ނިމިދިޔަ 5 އަހަރު އައްޑޫ ސިޓީގެ ތަރައްޤީއަށް ވެފައިވާ އިހުމާލުގެ ބޮޑުކަމުން ކައުންސިލް ބައްދަލުވުމަށް ވަގުތުދިނުމަށް އައްޑޫ ޖަލްސާ މިރެއަށް ފަސްކޮށްފި

ނިމިދިޔަ ސަރުކާރުން އައްޑޫ ސިޓީގެ ތަރައްޤީއަށް ވެފައިވާ އިހުމާލުގެ ބޮޑުކަމުން ކައުންސިލް ބައްދަލުވުމަށް ވަގުތުދިނުމަށް އައްޑޫސިޓީގައި މިއަދު ބޭއްވުމަށް ނިންމި ޖަލްސާ މިރެއަށް ފަސްކޮށްފިއެވެ.

ރައީސުލްޖުމްހޫރިއްޔާ އައްޑޫ ސިޓީއަށް މިއަދު ފެށްޓެވި ދަތުރުފުޅުގެ އެޖެންޑާގައި އެންމެ ފުރަތަމަ ކަމަކަށް އޮތީ އައްޑޫ ސިޓީ ކައުންސިލާ އތމ ކޮމެޓީއާ ބައްދަލުކުރެއްވުމެވެ.

އައްޑޫ ސިޓީގެ ތަރައްޤީއަށް ވެފައިވާ އިހުމާލުގެ ބޮޑުކަމުން، އައްޑޫ ސިޓީ ކައުންސިލް މެންބަރުންނާ އތމ ކޮމެޓީގެ މެންބަރުން އެކަން ރައީސުލްޖުމްހޫރިއްޔާގެ އަރިހުގައި ވަރަށް ތަފްޞީލްކޮށް ދަންނަވަން އެދިވަޑައިގަންނަވާތީ އެ ފުރުޞަތު މި ބައްދަލުވުމުގައި ރައީސް ވަނީ ދެއްވައިފައެވެ.

މިގޮތުން ވަކިވަކި ކޮންމެ ކައުންސިލަރަކު އައްޑޫ ސިޓީގެ ހާލަތާ އެދިވަޑައިގަންނަވާ ކަންކަމުގެ ވާހަކަ ދައްކަވަން ވަގުތުދެއްވައި އެ ހުރިހާ ވާހަކަފުޅުތައް ރައީސް އަޑުއައްސަވައި ނޯޓްކުރެއްވިއެވެ. މިއީ އައްޑޫ ސިޓީގެ މުޅި ތާރީޚުގައިވެސް ޤައުމުގެ އެންމެ އިސްވެރިޔަކު މިގޮތަށް މި ފުރުޞަތުދެއްވި ފުރަތަމަ ފަހަރެވެ.

މި ބައްދަލުވުމަށް ގިނަ ވަގުތުތަކެއް ނަގާތީ، މި ބައްދަލުވުމުގެ މުހިންމުކަމަށް ބައްލަވައި، އައްޑޫ ސިޓީ ހިތަދޫ ރައްޔިތުންނާ ރައީސް ބައްދަލުކުރެއްވުމަށް މިއަދު މެންދުރުފަހު 2:30 އަށް ތާވަލުކުރި ޖަލްސާ މިރެއަށް ވަނީ ފަސްކުރައްވައިފައެވެ. އެހެންކަމުން އައްޑޫ ސިޓީ ހިތަދޫ އަދި ފޭދޫ ރައްޔިތުންނާ ބައްދަލުކުރެއްވުމުގެ ޖަލްސާ މިރޭ އޮންނާނެއެވެ.

އައްޑޫ ސިޓީ ކައުންސިލާ އތމ ކޮމެޓީއާއެކު މިއަދު ރައީސް ބޭއްވެވި ބައްދަލުކުރެއްވުމުގައި މުޅި ސިޓީގެ ޙާލަތާ ރައްޔިތުން އެދޭގޮތް އަދި އައްޑޫ ސިޓީގެ މުސްތަޤްބަލުގެ އުންމީދުތަކުގެ މައްޗަށް ވަރަށް ފުޅާ ދާއިރާއެއްގައި ހުރިހާ ކައުންސިލަރުންނާ އތމ ކޮމެޓީގެ މެންބަރުންވެސް ވާހަކަ ދެއްކެވިއެވެ.