ރައީސް ޑރ.މުޢިއްޒު މިއަދު އައްޑޫސިޓީއަށް ވަޑައިގަންނަވަނީ
ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިއަދު އައްޑޫ ސިޓީއަށް ވަޑައިގެންނެވުމަށް ހަމަޖެހިއްްޖެއެވެ.
މިއީ އާއްމުންގެ ހާލު ބައްލަވައި، އާންމުންގެ ހުރި ކަންބޮޑުވުންތައް އަޑު އެއްސެވުމަށް ރައީސް ކުރައްވާ 4 ދުވަހުގެ ދަތުރުފުޅެއް ކަމަށް މަޢުލޫމާތުލިބެއެވެ. އަދި މި ދަތުރުފުޅުގެ ތެރެއިން އައްޑޫސިޓީގެ ގިނަ ރަށްރަށަށް ވަޑައިގަތުމަށް ވަނީ ހަމަޖެހިފައެވެ.
ރައީސްގެ ދުބާއި ދަތުރުފުޅުގެ ކުރިން އެމަނިކުފާނު ވަނީ، ތ. އަތޮޅުގެ ބައެއް ރަށްރަށަށް ޒިޔާރަތްކުރައްވާފައެވެ. އެގޮތުން ތ. އަތޮޅުގެ ޖުމްލަ 10 ރަށަކަށް ރައީސް ވަޑައިގެން އެ ރަށްރަށުގެ ރައްޔިތުންގެ ކަންބޮޑުވުންތައް އައްސަވާ އެކަންކަން ހައްލުކުރުމަށް ސަަރުކާރުން ގެންގުޅުއްވާ ސިޔާސަތުތައް ވަނީ ހާމަކޮށްދެއްވާފައެވެ. ތ. އަތޮޅުގެ ގުރައިދޫ, ދިޔަމިގިލި، މަޑިފުށި އަދި ވޭމަންޑޫ އާއި ބުރުނީ އާއި ކަނޑޫދޫ އާއި ވަންދޫ އާއި އޮމަދޫ އާއި ކިނބިދޫ އަދި ގާދިއްފުށްޓަށް އެމަނިކުފާނު ވަޑައިގެންނެވި އެވެ.
ރައީސްގެ އެ ދަތުރުފުޅުގެ ތެރެއިން، ތ. އަތޮޅު ކިނބިދޫ އަށް ވަޑައިގެން ވާހަކަދައްކަވަމުން ވިދާޅުވީ ދުބާއި ދަތުރުފުޅަށްފަހު، އެއް މަސް ދުވަސް ތެރޭގައި ރާއްޖޭގެ ހުރިހާ ރަށެއްގެ ކައުންސިލް ތަކާއި ބައްދަލު ކުރައްވަން ރަށްރަށަށް ވަޑައިގަންނަވާނެ ކަމަށެވެ.