މިއަހަރު ނިމުމުގެ ކުރިން ވެލާނާ އައު ޓާމިނަލުގައި ޒަމާނީ އީގޭޓްތައް ބޭނުންކުރަން ފެށޭނެ: ރައީސް

2026 ވަނަ އަހަރުގެ ޖެނުއަރީ 1 ގެ ކުރިން ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލުގައި އެންމެ ޒަމާނީ އީގޭޓްތައް ހަރުކުރެވި ބޭނުންކުރަން ފެށޭނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޢިއުލާނު ކުރައްވައިފިއެވެ.

މިކަން ހާމަކުރައްވައި ސޯޝަލް މީޑިއާގައި ޙިއްސާކުރެއްވި ޕޯސްޓެއްގައި ރައީސް ވިދާޅުވީ، ވެލާނާ އިންޓަރނޭޝަނަލް އެއަރޕޯޓް ބޭނުންކުރައްވާ ދިވެހިންނާއި ފަތުރުވެރިން ބޯޑަރ ކޮންޓްރޯލް ކައުންޓަރުތަކުގައި ގިނައިރު ވަންދެން ކިއުގައި ހޭދަކުރަންޖެހޭ ޖެހުން ނިމުމަކަށް ގެނައުމަށްޓަކާ، އެންމެ ޒަމާނީ ޓެކްނޮލޮޖީގެ ފީޗަރތައް ހިމެނޭ އީގޭޓްތައް އެއަރޕޯޓުގެ އައު ޓާމިނަލުގައި ހަރުކުރުމުގެ މަސައްކަތް ކުރަމުންދާކަމަށެވެ. އަދި މީގެ ސަބަބުން ފަސިންޖަރުންނަށް ވާނެ ފައިދާތަކާއި ލުއިފަސޭހަތަކަށް ރައީސް ވަނީ އަލި އަޅުއްވާލައްވާފައެވެ.

އެގޮތުން އީގޭޓުތަކުން އެއްފަހަރު ޕާސްޕޯޓު ސްކޭންކުރުމަށްފަހު، ދެން ބޯޑަރު ހުރަސްކުރާއިރު އޮތޮރައިޒް ކުރެވޭނީ ފޭޝަލް ރެކޮގްނިޝަންގެ ޒަރިއްޔާއިންކަމަށާއި، 1 ޖެނުއަރީ 2026ގެ ކުރިން ވީއައިއޭގެ އައު ޓާމިނަލުގެ އެރައިވަލް އަދި ޑިޕާޗަރ ހިމެނޭހެން ކޮންމެ ޓާރމިނަލްއެއްގައި 10 ގޭޓް ހިމެނޭހެން ޖުމްލަ 20 ގޭޓް ހަރުކުރެވި ބޭނުންކުރަން ފަށާނެކަމަށް ރައީސް ވިދާޅުވިއެވެ.

މީގެ އިތުރުން ރާއްޖޭގެ އެހެނިހެން އިންޓަރނޭޝަނަލް އެއަރޕޯޓްތަކުގައިވެސް 2026ވަނަ އަހަރު މިފަދަ އީގޭޓްތައް ހަރުކުރެވި، ބޭނުންކުރަންފެށޭނެކަމަށްވެސް ރައީސް ވިދާޅުވިއެވެ.

ފާއިތުވި 2 ދައުރުގައި މަޑުޖެހިފައިއޮތް ވެލާނާ އައު ޓާމިނަލްގެ މަސައްކަތް ހަލުވި ދުވެލީގައި ނިންމާ ޒަމާނީ ގިނަ ޚިދުމަތްތަކާއެކު ރައީސް މުޢިއްޒު ހުޅުއްވައިދެއްވީ މިއަހަރުގެ ޖުލައި މަހުގެ 26 ވަނަ ދުވަހުގައެވެ.