މިއަދު ސުކޫކަށް ފައިސާ ދައްކަން ޖެހުނަސް ދެއްކޭވަރަށް ފައިސާ އެބަހުރި: ރައީސް
މިވަގުތު ސުކޫކަށް ފައިސާ ދައްކަން ޖެހުނަސް ދެއްކޭވަރަށް ފައިސާ އެބަހުރި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މިއަދު ނޫސްވެރިންނާއި ބައްދަލު ކުރައްވާ ދެއްކެވި ވާހަކަފުޅުގައެވެ.
ރިޔާސީ ބަޔާނުގައިވެސް ސުކޫކާއި ބެހޭގޮތުން ތަފްސީލީ ގޮތެއްގައި ވާހަކަފުޅު ދައްކަވާފައިވާނެކަން ފާހަގަ ކުރައްވާ ރައީސް ވިދާޅުވީ މިވަގުތު ސުކޫކަށް ފައިސާ ދައްކަން ޖެހުނަސް ދެއްކޭވަރަށް ފައިސާ ހުރިކަމަށާއި، އެކަމުގެ ކަންބޮޑުވުމެއް ނެތްކަމަށެވެ.
ރާއްޖޭގެ ރަސްމީ ރިޒާވްގައި ހުރި ފައިސާގެ އަދަދާއި، ދަރަނި ދެއްކުމާއި އެހެނިހެން ކަންކަމަށް ރައްކާކުރެވިފައި ހުރި ފައިސާގެ ތަފްސީލްތައް ރައީސް ވަނީ ހިއްސާ ކުރައްވާފައެވެ.
"މިއަދު ސުކޫކަށް ފައިސާ ދައްކަން ޖެހުނަސް ދެއްކޭވަރަށް ފައިސާ އެބަހުރި, މިއަދު މިހާރު ޕޭކުރަން ޖެހުނަސް ޕޭކުރެވޭ ވަރަށް ފައިސާ އެބަހުރި. 500 މިލިއަން ޑޮލަރުގެ ސުކޫކު 8 އޭޕްރީލް 2026 ގައި ސަރުކާރުން ދައްކަން ވާނީ ނިންމާފަ. އެއީ ދައްކަންޖެހޭ ދުވަސް،، އެކަމަށްޓަކާ ރައްކާކުރެވިފައި 650 މިލިއަން ޑޮލަރަށްވުރެ ގިނަ ފައިސާ އެބަހުރި ރޭގެ ނިޔަލަށް . 500 މިލިއަން ޑޮލަރުގެ ސުކޫކު ދައްކާފަ ބާކީ 150 މިލިއަން ޑޮލަރު ހުންނާނެ. މީގެ ތެރެއިން އެސްޑީއެފްގަ 320 މިލިއަނަށް ވުރެ ގިނަ ޑޮލަރަށް ވުރެ ގިނައިން ސޮވެރިން ޑިވެލޮޕްމެންޓް ފަންޑުގައި އެބަހުރި. ޔޫސަބަލް ރިޒާވްގަ 330 މިލިއަން ޑޮލަރަށް ވުރެ ގިނައިން ފައިސާ އެބަހުރި" ރައީސް
އެހެންކަމުން ޖުމްލަ 650 މިލިއަން ޑޮަލަރަށް ވުރެ ގިނަ ފައިސާ މިހާރުވެސް ރައްކާކުރެވިފައި އެބަހުރި ކަމަށާއި މިފައިސާ ދައްކާ ދުވަހަކީ 8 އޭޕްރީލް ކަމުން އެދުވަހަށް ސަރުކާރުން ތައްޔާރު ކަމަށް ރައީސް ވިދާޅުވިއެވެ.
މީގެ އިތުރުން ރައީސް ވަނީ ރާއްޖޭގެ ގްރޮސް ރިޒާވްގައި ހުރި ފައިސާގެ މަޢުލޫމާތުވެސް ހިއްސާ ކުރައްވާފައެވެ.
"އަޅުގަނޑުމެންގެ ގްރޮސް ރިޒާވްގަ މިހާރު ރާއްޖޭގެ ތާރީޚުގައި ދުވަހަކުވެސް ގްރޮސް ރިޒާވް މައްޗަށް ނުދާވަރަށް މިވަނީ ގެންދެވިފަ،.. 1.27 ބިލިއަން ޑޮލަރު އެބަހުރި" ރައީސް
ރިޔާސީ ބަޔާނުގައި ދެންނެވި އަދަދަކީވެސް ރެކޯޑެއް ކަމަށާއި، އަދި މިހާރު އެ ރެކޯޑަށްވުރެ މައްޗަށް ރިޒާވް ގޮސްފައިވާކަމަށް ރައީސް ވިދާޅުވިއެވެ.
މިހުރިހާ ކަމަކީ މިއަދު މެދުއިރުމަތީގެ ހާލަތާއި ގުޅިގެން އަންނަ ކަންކަމުގައިވެސް އަންނާނެ ލުއިތަކެއް ކަމަށް ވިދާޅުވިއެވެ. މީގެ އިތުރުން އެކި ކަންކަމަށް ބޭނުންވާ ފައިސާ ހޯދުމުގެ ކަންކަމާއި މަޝްވަރާތައް ކުރިއަށްދާކަމަށްވެސް ރައީސް ވަނީ ވިދާޅުވެފައެވެ.