Article Image

ވިލިމާލެ ރައްޔިތުންގެ އެންމެ ބޮޑު އެއް ކަންބޮޑުވުން ރައްޔިތުން އެދޭގޮތަށް ހައްލުކޮށްދެއްވާނެކަމުގެ ޔަޤީންކަން!

ވިލިމާލެ ރައްޔިތުންގެ އެންމެބޮޑު އެއް ކަންބޮޑުވުން ރައްޔިތުން އެދޭގޮތަށް ހައްލުކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ވިލިމާލެ ރައްޔިތުންގެ އެންމެބޮޑު އެއް ކަންބޮޑުވުމުގެ ގޮތުގައި އެތަނުގައި ދިރިއުޅޭ ގިނަ ރައްޔިތުން ފާހަގަކުރީ ރަށުގައި ހުރި ގިނަދުވަސްވީ ދެ ގަހެއްގެ ސަބަބުން، އާންމު ދިރިއުޅުމަށް ދިމާވާ މައްސަލަތަކެވެ.

މި މައްސަލަ ހައްލު ކުރުމަށް ޒަމާންތަކެއް ވަންދެން ވިލިމާލެ ރައްޔިތުން އެކި ސަރުކާރުތަކުގައި ދިޔައީ އެދެމުންނެވެ. މިފަހަރުވެސް މިކަންބޮޑުވުން ރައްޔިތުން ވަނީ ރައީސް އާއި ހިއްސާކޮށްފައެވެ. މިފަހަރު މިކަންބޮޑުވުން ހިއްސާކުރެއްވީ ރައީސް މުޢިއްޒު ރާއްޖޭގެ ރައްޔިތުންގެ ހާލު ބެއްލެވުމަށް ކުރައްވާ ދަތުރުފުޅުގެ ތެރެއިން ވިލިމާލެއަށް ރޭ ވަޑައިގެން ރައްޔިތުންނާއި ބައްދަލު ކުރެއްވުމުންނެވެ. ބައްދަލުވުމުގައި ބައިވެރިވި ގިނަ ރައްޔިތުންވަނީ އެ 2 ނިކަގަހުގެ ސަބަބުން އެ ސަރަޙައްދުގައި ދިރިއުޅޭ އެތައް އާންމުންގެ ގެދޮރަށް ދިމާވާ ގެއްލުންތަކުގެ ވާހަކަ ރައީސް އާއި ހިއްސާ ކުރައްވާފައެވެ.

އެގޮތުން ބޮޑު 2 ނިކަގަހުން އަޑިއަށް މޫ ފައިބާ ބިންގަނޑު ކަނޑައިންގޮސް ގޭގޭގެ ތަށިމުށިގަނޑު ތަޅައިގެންގޮސް އެ ސަރަޙައްދުގައި ދިރިއުޅޭ ރައްޔިތުންނަށް ފޫނުބެއްދޭ ވަރުގެ ގެއްލުންތައް ލިބެމުންދާކަން ރައްޔިތުން ހިއްސާކުރިއެވެ. މިއާއިއެކު ރައީސް މުޢިއްޒު އެދިވަޑައިގަތީ މިކަމުގައި އާންމުގެ ޚިޔާލު ހުރި ގޮތުގެ ވޯޓަކަށެވެ. ބައްދަލުވުމުގައި ބައިވެރިވި ރައްޔިތުންގެ އަޣުލަބިއްޔަތުން އެދުނީ އެ 2 ގަސް ކަނޑާލައިދިނުމަށެވެ. ރައީސް ދެއްވީ ޒަމާންވީ މި ބޮޑު މައްސަލަ ހައްލުކޮށްދެއްވާނެކަމުގެ ފުރިހަމަ ޔަޤީންކަމެވެ.

ރައީސް ވިދާޅުވީ މިއީ އެމަނިކުފާނު މޭޔަރުކަމުގައިވެސް ވިލިމާލެ ރައްޔިތުން އެދިވަޑައިގެންނެވި ކަމެއްކަމަށާއި، މިހާރު މިކަންކޮށްދިނުމުގައި ޤާނޫނީ ހުރަހެއްވެސް، އަދި އެހެން ދަތިކަމެއްވެސް ނެތްކަމަށާއި، ރައްޔިތުން އެދިވަޑައިގަތް ގޮތަށް މައްސަލަ ހައްލުކޮށްދެއްވާނެކަމަށެވެ. މިއާއިއެކު ރައްޔިތުންވަނީ ރައީސްއަށް ޝުކުރު ދަންނަވާފައެވެ.