ބިޔަބޮޑެތި މަޝްރޫޢުތައް ހިނގަންފަށާ އިންވެސްޓްމެންޓްތައް ގިނަވާންފެށީމަ ޑޮލަރު ތިޔާގިވާނެ: ރައީސް
ރާއްޖޭގައި ބިޔަ ބޮޑެތި މަޝްރޫޢުތައް ހިނގަންފަށާ އަދި އިންވެސްޓްމެންޓްތައް ގިނަވާންފެށީމަ ޑޮލަރު ތިޔާގިވެ ޑޮލަރު ލިބޭލެއް އަވަސްވެ ފަސޭހަވެގެންދާނެ ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ކ.މާފުށްޓަށް ރައީސް މުޢިއްޒު ވެވަޑައިގެންނެވި ބައެއް ވަޢުދާ ބެހޭގޮތުންނާއި، ޑޮލަރު ލިބުމުގެ ދަތިކަން ޙައްލުކުރުމާއި ގުޅޭގޮތުން ކ.މާފުށީ ޖަންބުމާގޭ، އަޙްމަދު ސަމީރު ދެންނެވި ސުވާލަށް ޖަވާބު ދެއްވަމުންނެވެ.
އެއީ ވަރަށް މުހިންމު ސުވާލެއްކަން ފާހަގަކުރައްވާ ރައީސް ވިދާޅުވީ މާފުށީގައި ޑޮލަރު އޭޓީއެމް ބެހެއްޓުމަކީ އެމަނިކުފާނުގެ ވަޢުދެއް ކަމަށާއި އެއީ ކޮންމެހެން ކުރަންޖެހޭ ކަމެއް ކަމަށެވެ. އަދި ޓާގެޓަކީ ބޭންކް އޮފް މޯލްޑިވްސް އާއި ވާހަކަ ދައްކައިގެން ވީހާވެސް އަވަހަކަށް މިއަހަރުގެ ތެރޭގައި މާފުށިގައި ޑޮލަރު އޭޓީއެމް ބެހެއްޓުން ކަމަށާއި އެކަމަށް ވަރަށް މަސައްކަތް ކުރައްވާނެ ކަމަށް ރައީސް ވިދާޅުވިއެވެ.
މާފުށީގައި ޑޮލަރު އޭޓީއެމް ބެހެއްޓުމަކީ އަޅުގަނޑު ވީ ވަޢުދެއް. އެއީ ކޮންމެހެން ކުރަންޖެހޭ ކަމެއް. އަޅުގަނޑުމެން ބޭންކް އޮފް މޯލްޑިވްސް އާއި ވާހަކަ ދައްކައިގެން އިރާދަކުރެއްވިއްޔާ ޓާގެޓަކީ ވީހާވެސް އަވަހަކަށް މިއަހަރުގެ ތެރޭގައި އެ އޭޓީއެމް ބެހެއްޓުން. ވަރަށް މަސައްކަތް ކުރާނަން: ރައީސް މުޢިއްޒު
މީގެއިތުރުން މާފުށީގެ ބިން ހިއްކުމުގެ މަޝްރޫޢުއާއި ގުޅޭގޮތުން ރައީސް ވިދާޅުވީ އެމަނިކުފާނަކީ އެންމެ ފަހު ވަގުތާއި ހަމަޔަށް މަޝްރޫޢުތައް މަޑު ޖައްސައިވައިގެން ހުންނަވާނެ ބޭފުޅެއް ނޫން ކަމަށާއި، ބިން ހިއްކުމުގެ މަސައްކަތްވެސް ވީ އެންމެ އަވަހަށް ކުރިއަށް ގެންދަވާނެ ކަމަށެވެ.
މިއަހަރު ތެރޭގައި (މާފުށީގެ ބިން ހިއްކުން) އެ މަޝްރޫޢު ފެށުން ފަހަރެއްގައި އަންލައިކްލީ ވެދާނެ. އެހެންނަމަވެސް ވީހާވެސް އަވަހަށް އެންމެ ފަހު އަހަރަށް މަޑުކޮށް އެގޮތަކަށްނޫން އަޅުގަނޑު މަސައްކަތް ކުރާގޮތަކީވެސް. ވީހާވެސް އަވަހަކަށް ރައްޔިތުންނަށް ހެވާއި ލާބަލިބޭ މަޝްރޫޢުތައް ފަށައިގެން ކުރިއަށް ގެންދެވޭތޯ ބެލުން. މިވަގުތު ތާރީޚު ދަންނަވާނުލެވުނަސް ހަމަ ވަރަށް އަވަސް އިސްކަމެއްދީގެން ވަރަށް އަވަހަށް އެ މަޝްރޫޢު ފެށޭތޯ މަސައްކަތްކުރާނަން: ރައީސް މުޢިއްޒު
ޖުމްލަގޮތެއްގައި ޑޮލަރުގެ ތާށިކަން ހައްލުކުރެވޭނެ ފޯމިއުލާވެސް ރައީސް ވަނީ ހިއްސާކުރައްވާފައެވެ.
ރައީސް ވިދާޅުވީ ރާއްޖޭގައި ބިޔަ ބޮޑެތި މަޝްރޫޢުތައް ހިނގަންފަށާ އަދި އިންވެސްޓްމެންޓްތައް ގިނަވާންފެށީމަ ޑޮލަރު ތިޔާގިވެ ޑޮލަރު ލިބޭލެއް އަވަސްވެ ފަސޭހަވެގެންދާނެ ކަމަށެވެ.
ދެން ޖުމްލަކޮށް ޑޮަލަރުގެ ތާށިކަން އެއީ އިޤްތިޞާދީ ގޮތުން ގެންނަންޖެހޭ އިސްލާޙުތައް ގެނެވުނީމަ ރިފޯމް ގެނެވުނީމަ އެކްސްޕޭންޝަން ފުޅާވުން ގެނެވުނީމަ،އަންނާނެ ކަމެއް. އިރާދަކުރެއްވިއްޔާ ބިޔަ ބޮޑެތި މަޝްރޫޢުތައް ހިނގަންފެށީމަ، އަދި އިންވެސްޓްމެންޓްތައް ގިނަވާންފެށީމަ އިރާދަކުރެއްވިއްޔާ ޑޮލަރު ތިޔާގިވާނެ. އިރާދަކުރެއްވިއްޔާ ޑޮލަރު ލިބޭލެއް އަވަސްވާނެ، ފަސޭހަވާނެ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.