އުނގޫފާރު ބިން ހިއްކާނީ ވަޢުދާއި އެއްގޮތަށް އިތުރު 3 ހެކްޓަރު އިތުރުކޮށްގެން: ރައީސް

ރ. އުނގޫފާރުގެ ބިން ހިއްކުމުގެ މަސައްކަތް ކުރިއަށް ގެންދިއުމަށް ސަރުކާރުން ނިންމާފައިވަނީ ވަޢުދުވެވަޑައިގެންނެވި ފަދައިން އިތުރު 3 ހެކްޓަރު އިތުރުކޮށްގެން ކަމަށް ރައީސުލް ޖުމްހޫރިއްޔާ ޑރ. މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ރ.އުނގޫފާރު، ދުލިހުރާގޭ، އަޙްމަދު ޝިޔާމް، އެރަށު ބިންހިއްކުމުގެ ކަންކަމުގައި ރައްޔިތުންގެ ހުރި ކަންބޮޑުވުންތަކާމެދު ދެންނެވި ސުވާލަށް ޖަވާބު ދެއްވަމުންނެވެ.

އަޅުގަނޑު އުނގޫފާރު ރައްޔިތުންނަށް އަދި ޝިޔާމްއަށްވެސް ދަންނަވާލަން ބޭނުންވާ ވާހަކައަކީ އަޅުގަނޑު ވީ ވައުދެއްވިއްޔާ ހަމަ ވަޢުދުވީގޮތަށް އެކަން ކޮށްދޭނަން: ރައީސް މުޢިއްޒު

އުނގޫފާރަށް ވީ ވަޢުދުފުޅަކީ ހިއްކެން އޮތް އެންމެ ބޮޑަކަށް ބިން ހިއްކައިދެއްވުން ކަން ފާހަގަކުރައްވާ ރައީސް ވިދާޅުވީ މިހާރު އޮތް ސްކޯޕްއަށް އިތުރު 3 ހެކްޓަރު އިތުރު ކުރައްވާނެ ކަމަށާއި، އޭގެ ސަބަބުން ރަށުގެ ރައްޔިތުން ކަންބޮޑުވާ މައްސަލައަށް ހައްލެއްލިބި ފަޅުތެރެއިން ހިއްކަންއޮތް އެންމެ ބޮޑަކަށް ހިއްކިގެންދާނެކަމަށެވެ. މިއާއިއެކު ރައީސް މުޢިއްޒު ދެއްވި ޔަޤީން ކަމަކީ އެމަނިކުފާނު ވަޢުދުވެވަޑައިގެންނެވި ފަދައިން އެ މަސައްކަތް ކުރައްވާނެ ކަމަށެވެ.

ވަޢުދުވިން ހިއްކެން އޮތް އެންމެ ބޮޑަކަށް ހިއްކަދޭނެކަމަށް. މިހާރު ސްކޯޕްގައި އޮތްވަރަށް އަދި އިތުރު 3 ހެކްޓަރު އިތުރުކޮށްގެން ހިއްކީމަ ރަށުރައްޔިތުން ކަންބޮޑުވާ މައްސަލައިގައި 3 ހެކްޓަރު އިތުރުވީމަ ފަޅުތެރެއިން ހިއްކަންއޮތް އެންމެ ބޮޑަކަށް އެބަ ހިއްކޭ. އަޅުގަނޑު ހަމަ ވަޢުދުވީ ގޮތަށް އެކަން ކުރިއަށް ދާނެ. އިރާދަކުރެއްވިއްޔާ ފަޅުތެރެއިން ހިއްކެންއޮތް އެންމެ ބޮޑަކަށް އިތުރު 3 ހެކްޓަރު އިތުރުކޮށްގެން ހިއްކާ ނިންމަދޭނަން: ރައީސް މުޢިއްޒު

ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.