އަލިރަސްގެފާނުގެ ޖިހާދު އަދުގެ ސިޔާސީ ފަރާތްތަކާ މުޚާޠަބުކޮށް ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލާ: ރައީސް
ޝަހީދު އަލިރަސްގެފާނުގެ ޖިހާދު އަދުގެ ސިޔާސީ ފަރާތްތަކާ މުޚާޠަބުކޮށް ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލާ ކަމަށް ޝަހީދުންގެ ދުވަހު ރައީސުލް ޖުމްހޫރިއްޔާ ދެއްވި ޚިޠާބުގައި ވިދާޅުވެއްޖެއެވެ.
ރައީސް ޑރ، މުޢިއްޒުގެ އަސަރުން ފުރިގެންވި ޚިޠާބުގައި ޝަހީދުންގެ ދުވަހުގެ މުހިންމު މަޢުލޫމާތުތަކާއި އެ ހާދިސާއިން ޙާޞިލް ކުރަންވީ ޢިބްރަތްތައް ވަރަށް ފުރިހަމައަށް ކިޔައި ދެއްވިއެވެ.
މިއަދުގެ ޚިޠާބުގައި އެންމެ ގިނަބައެއްގެ ސަމާލުކަން ހުއްޓިގެން ދިޔައީ އަލިރަސްގެފާނުގެ ޖިހާދު އަދުގެ ސިޔާސީ ފަރާތްތަކާ އެބަ މުޚާޠަބުކުރެ އޭ ރައީސް ވިދާޅުވުމުންނެވެ. ރައީސް ވިދާޅުވީ މާނަފުން ބަސްކޮޅެކެވެ. ސިޔާސީ ފަރާތްތަކަށް ދެއްވި ވަރުގަދަ މެސެޖެކެވެ. ޤައުމިއްޔަތުގެ މުހިންމު ކަމެވެ. އަދި އެހެން ޤައުމެއްގެ ކުރިމަތީގައި ދިވެހިން ކުޑަކަކޫ ޖަހަން ނުޖެހޭނެ ކަމެވެ.
މިއާއިއެކު ދިވެހި މީޑިއާތަކަށްވެސް އެ ދެއްވީ އަގުހުރި ނަޞޭޙަތެކެވެ. ޚަބަރު ފެތުރުމުގައިވެސް ޤައުމިއްޔަތު އިސްކުރުމުގެ މުހިންމުކަމެވެ. ޒުވާނުންނަށް ހަނދާންކޮސްދެއްވީ ޤައުމީ ޖިހާދުން ފިލާވަޅު ލިބިގަންނާންވީ ގޮތެވެ. ޒުވާންކަމުގެ އޮއިވަރުގައި އަމިއްލަ ދީނާއި އަމިއްލަ ޤައުމު ފަހަނައަޅައި ނުދިއުމަށެވެ.
އަލިރަސްގެފާނުގެ ޖިހާދު އަދުގެ ސިޔާސީ ފަރާތްތަކާ އެބަ މުޚާޠަބުކުރޭ. ބޭރުގެ ދަހިވެތި ބާރުތަކުގެ ފައިބުޑަށް ތިރިނުވާން އެބަ ގޮވާލާ. ދިވެހީންގެ ސަލާމަތް ދިވެހީން ހޯދަން އެބަ ގޮވާލާ. އަލިރަސްގެފާނުގެ ޖިހާދު މީޑިޔާއާ އެބަ މުޚާޠަބުކުރޭ. ޚަބަރު ފަތުރާ އިރު ޤައުމާ އެއްކޮޅަށް ޚަބަރުތައް ގެންނަން އެބަ ނަސޭހަތްދޭ. ދޮގު ޚަބަރުތައް ނުފަތުރަން އެބަ އިންޒާރުދޭ. އަލިރަސްގެފާނުގެ ޖިހާދު ދިވެހި ޒުވާނުންނާ އެބަ މުޚާޠަބުކުރޭ. ޒުވާންކަމުގެ އޮއިވަރުގައި އަމިއްލަ ދީނާއި އަމިއްލަ ޤައުމު ފަހަނައަޅައި ނުދާން އެބަ ނަސޭހަތްތެރިވޭ: ރައީސް މުޢިއްޒު
ރައީސްގެ ޚިޠާބުގައި ވިދާޅުވީ އަލިރަސްގެފާނުގެ ޖިހާދު އަދުގެ ދިވެހީންނަށް ދޭ އެންމެ ބޮޑު އެއްފިލާވަޅަކީ މާތް ﷲ ޙައްޤަށް ނަޞްރުދެއްވާނެކަމާއި، އެއީ ބިމުގެ ކުޑަ ކަމަކާ އާބާދީގެ މަދުކަމަކާ ގުޅިފައި އޮންނަ ކަމެއް ނޫންކަމެވެ.
ޝަހީދު އަލިރަސްގެފާނުގެ ހިތްވަރުފުޅަށް ތަޢުރީފުކުރައްވާ ރައީސް ވިދާޅުވީ އަމިއްލަ ފުރާނަފުޅަށް ވުރެ ބޮޑަށް އަލިރަސްގެފާނުގެ އިސްކުރެއްވީ އިސްލާމް ދީން ކަމަށެވެ. އެއާއިއެކު ޤައުމަށް ތެދުވެރިވުމާއި، ދަޢުލަތަށް ވަފާތެރިވުމާއި ރައްޔިތުން ސަލާމަތްކުރެއްވުން އަލިރަސްގެފާނަށް މާ މުހިންމުވިކަން ރައީސް މުޢިއްޒު ފާހަގަކުރެއްވިއެވެ.