ޞިއްޙީ ނިޒާމް ބައްޓަން ކުރަމުން މިދަނީ އެޕޮއިންޓްމަންޓް ލިބޭ ދުވަސް ވަރަށް ޔަޤީން ކަމާއެކު ހަމަޖެހިގެންދާގޮތަށް: ރައީސް
ރާއްޖޭގެ ޞިއްޙީ ނިޒާމް ބައްޓަން ކުރަމުން ގެންދަވަނީ އެޕޮއިންޓްމަންޓް ލިބޭ ދުވަސް ވަރަށް ޔަޤީން ކަމާއެކީގައި ހަމަޖެހިގެންދާގޮތަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރާއްޖޭގައި ޑޮކްޓަރަށް ދެއްކުމުގެ ކަންކަން އޮންނަގޮތުން ވަރަށް ބޮޑެތި ބުރަ އުފުލަންޖެހޭކަން ބަޔާންކޮށްދެއްވައި ލ.މާބައިދޫ ލަކްސްލިން، އާދަމް ޢަބްދުﷲ ދެންނެވި ސުވާލަށް ޖަވާބު ދެއްވަމުންނެވެ.
ރައީސް ވިދާޅުވީ ޞިއްޙީ ނިޒާމު ވަރުގަދަކުރުމަކީ ސަރުކާރުގެ އެންމެ މުހިންމު އެއް ސިޔާސަތު ކަމަށާއި، ރާއްޖޭގައި ތިބި ސްޕެޝިއަލިސްޓުންނަށް ވީހާވެސް ގިނައިން ހޮސްޕިޓަލުން ވަޒީފާދިނުމުގެ މަސައްކަތް ސަރުކާރުން ކުރަމުންދާކަމަށެވެ. މިއާއިއެކު ރާއްޖޭގަ ސްޕެޝިއަލިސްޓުން ނެތް ދާއިރާތަކަށް ރާއްޖެއިން ބޭރުންވެސް ޑޮކްޓަރުން ހޯދުމަކީ މިހާރުވެސް ފަށާއިވާ މަސައްކަތެއް ކަން ރައީސް ފާހަގަކުރެއްވިއެވެ.
ޙަޤީޤަތުގަ ޞިއްޙީ ނިޒާމު ވަރުގަދަކުރުމަކީ އަޅުގަނޑުމެންގެ އެންމެ މުހިންމު އެއް ސިޔާސަތު. އައިޖީއެމްއެޗް ، ދަރުމަވަންތަ ހޮސްޕިޓަލް އެތަންތަނުގަ ރާއްޖޭގައިތިބި ސްޕެޝިއަލިސްޓުންނަށް ވީހާވެސް ގިނައިން ހޮސްޕިޓަލުން ވަޒީފާދިނުމަކީ ކުރަން މަސައްކަތްކުރާ އެއްކަންތައް. އޭގެ އިތުރުން ބޭރުންވެސް ރާއްޖޭގަ ސްޕެޝިއަލިސްޓުން ނެތް ދާއިރާތަކަށް ހޯދުމަކީވެސް މިހާރު ފަށާއިވާ މަސައްކަތެއް :ރައީސް މުޢިއްޒު
ރައީސް ވިދާޅުވީ ސްޕެޝިއަލިސްޓުން ގިނަކުރެވޭ ވަރަކަށް މަޑުކުރަން ޖެހޭ ވަގުތު ކުޑަވާނެ ކަމަށާއި، އެޕޮއިންޓްމަންޓް ހަމަޖެހޭއިރު އެޕޮއިންޓްމަންޓް ލިބޭ ދުވަސް ވަރަށް ޔަޤީން ކަމާއެކީގަ ހަމަޖެހިގެންދާގޮތަށް ޞިއްޙީ ނިޒާމް ބައްޓަން ކުރަމުން ގެންދާކަމަށެވެ.
ސްޕެޝިއަލިސްޓުން ގިނަކުރެވޭ ވަރަކަށް މަޑުކުރަން ޖެހޭ ވަގުތު ކުޑަވާނެ، މިހާރު ކުރެވޭ ކަމަކީ އެޕޮއިންޓްމަންޓް ހަމަޖެހޭއިރު އެޕޮއިންޓްމަންޓް ލިބޭ ދުވަސް ވަރަށް ޔަޤީން ކަމާއެކީގަ ހަމަޖެހިގެންދާގޮތަށް އިރާދަކުރެއްވިއްޔާ ނިޒާމް ބައްޓަން ކުރަމުން މިދަނީ، އެޕޮއިންޓްމަންޓާ އެކީގަ ސީދާ ދުވަސްލިބި އިތުރަށް އިންތިޒާރުކުރަން ނުޖެހޭ ގޮތަށް ، އޭރުން ރަށްރަށުގައި ތިބެފަ ވަޑައިންނަވާއިރުވެސް އިތުރަށް އިންތިޒާރުކުރަން ޖެހޭގޮތް ނުވާނެ :ރައީސް މުޢިއްޒު
މީގެ އިތުރުން ހޮސްޕިޓަލްގައި ވީހާވެސް ގިނަ ވަގުތު ޑޮކްޓަރުން ޚިދުމަތްދޭން މަޑުކުރާގޮތަށް ބައްޓަން ކުރުމާއިއެކު ޖުމްލަކޮށް މުޅި މައްސަލައަށް ވަށާޖެހޭ ހައްލެއްގެނައުމުގެ މަސައްކަތް ކުރިއަށްދާކަމަށްވެސް ރައީސް ވިދާޅުވިއެވެ.
ޞިއްޙީ ނިޒާމް ހަރުދަނާކޮށް ހޮސްޕިޓަލްތަކުގެ ޚިދުމަތް ރަނގަޅު ކުރުމަށްޓަކާ ސަރުކާރުން ކުރިއަށްގެންދާ މަސައްކަތްތައް ވަރަށް ބާރަށް ކުރިއަށް ދާކަން ފާހަގަކުރައްވާ ރައީސް ދެއްވި ޔަޤީން ކަމަކީ މާލެ ސަރަޙައްދެކޭ އެއްގޮތަށް ރަށްރަށުގައިވެސް އެކަން ކުރިއަށް ގެންގޮސް އެ މައްސަލައަށް ހައްލެއް ލިބިގެންދާނެ ކަމަށެވެ.
ހޮސްޕިޓަލުގެ ޚިދުމަތް ރަނގަޅު ކުރުމަށްޓަކާ މިކުރެވޭ މަސައްކަތްތައް ވަރަށް ބާރަށް ކުރިއަށް އެބަދޭ. އިރާދަކުރެއްވިއްޔާ ރަނގަޅުވެގެންދާނެ، މާލެ ސަރަޙައްދެކޭ އެއްގޮތަށް ރަށްރަށުގައިވެސް އެކަން ކުރިއަށްދާނެ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.