ފައްތިޔާ ދޯނިތަކުގައި ފަސޭހައިން މަސައްކަތް ކުރެވޭނެ ގޮތް ހަމަޖައްސައިދޭނަން: ރައީސް
މާލޭގެ ފަޅުތެރޭގައި ތިބެގެން ފައްތިޔާ ދޯނިތަކުގައި މަސައްކަތްކުރާ ފަރާތްތަކަށް ފަސޭހައިން މަސައްކަތް ކުރެވޭނެ ގޮތް ހަމަޖައްސައިދެއްވާނެ ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިފަދައިން ވިދާޅުވީ މާލޭ ފަޅުތެރޭގައި ހުންނަ ފައްތިޔާދޯނިތައް ނަގަން އަންގާތީ، އެކަމުގައި ހުރި ކަންބޮޑުވުންތައް ފާހަގަކޮށް ތ.މަޑިފުށީ، ތަރިވިދާގޭ، އަޙްމަދު އިބްރާހީމް، ދެންނެވި ސުވާލަށް، ދެއްވި ޖަވާބުގައެވެ.
މަޑިފުށްޓަކީ އޮޑިދޯނި ފަހަރު ދުއްވާ ވަރަށް ގިނަ ފަރާތްތައް ދިރިއުޅޭ ރަށެއް ކަމަށާއި، މާލޭގައިވެސް ވަރަށް ގިނަ ބޭފުޅުން އެ މަސައްކަތް ކުރައްވާކަން ފާހަގަކުރައްވާ ރައީސް ވިދާޅުވީ ފައްތިޔާތަކަށް ދިމާވެފައިވާ މައްސަލަ ހައްލު ކޮށްދެއްވާނެ ކަމަށެވެ.
މަޑިފުށްޓަކީ އޮޑިދޯނި ފަހަރު ދުއްވާ ވަރަށް ގިނަ ފަރާތްތައް ދިރިއުޅޭ ރަށެއް. މާލޭގަ ވަރަށް ގިނަ ބޭފުޅުން މި މަސައްކަތް ކުރައްވާ. މާލޭގެ ފަޅުތެރޭގައި ވަރަށް ގިނަ މަޑިފުށީގެ ދޯނިތައް. އަދި ހަމަ އެހެން ދޯނިތައްވެސް އެބަ މަސައްކަތްކުރޭ. އަޅުގަނޑު ދަންނަވާލަން ބޭނުންވަނީ އިރާދަކުރެއްވިއްޔާ ތި ވިދާޅުވި މައްސަލަ ހައްލު ކޮށްދޭނަމޭ: ރައީސް މުޢިއްޒު
ރައީސް އިތުރަށް ވިދާޅުވީ މި މައްސަލަ ހައްލުކުރުމަށް މާލެސިޓީ ކައުންސިލާއި އެކު މަޝްވަރާތައް ކުރުމަށް ނިންމާފައިވާ ކަމަށާއި، އެކަން ކުރާނީ އެ މަސައްކަތްކުރާ ފަރާތްތަކުގެ ޚިޔާލާއި މަޝްވަރާ ހޯދުމަށްފަހުގައި ކަމަށެވެ.
ފަޅުތެރެއިން އެހެން ޖާގައެއް އެހެން ދިމާލަކުން ހަމަ ނުޖައްސާ ތި ވިދާޅުވި ގޮތަށް ދޭތެރެ ދޭތެރެއިން ފަޅުން ނުކުންނަން ޖެހި ،ދަނެ ތަނެއް ނެތި، އެހެން ވާންޖެހޭ ގޮތް ވިޔަކަ ނުދޭނަން. މާލެ ސިޓީ ކައުންސިލާއިވެސް އަޅުގަނޑުމެން ވާހަކަ ދައްކާ އިރާދަކުރެއްވިއްޔާ ތިކަމުގަ ތި ކަންބޮޑުވުން ހައްލުކޮށްދޭނަން: ރައީސް މުޢިއްޒު
ރައީސް ޔަޤީންކަން ދެއްވީ ފަޅުތެރޭގައި ތިބެގެން ފައްތިޔާތަކުގައި މަސައްކަތް ކުރިއަށް ގެންދެވޭނެ ކަމަށެވެ. އަދި ކުރިއަށްއޮތް ތަނުގައި އެފަދަ ދަތިތައް ކުރިމަތިނުވާނެ ކަމުގެ ޔަޤީންކަންވެސް ރައީސް ދެއްވިއެވެ.
ފަޅު ތެރޭގައި ތިބެވިގެން ތިބޭފުޅުންނަށް މަސައްކަތް ކުރެވޭނެ ގޮތަކަށް އިރާދަކުރެއްވިއްޔާ ކުރިއަށް ދެވޭނެ. އެހެންތަނަކަށް ބަދަލު ވަންޏާ އެއީ ތިބޭފުޅުނަށްވެސް އެނގިގެން މަޝްވަރާ ކުރެވިގެން ހިނގާނެކަމެއް. ހަމަ ކުއްލިއަކަށް ތި ވިދާޅުވި ކަހަލަ ކަންބޮޑުވުން ކުރިމަތިވާގޮތަކަށް އެކަމެއް ނުވާނެ އިރާދަކުރެއްވިއްޔާ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.