ގޯއްޗާއި ފްލެޓް ދޫކުރުމުގައި އުސޫލުތަކާ ޚިލާފުވެފައިވޭތޯ ބެލުމަށް ސަރުކާރުން އިސްވެ ތަޙުޤީޤު ފަށައިފި
ގޯއްޗާއި ފްލެޓް ދޫކުރުމުގައި އުސޫލުތަކާ ޚިލާފުވެފައިވޭތޯ ބެލުމަށް ސަރުކާރުން އިސްވެ ތަޙުޤީޤު ފަށައިފިއެވެ.
މި މައްސަލަ ތަޙުޤީޤުކޮށް، ދަޢުވާކުރަން ފޮނުވަން ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް ދިވެހި ފުލުހުންގެ ޚިދުމަތާއި އެންޓި-ކޮރަޕްޝަން ކޮމިޝަން، އޭސީސީއަށް ވަނީ އަމުރުކުރައްވާފައެވެ.
ޕީޖީ އޮފީހުން ނެރުއްވި ބަޔާނެއްގައި ބުނީ ސަރުކާރުން އިޢުލާންކޮށްފައިވާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވުމުގެ ކަންބޮޑުވުން އެ އޮފީހުގެ ސަމާލުކަމަށް އައިސްފައިވާ ކަމަށެވެ. އަދި މިއީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ ފުރިހަމަ ޖިނާއީ ތަޙުޤީޤެއް ހިންގަންޖެހޭ ކަމެއްކަމަށް ޕްރޮސެކިއުޓަރ ޖެނެރަލް ދެކެވަޑައިގަންނަވާ ކަމަށްވެސް ބުނެފައިވެއެވެ.
މިސަބަބުތަކާހުރެ ޤާނޫނުއަސާސީގެ 223 ވަނަ މާއްދާގެ (ޅ) ގެ ދަށުން ޕްރޮސެކިއުޓަރ ޖެނެރަލަށް ލިބިވަޑައިގަންނަވާ ބާރުގެ ދަށުން، "ބިންވެރިޔާ" އަދި "ގެދޮރުވެރިޔާ" ސްކީމްގެ ފޯމު ބަލައިގަތުމާއި، ފްލެޓާއި ގޯތި ލިބޭ ފަރާތްތައް ކަނޑައެޅުމާއި، ގޯއްޗާއި ފްލެޓް ދޫކުރުމުގައި ޢަމަލުކޮށްފައިވާ ގޮތުގެ ތަހުގީގެއް ހިންގުމަށްފަހު، އެކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަހުގީގެއްކުރުމަށްފަހު ދަޢުވާކުރުމަށްޓަކައި އެއޮފީހަށް ހުށަހެޅުމަށް، ދިވެހި ފުލުހުންގެ ޚިދުމަތަށާއި އެންޓި ކޮރަޕްޝަން ކޮމިޝަނަށް ޕްރޮސެކިއުޓަރ ޖެނެރަލް އަލްއުސްތާޛް ޢައްބާސް ޝަރީފް އަމުރުކުރައްވާފައިވާކަމަށެވެ.
މީގެ އިތުރުން މި މައްސަލައިގެ ތަހުގީގު ހިނގަމުންދާ ގޮތް، ކޮންމެ ހަފްތާއަކު 1 ފަހަރު ޕްރޮސެކިއުޓަރ ޖެނެރަލާ ހިއްސާކުރަމުން ގެންދިއުމަށާއި، އެ މައްސަލައިގެ އަވަސް ތަހުގީގެއް ހިންގުމަށް ޕްރޮސެކިއުޓަރ ޖެނެރަލް ވަނީ އަމުރުކުރައްވާފައެވެ.
ޕްރޮސެކިއުޓަރ ޖެނެރަލް މިހެން އަމަރުކުރައްވާފައިވާއިރު ފުލުހުން ދަނީ ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް ގޯތިތަކެއް ދީފައިވާކަމަށް ތުހުމަތުކުރެވޭ މައްސަލައެއް ތަހުގީގުކުރައްވަމުންނެވެ. ފުލުހުން ވިދާޅުވެފައިވާ ގޮތުގައި ތަޙުޤީޤުކުރަމުންދަނީ ޑޮކިއުމަންޓުތަކެއް ފޯޖުކޮށްފައިވާ ކަމަށް ތުހުމަތު ކުރެވޭ މައްސަލައެކެވެ. މިއީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފެށި ތަޙުޤީޤެއް ކަމަށްވެސް ފުލުހުން ބުނެފައިވެއެވެ.
އަޅުގަނޑު މި އަމުރުމި ކުރީ، މިކަމުގައި ގިނަ ރައްޔިތުންތަކެއްގެ ކަންބޮޑުވުންތަކެއް ހުރިއިރު އެ ކަންބޮޑުވުންތަކަށް ޙައްލެއް ލިބޭނީ މިކަމުގެ ފުރިހަމަ އަދި އަވަސް ތަޙުޤީޤެއް ހިންގައި ފިޔަވަޅު އަޅަންޖެހޭ ބަޔަކާމެދު ފިޔަވަޅު އެޅިގެންކަމަށް ޤަބޫލުކުރެވޭތީ: ޕީޖީ އައްބާސް
މި މައްސަލައާ ގުޅިގެން އެޗްޑީސީގެ ބޯޑުގެ ޗެއަރމަން ފިޔަވައި އެހެން ހުރިހާ ބޯޑު މެންބަރުން ވަނީ ސަސްޕެންޑުކޮށްފައެވެ. މީގެ ތެރޭގައި އެ ކުންފުނީގެ މެނޭޖިން ޑިރެކްޓަރު އިބްރާހިމް ފަޟުލް ރަޝީދުވެސް ހިމެނިވަޑައިގަންނަވައެވެ. މީގެ އިތުރުން މި މައްސަލައިގައި ހިމެނޭ މުޙައްމަދު ފަޒީލް ރަޝީދުވެސް ވަނީ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރުގެ މަގާމުން މިހާރު ސަސްޕެންޑްކޮށްފައެވެ.
ސަރުކާރުގެ ކުންފުންޏަކާ ގުޅޭ ކޮރަޕްޝަންގެ ތުހުމަތު ކުރެވުމާއެކު ސަރުކާރުން އަމިއްލައަށް މައްސަލަ ތަޙުޤީޤު ކުރަންފެށުމުން ގިނަބައެއްގެ ތަރުޙީބު ރައީސް މުޢިއްޒުއަށް ދަނީ ލިބެމުންނެވެ. އަދި މިސަރުކާރުން ކޮރަޕްޝަނަށް ފުރުސތު ނުދެއްވާނެ ކަމުގެ ޔަޤީންކަން މިކަމުގެ ސަބަބުން ލިބިފައިވާކަމަށް ގިނަބަޔަކު ދަނީ ބުނަމުންނެވެ.
ސަރުކާރުން ވަނީ މީގެ ކުރިންވެސް އެފްއެސްއެމްއާއި ގުޅޭ ޚިޔާނާތުގެ މައްސަލައިގައި ކުންފުނީގެ އެމްޑީ ވަކިކޮށް އެކަމުގައި ބައިވެރިވި ފަރާތްތައް އެކަހެރިކޮށް މައްސަލަ ބަލަންފަށާފައެވެ. މިއީ ރައީސް މުޢިއްޒުގެ ވަޢުދުފުޅާއި އެއްގޮތަށް ކޮރަޕްޝަނަށް ޖާގަނުދީ ހިނގަމުންދާ ސަރުކާރެއްކަން ރައްޔިތުންނަށް މިވަނީ ސާބިތުކޮށްދީފައެވެ.