ކިޔެވުން ނިންމައި ވަޒީފާއަށް ނުކުންނަ ޒުވާނުން ރަށުގައިތިބެ ވަޒީފާ އަދާކުރާނެ ފުރުޞަތު ފަހިކޮށްދޭނަން: ރައީސް
ކިޔެވުން ނިންމައި ވަޒީފާއަށް ނުކުންނަ ޒުވާނުން ރަށުގައިތިބެ ވަޒީފާ އަދާކުރާނެ ފުރުޞަތު ފަހިކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ޢާންމުންގެ ސުވާލުތަކަށް މީސްމީޑިއާގައި ސީދާ ރައީސުލްޖުމްހޫރިއްޔާ ޖަވާބުދެއްވުމުގެ ގޮތުން، ރައީސުލްޖުމްހޫރިއްޔާގެ އޮފީހުން ކުރިއަށް ގެންދަވާ ސިލްސިލާ "ރައީސްގެ ޖަވާބު" ގައި ވާހަކަފުޅު ދައްކަވަމުންނެވެ.
ކިޔެވުން ނިންމައި ވަޒީފާއަށް ނުކުންނަ ކުދީންނަށް ރަށުގައި ތިބެ ވަޒީފާ އަދާކުރާނެ ފުރުޞަތު ފަހިކޮށްދެއްވޭނެތޯ ތ.ކިނބިދޫ، އުފާ، ޢާއިޝަތު ރައުނާ މުޙައްމަދު، ދެންނެވި ސުވާލަށް، ރައީސުލްޖުމްހޫރިއްޔާ ދެއްވި ޖަވާބުގައި ވިދާޅުވީ ޚާއްޞަކޮށް ޒުވާންކުދިންނަށް މާލެނުގޮސް އަތޮޅުގައި ނުވަތަ ރަށުގައި ތިބެގެން ވަޒީފާގެ ފުރުޞަތު ހޯދައިދެއްވަން ބޭނުންފުޅުވާކަމަށެވެ.
އެގޮތުންބަލާއިރު ތ. އަތޮޅަކީ ވަޒީފާގެ ފުރުޞަތުތައް ނިސްބަތުން ވަރަށް ކުޑަ އަތޮޅެއްކަން ފާހަގަކުރައްވާ ރައީސް ވިދާޅުވީ ވަޒީފާ ލިބޭނީ އިންޑަސްޓްރީތައް ގެނެވި، ރިސޯޓުތައް ގެނެވި، ޓްއަރިޒަމް ފުޅާކުރެވި، މީގެ އިތުރުން މަސްވެރިކަމުގެ އެކިކަހަލަ ފުރުޞަތުތައް ލިބި، ކްރިއޭޓިވް އިކޮނޮމީ ޤާއިމް ކުރެވިގެން ކަމަށެވެ.
އެހެންކަމުން ކްރިއޭޓިވް އިކޮނޮމީ ޤާއިމްކުރަން ސަރުކާރުން މަސައްކަތް ކުރަމުންދާކަމަށާއި، އޭރުން އެކުއްޖެއްގެ ހުނަރު އޮންލައިން ވިޔަފާރީގެ ނިޒާމުގެ ތެރެއިން ބޭރުގެ މާކެޓްތަކަށް ފުޅާކުރުމުގެ ފުރުޞަތުތައް ލިބިގެންދާނެ ކަމަށް ރައީސް ވިދާޅުވިއެވެ.
ޒުވާންކުދިންނަށް ޚާއްޞަކޮށް މާލެނުގޮސް އަތޮޅުގަ /ރަށުގަ ތިބެގެން ވަޒީފާގެ ފުރުޞަތު ހޯދައިދޭން ބޭނުން. ތ. މި އަތޮޅަކީ ވަޒީފާގެ ފުރުޞަތު ނިސްބަތުން ވަރަށް ކުޑަ އަތޮޅެއް. އެންމެ ރިސޯޓެއް އޮތީވެސް. ވަޒީފާ ލިބޭނީ އިންޑަސްޓްރީތައް މިތަނަށް ގެނެވިގެން، ޓްއަރިޒަމް ފުޅާކުރެވިގެން، ރިސޯޓުތައް ގެނެވި ،ނޫނީ މަސްވެރިކަމުގެ އެކިކަހަލަ ފުރުޞަތުތައް ލިބިގެން، ނޫނީ ޒުވާންކުދިންނަށް ވެއްޖިއްޔާ ބޭނުންވާނެ ކްރިއޭޓިވް އެކިކަހަލަ ފުރުޞަތުތައް ހޯދައިދޭންވެސް، އެއްކަމަކީ ކޮންމެ ތާކުހުރެގެންވެސް ކްރިއޭޓިވް އިކޮނޮމީ ޤާއިމްކުރަން މަސައްކަތް މިކުރަނީ، އޭރުން އެކުއްޖެއްގެ ޓެލެންޓް ބޭރުގެ މާކެޓްތަކަށްވެސް އޮންލައިން ވިޔަފާރީގެ ތެރެއިން ޕޭމަންޓް ގޭޓްވޭ ނިޒާމުގެ ތެރެއިން އެކި ކަހަލަ ޓެލެންޓް ހުންނަކުދިން މިތިބެނީ، އެހެންވީމަ އެ ހުންނަތަން މެޓާއެއް ނުވާނެ އޭރަކުންނެއް، އެހެންވީމަ އެކަހަލަ ފުރުޞަތުތައް ހޯދައިދޭންވެސް މަސައްކަތް އެބަ ކުރަން : ރައީސް މުޢިއްޒު
މީގެ އިތުރުން ރައީސް މުޢިއްޒުގެ ވިސްނުންފުޅަކީ ޢަމަލީގޮތުން ކޮންމެވެސްކަހަލަ މަސައްކަތެއް ކުރަންބޭނުންވާ ޒުވާން ކުދިންނަށްވެސް އަތޮޅު ތެރޭގައި މަސައްކަތްކުރުމުގެ ފުރުޞަތު ހޯދައިދިނުމުގެ ގޮތުން އިޤްތިޞާދު ފުޅާކޮށްދީ، އިޤްތިޞާދީ ފުރުޞަތުތައް ފުޅާކޮށްދެއްވުންކަމަށް ރައީސް ވިދާޅުވިއެވެ.
އޭގެ އިތުރުން ޢަމަލީގޮތުން ކޮންމެވެސްކަހަލަ މަސައްކަތެއް ކުރަންބޭނުންވާ ޒުވާން ކުދިންނަށްވެސް އަތޮޅު ތެރޭގައި މަސައްކަތްކުރުމުގެ ފުރުޞަތު ހޯދައިދޭން އިޤްތިޞާދު ފުޅާކޮށްދީ، އިޤްތިޞާދީ ފުރުޞަތުތައް ފުޅާކޮށްދޭން، އަޅުގަނޑު ވިސްނާފައި މިއޮތީ : ރައީސް މުޢިއްޒު
ރައީސް ވިދާޅުވީ ތ. އަތޮޅަށް ރިސޯޓުތައް ގެނައުމާއި އަދި،އެކިކަހަލަ ފުރުޞަތުތައް ފުޅާކުރަން ވަރަށްބޮޑަށް ސަމާލުކަން ދެއްވާނެކަމަށެވެ.
މިދިޔަ ދުވަސްތަކުގައި ތ. އަތޮޅުގައި އެފަދަ ފުރުޞަތުތައް ފަހިވެފައި ނެތްކަން ފާހަގަކުރައްވާ ރައީސް ދެއްވި ޔަޤީންކަމަކީ ކިޔެވުން ނިންމައި ވަޒީފާއަށް ނުކުންނަ ޒުވާނުން ރަށުގައިތިބެ ވަޒީފާ އަދާކުރާނެ ފުރުޞަތު ފަހިކޮށްދެއްވާނެ ކަމަށާއި، ނަތީޖާ ނެރެދެއްވާނެ ކަމަށެވެ.
މިދިޔަ ހުރިހާދުވަހަކު މި އަތޮޅަކު ނެތް އެ އޮޕޮޗުނިޓީތައް ލިބިފައެއް، އެހެންވީމަ ރައުނާއަށް އަޅުގަނޑު ދަންނަވަން ބޭނުންވަނީ އުންމީދުކުރާށޭ އިރާދަކުރެއްވިއްޔާ ނަތީޖާ އަޅުގަނޑު ނެރެދޭނަމޭ : ރައީސް މުޢިއްޒު