އިންތިޚާބުތަކާ ދިމާކޮށް ކަޑަޖަހާ އުސޫލުން ރަށްރަށުގައި ފަށާ ގާވެފައިހުރި މަޝްރޫޢުތައް އަލުން ފަށަނީ

އިންތިޚާބުތަކާ ދިމާކޮށް ކަޑަޖަހާ އުސޫލުން، ވޯޓު ހޯދަން ދަޅަދައްކާ އުސޫލުން، ޢުމްރާނީ ތަރައްޤީގެ މަސައްކަތްތަކެއް ރަށްރަށުގައި ފަށާފައި ގާވެފައި ހުރި މަޝްރޫޢުތައް ދިރާސާކޮށް އަލުން ފަށަމުންދާކަމަށް ރައީސުލް ޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.

މިދިޔަ ސަރުކާރުން ފަށާފައިވާ އެފަދަ ގިނަ މަސައްކަތްތައް ވަނީ ވަކި ހިސާބަކުން ހުއްޓިފައިކަން ފާހަގަކުރައްވާ ރިޔާސީ ބަޔާން އިއްވަމުން ރައީސް ވިދާޅުވީ އޭގެތެރެއިން މަގުހެދުން ނުވަތަ ނަރުދަމާގެ ޚިދުމަތްދޭން ކޮނުނު ތަންތަން އެގޮތަށް ހުންނަތާ އެތައް އަހަރެއްވެ، މަސައްކަތަށް ގެނައި އާލާތްތަކާ ތަކެތި ހަލާކުވެ، މުޅި ދަޢުލަތަށާއި، ރައްޔިތުންނަށް އެކަމުގެ ގެއްލުމާ ތުރާ ލިބެމުންދާ މަޝްރޫޢުތައް ގިނަ ކަމަށެވެ.

މިއާއިއެކު ރައީސް ވަނީ ރާއްޖޭގެ ހުރިހާ ރަށެއްގައި މި ގޮތަށް ގާވެފައި ހުރި މަޝްރޫޢުތައް ބަލައި، ރައްޔިތުން އެދޭގޮތަށް އެ މަޝްރޫޢުތައް އަލުން ހިންގައިދޭން މިހާރު ފަށަމުންދާކަމުގެ ޔަޤީންކަން ދެއްވާފައެވެ.

އިންތިޚާބުތަކާ ދިމާކޮށް ކަޑަޖަހާ އުސޫލުން، ވޯޓު ހޯދަން ދަޅަދައްކާ އުސޫލުން، ޢުމްރާނީ ތަރައްޤީގެ މަސައްކަތްތަކެއް ރަށްރަށުގައި ފަށާފައި ހުރިކަން ފާހަގަކުރެވޭ. އެފަދަ ގިނަ މަސައްކަތްތައް ވަނީ ވަކި ހިސާބަކުން ހުއްޓިފައި. މަގުހަދަން ނޫނީ ނަރުދަމާގެ ޚިދުމަތްދޭން ކޮނުނު ތަންތަން އެގޮތަށް ހުންނަތާ އެތައް އަހަރެއްވެ، މަސައްކަތަށް ގެނައި އާލާތްތަކާ ތަކެތި ހަލާކުވެ، މުޅި ދައުލަތަށާ ރައްޔިތުންނަށް އެކަމުގެ ގެއްލުމާ ތުރާ ލިބެމުންދާ މަޝްރޫޢުތައް މަދެއްނޫން. ރާއްޖޭގެ ހުރިހާ ރަށެއްގައި މި ގޮތަށް ގާވެފައި ހުރި މަޝްރޫޢުތައް ބަލައި، ރައްޔިތުން އެދޭގޮތަށް އެ މަޝްރޫޢުތައް އަލުން ހިންގައިދޭން މިހާރު މި ދަނީ ފަށަމުން. މިފަދަ އެތައް މަސައްކަތެއް ރަށްރަށުގައި ކުރަން އެބަހުރި: ރައީސް މުޢިއްޒު

ފެނުގެ ޚިދުމަތް ރަނގަޅަށް ދެވޭގޮތަށް އޮތީ 66 ރަށް ކަމަށާއި،ނަރުދަމާގެ ޚިދުމަތް ރަނގަޅަށް ޤާއިމުވެފައި އޮތީ 101 ރަށުގައި ކަމަށް ރައީސް ވިދާޅުވިއެވެ. އަދި ބާކީ ހުރި ހުރިހާ ރަށެއްގައި ފެނާ ނަރުދަމާގެ ޚިދުމަތް މި ދައުރުގައި ނިންމައިދެއްވާނެ ކަމަށްވެސް ރައީސް ވަނީ ވިދާޅުވެފައެވެ.

މީގެ އިތުރުން ހުރިހާ ރަށެއްގައި ބަނދަރު ހަދައި ނިންމައި ސަރުކާރުގެ ވަޢުދާއި އެއްގޮތަށް ހުރިހާ ސިޓީތަކެއްގެ ހުރިހާ މަގެއް ރަނގަޅު ފެންވަރަށް ހަދައިދެއްވާނެ ކަމުގެ ފުރިހަމަ ޔަޤީންކަން ރައީސް ދެއްވިއެވެ.

ވެރިކަންކުރާ މާލޭގެ މަގުތައް ރަނގަޅު ފެންވަރުގައި ހެދުމުގެ މަސައްކަތް މި އަހަރު ފެށިގެންދާނެ ކަމަށާއި، މި މަޝްރޫޢަށް ހިނގާނެ ޚަރަދުގެ ބޮޑުބައި ޗައިނާގެ ހިލޭއެހީގެ ދަށުން ހަމަޖެހިގެންދާނެ ކަމަށްވެސް ރައީސް ވިދާޅުވިއެވެ.

މީގެއިތުރުން ހުރިހާ ރަށެއްގެ ކަރަންޓު ޚިދުމަތުގެ ފެންވަރު ރަނގަޅުކޮށްދީ ގޭބިސީތަކުން ކަރަންޓު ބިލަށްކުރާ ޚަރަދު ކުޑަކޮށް، އިއާދަކުރަނިވި ވަސީލަތްތައް ބޭނުންކޮށްގެން ކަރަންޓު އުފެއްދުމުގައި ރައްޔިތުންގެ ބައިވެރިވުން އިތުރުކޮށް، އޭގެ އިޖުތިމާޢީ އަދި އިޤްތިޞާދި މަންފާ އެންމެހައި ރައްޔިތުންނަށް ފަހިކޮށްދިނުމަށް  އަމާޒުކޮށްގެން "މަގޭ ސޯލާ" ގެ ނަމުގައި ޕްރޮގްރާމެއް ހަފުތާ 14ގެ ތެރޭން ފަށާފައިވާކަން ރައީސް ފާހަގަކުރެއްވިއެވެ.

އަދި މި ނޫނަސް، ކޮންމެ ރަށެއްގައި އެ ރަށަކާ އެކަށޭނަ ކަސްރަތުކުރާ ތަނަކާ، ޕާކުތަކާއި، ކުޅިވަރުކުޅޭ ތަންތަނާ، ޒުވާނުންގެ މަރުކަޒުތައް ޤާއިމުކުރާނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ އިޤްތިޞާދު ރަނގަޅުވެ، ދަޢުލަތަށް އާމުދަނީ ވަންނަމުން، އިތުރުވަމުން ދިޔަ ވަރަކަށް، ކަނޑައެޅޭ ވަކި ތަރުތީބަކުން ތަރައްޤީގެ މިހުރިހާ މަޝްރޫޢެއްގެ ފޮނިމީރުކަން މީހުން ދިރިއުޅޭ ހުރިހާ ރަށަކާ ހަމަޔަށް ހަމަހަމަކަމާއެކު ގެންދަވާނެ ކަމަށެވެ.