ރައީސް ވިދާޅުވީ އަމާޒަކީ %33 އިޢާދަކުރަނިވި ހަކަތައިގެ ނިޒާމަށް ބަދަލުކުރުން ކަމަށް

"ބައްޕައެއްގެ ޙައިޘިއްޔަތުން ދަރީންނަށްޓަކައި އަޅުގަނޑު އުފުލަންޖެހޭ ޒިންމާތަކެއްވޭ، އެ ކުދީންގެ މުސްތަޤްބަލަށްޓަކައި. ވެރިއެއްގެ ޙައިޘިއްޔަތުން ރައްޔިތުންނަށްޓަކައި އަޅުގަނޑު އުފުލަން ޖެހޭ ޒިންމާތަކެއްވޭ. އަދި ދުނިޔޭގެ އެއް ފަރުދެއްގެ ޙައިޘިއްޔަތުން މި ބިމަށްޓަކައިވެސް އަޅުގަނޑު އުފުލަން ޖެހޭ ޒިންމާތަކެއްވޭ. ތިޔަ ހުރިހާ ބޭފުޅުންނަށްވެސް އެ ޒިންމާ އެބައޮތް." ރައީސް

ރައީސުލްޖުމްހޫރިއްޔާ މިހެން ވިދާޅުވީ ޔޫއޭއީގައި މިހާރު ކުރިއަށްދާ ކޮޕް 28ގައި ތަގްރީރުކުރައްވަމުންނެވެ.

ސަރުކާރުގެ އަމާޒަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިޢާދަކުރަނިވި ހަކަތައިގެ ނިޒާމެއް ކުރިއަށް އޮތް ފަސް އަހަރުގެ ތެރޭގައި ޤާއިމުކުރުން ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ކޮޕް-28ގައި ތަޤްރީރުކުރައްވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ ރާއްޖޭގައި މިހާރު އިއާދަކުރަނި ހަކަތަ ބޭނުންކޮށްގެން އުފައްދާ ކަރަންޓުގެ މިންވަރަކީ 4 އިންސައްތަ ކަމަށެވެ. އެހެންނަމަވެސް ސަރުކާރުގެ އަމާޒަކީ ރާއްޖޭގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިޢާދަކުރަނިވި ހަކަތައިގެ ނިޒާމެއް ކުރިއަށް އޮތް ފަސް އަހަރުގެ ތެރޭގައި ޤާއިމުކުރުން ކަމަށް ރައީސް ވިދާޅުވިއެވެ.