އެއްވެސް ނުފޫޒެއް ފޯރުވައިގެން މިސަރުކާރުން ރައްޔިތެއްގެ ޙައްޤަކަށް އަރައިނުގަންނާނެ: ރައީސް
އެއްވެސް ނުފޫޒެއް ފޯރުވައިގެން މިސަރުކާރުން ރައްޔިތެއްގެ ޙައްޤަށް އަރައިނުގަންނާނެ ކަމުގެ ޔަޤީންކަން ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ޢާންމުންގެ ސުވާލުތަކަށް މީސްމީޑިއާގައި ސީދާ ރައީސުލްޖުމްހޫރިއްޔާ ޖަވާބުދެއްވުމުގެ ގޮތުން، ރައީސުލްޖުމްހޫރިއްޔާގެ އޮފީހުން ކުރިއަށް ގެންދަވާ ސިލްސިލާ "ރައީސްގެ ޖަވާބު" ގައި ވާހަކަފުޅު ދައްކަވަމުންނެވެ.
ރައީސް މިއަދު ޖަވާބު ދެއްވާފައިވަނީ ހުޅުމާލެ، ފްލެޓް 104، ފާޠިމަތު އާދަމް، ސަރުކާރުންދޭ ފްލެޓް ބަހާ ގޮތާއިމެދު ފެތުރޭ ބައެއް ވާހަކަތަކުގެ ޙަޤީޤަތް ހޯއްދެވުމަށް ކުރެއްވި ސުވާލަކަށެވެ.
ފާތިމަތު އާދަމް ކުރެއްވި ސުވާލަކީ ހަމަ ވަރަށް ގިނަ މީހުންގެ ހިތުގަ ޝައްކު އުފައްދަން މިހާރު އެކި މީހުން ކުރާ މަސައްކަތުން އުފެދިފަވާ ސުވާލެއްކަން ފާހަގަ ކުރައްވާ ރައީސް ވަނީ އެމަނިކުފާނު ވިޔަސް އަދި އެމަނިކުފާނުގެ ޢާއިލާވިޔަސް އަދި އެހެން ފަރާތަކުންވެސް އެއްވެސް ރައްޔިތެއްގެ ޙައްޤަކަށް އަރައިނުގަންނާނެ ކަމަށާއި، އެފަދަ ނުފޫޒެއްވެސް ނުފޯރުވާނެ ކަމަށް ވިދާޅުވެފައެވެ.
އަޅުގަނޑު ދޭން ބޭނުންވާ ޔަޤީންކަމަކީ، އަޅުގަނޑަށް އަދި އަޅުގަނޑުގެ އަންހެނުން ވިޔަސް އަދި އަޅުގަނޑުގެ ރައްޓެއްސެއް ވިޔަސް، ސަރުކާރުގެ މަޤާމެއްގަ ހުރި މީހެއްވިޔަސް އަދި އެއްވެސް ކަހަލަ ނުފޫޒެއް އެއްވެސް ދިމާލަކުން ފޯރުވައިގެނެއް މިސަރުކާރުން އެއްވެސް ރައްޔިތެއްގެ ޙައްޤަކަށް ނާރާނެ. އެއީ ގެދޮރުވެރި ކަމުގެ ފްލެޓެއް ވިޔަސް، އަދި އެހެންކަހަލަ ޙައްޤެއް ކަމަކަށް ވިޔަސް، އެއްވެސް މީހެއް މަޙުރޫމު ކުރުމަކަށް ކަމެއް ނުކުރާނެ: ރައީސް މުޢިއްޒު
އެފަދަ ކަމެއް ކުރުމަށް ޖާގަ އެއްވެސް ނުދެއްވާނެ ކަމަށާއި، ފްލެޓް ލިސްޓް ވިޔަސް، ގޯތި ލިސްޓް ވިޔަސް، އަދި އެހެން އެއްވެސް ޕްރޮގްރާމެއްގެ ތެރެއިން ހަމަޖެހޭ ކަމެއް ވިޔަސް އެކަން ކުރިޔަށް ދާނީ އިންސާފުވެރިކަމާ އެކީގައި ހަމަހަމަ ކަމާ އެކީގައި ދެފުށް ފެންނަ ގޮތަށް. ކަމަށް ރައީސް ވިދާޅުވިއެވެ. އަދި އެއިން އެއްވެސް ކަމަކަށް އެއްވެސް ފަރާތެއްގެ ނުފޫޒެއް ފޯރުވުމަކީ ޖާގަ ދޭނެ ކަމެއްނޫން ކަމަށާއި، އެކަހަލަ ކަމެއް ހިންގާ މީހެއްގެ މަޢުލޫމާތު ލިބިއްޖެނަމަ އެކަމަށް އެމަނިކުފާނު އިސްވެ ފިޔަވަޅުވެސް އަޅުއްވާނެ ކަމަށް ރައީސް ވިދާޅުވިއެވެ.
އެހެންވީމަ ޔަޤީން ކުރަންވީ ކަމަކީ އެއިން އެއްވެސް ކަމަކަށް އެއްވެސް ފަރާތެއްގެ ނުފޫޒެއް ފޯރުވުމަކީ އަޅުގަނޑު ޖާގަ ދޭނެ ކަމެއްނޫން. އަދި އެކަހަލަ ކަމެއް ހިންގާ މީހެއްގެ މަޢުލޫމާތު ލިބިއްޖެއްޔާ އެކަމަށް ފިޔަވަޅުވެސް އިސްވެ އަޅުގަނޑު އަޅާނަން:ރައީސް
އެހެންކަމުން މިހާރު ނެރޭ ލިސްޓާއި ބެހޭގޮތުން ނުވަތަ އެއްވެސް އެކަހަލަ މަޢުލޫމާތަކާ ގުޅޭގޮތުން އެ ދައްކާ ވާހަކަ ތަކަކީ އެއްގޮތަކައްވެސް ޙަޤީޤަތެއް އެކުލެވޭ ކަމެއްނޫން ކަމަށްވެސް ރައީސް ވިދާޅުވިއެވެ.
މިއާއިއެކު ރައީސް ވިދާޅުވީ އެފަދަ ކަންކަމަކީ ސަރުކާރާ މެދުގަ ޙަޤީޤަތެއް ނެތް، ދޮގު ވާހަކަ ތަކެއް ފަތުރައިގެން ،ފިތުނަ އުފެއްދުމަށް ދައްކާ ވާހަކަ ތަކެއް ކަމަށެވެ.
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.