މާލޭގެ އިންޑަސްޓްރިއަލް ވިލެޖަށް ގަރާޖު ތަކާއި ވޯކްޝޮޕްތައް ބަދަލުކުރަން ނިންމައިފި
އިންޑަސްޓްރިއަލް ވިލެޖު ނުވަތަ ސިނާޢީ ސަރަޙައްދު އަލުން ތަރައްޤީކޮށް, އެސަރަޙައްދަށް މާލޭސިޓީގެ ގަރާޖު، ވޯކްޝޮޕްތައް ބަދަލުކުރަން ސަރުކާރުން ނިންމައިފިއެވެ.
މި ނިންމުން ސަރުކާރުން ނިންމާފައިވާކަން ހާމަކުރެއްވީ މޯލްޑިވްސް ޕޯޓްސް ލިމިޓެޑްގެ ސީއީއޯ މުހައްމަދު ވަޖީހު އިބްރާހިމް ޕީއެސްއެމްގެ ޕްރޮގްރާމެއްގައި ވާހަކަދައްކަވަމުންނެވެ.
ވަޖީހު ވިދާޅުވީ އިންޑަސްޓްރިއަލް ވިލެޖަކީ މާލެސިޓީގައި ހުރި ގަރާޖުތަކާއި ވޯކްޝޮޕް ފަދަ ތަންތަަން ބަދަލުކުރުމަށް ހިއްކުނު ސަރަޙައްދެއް ކަމަށާއި، ގަރާޖު، ވޯކްޝޮޕްތައް ބަދަލުކުރަން ބިން ދޫކުރުމިުގެ މަޝްވަރާތައް ކުރަމުންދާކަމަށެވެ. މަޤޞަދަކީ މާލެސިޓީއަކީ ރައްކާތެރި ސިޓީއަކަށް ހެދުމަށްޓަކައި ރައްޔިތުންނަށް އުނދަގޫވާގޮތަށް ހުރި މިފަދަ ތަންތަން ބަދަލު ކުރުން ކަމަށްވެސް ވަޖީހު ވިދާޅުވިއެވެ.
މާލޭގެ އިންޑަސްޓްރިއަލް ވިލެޖު ތަރައްޤީ ކުރުމަށް ބޭނުންވާ ފައިސާ ހަމަޖެއްސުމާއި މަސައްކަތްކުރުމަށް ކޮންޓްރެކްޓަރެއް ހޯދުމުގެ މަސައްކަތް މިހާރު ކުރިއަށްދާއިރު، 2018 ވަނަ އަހަރު އެ މަސައްކަތް ކުރި ކޮންޓްރެކްޓަރު މިހާރު ވެސް މިމަސައްކަތްތައް އަލުން ކުރިއަށް ގެންދިއުމަށް އެހީތެރިވުމަށް ޝައުގުވެރިކަން ފާޅުކޮށްފައިވާކަމަށް ވިދާޅުވިއެވެ.
ރައީސް ޑރ. މުޢިއްޒު ވެރިކަމާހަވާލުވެ ވަޑައިގެންނެވުމާއިއެކު، މާލެސިޓީގެ އިތުރުން ރާއްޖޭގެ އެކި ކަންކޮޅުތަކުގައި ރައްޔިތުންނަށް ދަތިވާނެހެން ހުރި މިފަދަ އެތައް ކަމެއް ހައްލުކުރުމުގެ މަސައްކަތް ދަނީ ބާރު ސްޕީޑެއްގައި ކުރައްވަމުންނެވެ.
އެގޮތުން ނިމިދިޔަ ސަރުކާރުން ފަށާ ނުނިމި އޮތް އަމީނީ މަގު ނިންމާ އާންމުންނަށް ހުޅުވައިލުމާއި، ނިމިދިޔަ 5 އަހަރު ބަންދުކޮށްފައި ހުރި މާލޭގެ ބައެއް މަގުތައް އަލުން ހުޅުވައިލުން ހިމެނެއެވެ. އަދި ތިލަމާލެ ބްރިޖްގެ މަސައްކަތް ހަލުވިކަމާއިއެކު ކުރިއަށް ގެންދަން ވަނީ ފަށާފައެވެ. މިއާއިއެކު ބޯހިޔާ ވަހިކަމުގެ މަޝްރޫޢުތަކަށް ބޭނުންވާ ބިން ހިއްކުމުގެ މަސައްކަތްވެސް ވަނީ ފަށާފައެވެ.
މީގެ އިތުރުން އަތޮޅުތެރޭގެ ރަށްރަށާއި ސިޓީތަކުގެ މަގު ހެދުމުގެ މަސައްކަތްތަކުގެ އިތުރުން، ފެނާއި ނަރުދަމާގެ މަސައްކަތްތަކާއި އެހެނިހެން މަޝްރޫޢުތައް ވަނީ ހަލުވިކަމާއިއެކު ފަށާފައެވެ.