ދެ އިންތިޚާބު އެއްދުވަހު ބާއްވަން އެމްޑީޕީން ދެކޮޅު ވަނީ އިންތިޚާބަށް ކަޑަ ޖަހަން: ރައީސް

އިދިކޮޅު ފަރާތްތަކުން ރިޔާސީ އިންތިޚާބާއި، ރައްޔިތުންގެ މަޖްލީހުގެ އިންތިޚާބު އެއްދުވަހެއްގައި ބޭއްވުމާ ކުރިން އެއްކޮޅުވެފަ މިހާރު ދެކޮޅުވާ ސަބަބަކީ އިންތިޚާބުތަކަށް ކަޑަޖެހުމުގެ ވިސްނުން ގެންގުޅޭތީ ކަމަށް ރައީސް މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ކޮންގްރެސް ޕާޓީގެ ފަރާތުން ބޭއްވި ތަރާވީސް ހަފްލާގައި ވާހަކަފުޅު ދައްކަވަމުންނެވެ.

އިދިކޮޅުން ކުއްލިއަކަށް މިކަމާ ދެކޮޅުވާ ސަބަބަކީ ކޮބައިތޯ ވިސްނާލެވުނު ކަމަށާއި، އެހެން ވިސްނަވަން ޖެހި ވަޑައިގަތީ އިދިކޮޅު އެމްޑީޕީން ކުރިން 2 އިންތިޚާބު އެއްދުވަހެއްގައި ބޭއްވުމަށް ވަކާލާތުކޮށްފައި މިއަދު އެކަމާ ދެކޮޅު ހައްދަވާތީ ކަމަށްވެސް ރައީސް ވިދާަަޅުވިއެވެ. އަދި މިކަމުން ދޭހަވީ ކަމަކީ، އެކަމާ ދެކޮޅުވަނީ އިންތިޚާބުތަކަށް ކަޑަ ޖެހުމުގެ އާދަތައް ގެންގުޅޭ ފަރާތްތަކުން މިހާރުވެސް އެ އުސޫލުން ކަންކުރަން އެދޭތީ ކަމަށް ރައީސް ވިދާަޅުވިއެވެ.

މިމޭރުމުން ވާހަކަ ދައްކަވަމުން ރައީސް ވަނީ އެކި ދުވަސްވަރު ސިޔާސީ ފަރާތްތަކުން އިންތިޚާބުތަކާއި ދިމާކޮށް މަޝްރޫޢުތަކުގެ ނަމުގައި ޖެއްސެވި ކަޑަތަކުގެ ވާހަކަ ތަފްސީލުކޮށްދެއްވާފައެވެ.

އިންތިޚާބު ގާތްވީމަ ރަށަށްދާނެ، ކެންޑިޑޭޓުންނާ އެކިބޭފުޅުން،ގޮއްސަ ކޮންމެސް މަޝްރޫޢުއެއްގެ ކަޑަ ޖަހާނެ،ދެން އެހިސާބުން ބަޚަބަރު،ނުވެސް ފެންނާނެ،އަނެއްކާ އަނެއް އިންތިޚާބަށް ދާންވީ އެކަޑަ އާކުރަން،

ރައީސް ވިދާޅުވީ ދެ އިންތިޚާބު އެއްދުވަހެއްގައި ބޭއްވުމަށް ކުރިން ތާއީދުކޮށް މިއަދު ދެކޮޅުވެގެން އުޅެނީ މި އުސޫލުން ކަންކަން ކުރިއަށް ގެންދިއުމުގެ އާދަ އަށަގަނެފައިވާ ފަރާތްތަކުންކަމަށެވެ.

ރައީސް ވިދާޅުވީ ސަރުކާރުން 2 އިންތިޚާބު އެއްކޮށްލަން ނުވަތަ 2 އިންތިޚާބު އެއް އިންތިޚާބަށް ހަދަންނޫޅޭ ކަމަށާއި، އުޅެނީ އެއް އިންތިޚާބު އަނެއް އިންތިޚާބާއި ދެމެދު އޮންނަ 6 މަސްދުވަހުގެ މުއްދަތު ބަދަލުކޮށް 2 އިންތިޚާބު އޮންނަ ދުވަސް އެއް ދުވަހަކަށް ހެދުމަށް ކަމަށެވެ.

2 އިންތިޚާބު އެކުގައި ބޭއްވުމަށް ރައްޔިތުންގެ ފެންނަ ނުފެންނަ ވޯޓެއް ނެގުމާ ދެކޮޅަށް އިދިކޮޅު އެމްޑީން ވަނީ ކޯޓަށްވެސް މައްސަލަ ހުށަހަޅާފައެވެ.