މި ދައުރުގެ ތެރޭގައި ތ. އަތޮޅަށް ގިނަ ރިސޯޓުތަކެއް ގެންނާނަން: ރައީސް

ތ. އަތޮޅުގެ ޓޫރިޒަމް ކުރިއެރުވުމަށްޓަކާ ކުރެވޭ މަސައްކަތްތަކުން ތ. އަތޮޅަށް ގިނަ ރިސޯޓުތަކެއް މި ދައުރުގެ ތެރޭގަ ގެނެސްދެއްްވާނެ ކަމުގެ ޔަޤީންކަން ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ރައީސުލްޖުމްހޫރިއްޔާ އެ ޔަޤީންކަން ދެއްވީ ޢާންމުންގެ ސުވާލުތަކަށް މީސްމީޑިއާގައި ސީދާ ރައީސުލްޖުމްހޫރިއްޔާ ޖަވާބުދެއްވުމުގެ ގޮތުން، ރައީސުލްޖުމްހޫރިއްޔާގެ އޮފީހުން ކުރިއަށް ގެންދަވާ ސިލްސިލާ "ރައީސްގެ ޖަވާބު" ގައި ވާހަކަފުޅު ދައްކަވަމުންނެވެ.

މި ދައުރުގައި ތ.އަތޮޅަށް ޓޫރިޒަމް ފުޅާވެ ރިސޯޓްތައް އިތުރުވާނެތޯ ތ.ވޭމަންޑޫ، ދޫނިގޭ، އާދަމް ރިފާޒް، ދެންނެވި ސުވާލަށް ޖަވާބު ދެއްވަމުން ރައީސް ވިދާޅުވީ ޒުވާނަކު އެފަދަ ސުވާލެއް ކޮށްލުމަކީ ވަރަށް އުފާކުރައްވާ ކަމެއް ކަމަށާއި، ސަރުކާރުން ޒުވާނުންނަށް އަދި ޖުމްލަކޮށް ދިވެހި ރައްޔިތުންނަށް އާމްދަނީ ހޯދޭނެ ގޮތްތައް ފަހިކޮށްދެއްވުމަށް ވަރަށް ބޮޑު  އިސްކަމެއް ދެއްވާކަމަށެވެ.

އަދި ރާއްޖޭގެ އެންމެ ބޮޑު އިންޑަސްޓްރީ ( ޓޫރިޒަމް އިންޑަސްޓްރީއިން) އެކަން ކޮށްދެއްވުމުގައި ވަރަށް އިސްކަމެއް ދެއްވާކަމަށް ރައީސް ވިދާޅުވިއެވެ.މިއާއިއެކު ރައީސް ވިދާޅުވީ މި ދައުރުގެ ތެރޭގައި ތ. އަތޮޅަށް ގިނަ ރިސޯޓުތަކެއް ގެނެސްދެއްވާނެ ކަމުގެ ޔަޤީންކަން އޮތްކަމަށެވެ.

ރާއްޖޭގެ އެންމެ ބޮޑު އިންޑަސްޓްރީ ( ޓޫރިޒަމް އިންޑަސްޓްރީއިން) އެކަން ކޮށްދިނުމުގަ ވަރަށް އިސްކަމެއް ދެން. ތ އަތޮޅުގަ އޮތީ އެންމެ ރިސޯޓެއް. މި މަސައްކަތްކުރަނީ އިރާދަކުރެއްވިއްޔާ ހަމަ މި އަތޮޅަށް ގިނަ ރިސޯޓުތަކެއް އަޅުގަނޑުމެންގެ މި ދައުރުގެ ތެރޭގަ ގެންނާނަން އިރާދަކުރެއްވިއްޔާ ވަރަށް ޔަޤީންކަން އެބައޮތް އިނގޭތޯ: ރައީސް މުޢިއްޒު

ރައީސް ވިދާޅުވީ ތ. އަތޮޅަށް އިތުރު 2 އެއާޕޯޓު އިތުރު ކުރައްވާނެ ކަމަށާއި، މުޅި އިޤްތިޞާދަށް ގެންނަވަން މަސައްކަތްކުރާ ކުރިއެރުމުގެ ސަބަބުން އިންވެސްޓަރުން ރާއްޖެ އަންނަލެއް ގިނަވެގެން ދާނެކަމަށެވެ.

އެއްކަމަކަށް އެއާޕޯޓު އިތުރުކުރުން. ގުރައިދޫގަ 1 އެއާޕޯޓު އަދި ވިލުފުށީގަ 1 އެއާޕޯޓު އިރާދަކުރެއްވިއްޔާ ހެދިގެން ދާނެ. އޭރުން 3 އެއާޕޯޓް އައުމުން ކަނެކްޓިވިޓީ އިތުރުވެގެންއެބަދޭ. ދެން މުޅި އިޤްތިޞާދަށް މި ގެންނަން މަސައްކަތްކުރާ ކުރިއެރުމުގެ ސަބަބުން އިންވެސްޓަރުން ރާއްޖެ އަންނަލެއް ގިނަވާނެ: ރައީސް މުޢިއްޒު

މީގެއިތުރުން ވެލާނާ އިންޓަރނޭޝަނަލް އެއާޕޯޓު ވަރަށް އަވަހަށް ފުޅާކޮށް ތަރައްޤީ ކުރުމުގެ މަސައްކަތް ކުރިއަށް ގެންދިއުމުގެ މަސައްކަތްވެސް ފެށިފައިވާއިރު އެ މަސައްކަތާއިއެކުވެސް ޓްއަރިސްޓުން އަންނަލެއް ގިނަވާނެ ކަމަށް ރައީސް ވިދާޅުވިއެވެ.

ރައީސް އިތުރަށް ވިދާޅުވީ ތ. އަތޮޅުގައި ރިސޯޓު އިތުރު ކުރުމުގެ މަސައްކަތް 5 އަހަރު ތެރެއަށް ބަހާލައިގެން ކުރިއަށް ގެންގޮސްދެއްވާނެ ކަމަށެވެ. އަދި ރަށުގައި ތިބެގެން ކައިރި ރިސޯޓަކަށް ގޮސްގެން އާމްދަނީ ލިބޭނެ ވަޒީފާ އަދާކުރެވޭނެ ފުރުޞަތު ޒުވާނުންނަށް ހޯއްދަވައި ދެއްވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.

މި އަތޮޅަށް އިރާދަކުރެއްވިއްޔާ ވަރަށް ޔަޤީން މިއަހަރުވެސް ފެށޭވަރުވާނެ، އަދި މި 5 އަހަރު ތެރެއަށް ބަހާލައިގެން ގިނަ ރިސޯޓުތަކެއް މުޅި އަތޮޅުގެ އެކި ހިސާބަށް އެކި ދާއިރާތައް ކަވަރު ވާގޮތަށް ގެނެސްދޭނަން. އިފާޒް ފަދަ ޒުވާނުންނަށް ރަށުގައި ތިބެގެން ކައިރި ރިސޯޓަކަށް ގޮސްގެން އާމްދަނީ ލިބޭނެ ވަޒީފާ އަދާކުރެވޭނެ ފުރުޞަތު ހޯދަދޭނަން އިރާދަކުރެއްވިއްޔާ. ވަރަށް އަވަހަށް އެކަން ފެނިގެންދާނެ: ރައީސް މުޢިއްޒު

ރައީސް މުޢިއްޒުގެ ވިސްނުންފުޅަކީ އެހެނިހެން އަތޮޅުތަކުގައިވެސް ޒުވާނުންނަށާއި، ދިވެހި ރައްޔިތުންނަށް ރިސޯޓުގަ ތިބެގެން ވަޒީފާ އަދާކޮށްފައި،ކައިރީގަ ހުންނަ އޭނާގެ އަމިއްލަ ރަށަށް ފަސޭހައިން ދެވޭ ކަހަލަ ގޮތަކަށް އެކި ހިސާބުތަކަށް ރިސޯޓުތައް އިތުރުކުރުން ކަމަށް ރައީސް ވިދާޅުވިއެވެ.