއްޗަކުން ދެކޮޅު ޖެހޭ އޮތީ އެންމެ ދެތިން ކުންފުނި. ކުންފުނިތަކުގެ އިދާރީ ހިންގުމާ މުވައްޒަފުންނަށް ކުރާ ހޭދަވަނީ ރެކޯޑް އަދަދަކަށް އިތުރުވެފައި. އާމުދަނީ ހޯދަން ކުރާ އުފެއްދުންތެރި މަސައްކަތްތައް ކުންފުނިތަކުން ކުރުން ވަނީ މަދުވެފައި. އެކިއެކި ކަންކަމަށް ބަދަލުދިނުމުގެ ނަމުގައި ދައުލަތުގެ ޚަޒާނާއިން 1 ބިލިއަން ރުފިޔާގެ އަގުހުރި ހަރުމުދަލާ ފައިސާ އެކި ފަރާތްތަކަށް ބަހާލައިފައިވޭ. ދައުލަތުގެ ދަރަނި އަދާކުރަން ދުރާލާ ތައްޔާރުވާން އުފެއްދި ސޮވަރިންގ ޑިވެލޮޕްމަންޓް ފަންޑްގައި ހުރި ބޭރު ފައިސާ ވެސް ވަނީ ނަގައި މާރުކޮށްލާފައި. މިއީ އަދި، މިދިޔަ 11 ވަރަކަށް ހަފުތާ އަޅުގަނޑުމެން ކުރިމަތިލީ ގޮންޖެހުންތަކުގެ ކުޑަ މިންވަރެއް ރައީސް މުޢިއްޒު

ރައީސް އިތުރަށް ވިދާޅުވީ އެމަނިކުފާނު ވެރިކަމާ ހަވާލުވެވަޑައިގެން އެންމެ ފުރަތަމަ ކުރެއްވިކަމަކީ ޒިންމާދާރުކަމެއް ނެތި މަނިޓައިޒްކުރަމުންދިޔަ ދިއުން ނިމުމަކަށް ގެންނެެވުން ކަމަށެވެ. 31 ޑިސެންބަރު 2023 ވަނަ ދުވަހުން ފެށިގެން ފައިސާ ޗާޕުކުރުން ހުއްޓައިލާ، ދައުލަތުގެ ޚަރަދަށް ޒިންމާވުމުގެ ޤާނޫނުގައި ސަސްޕެންޑުކުރރެވުނު މާއްދާތައް އިއާދަކުރެއްވި ކަމަށެވެ.