ލޯނުތައް ނަގާނީ ކުދި ވިޔަފާރިތަކާއި، މެދުފަންތީގެ ވިޔަފާރިތަކަށް އާރޯކަން އަންނާނެ ގޮތަށް: ރައީސް

މިސަރުކާރުން ލޯނުތައް ނަގާނީކުދި ވިޔަފާރިތަކާއި، މެދުފަންތީގެ ވިޔަފާރިތަކަށް އާރޯކަން އަންނާނެ ގޮތަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މުޢިއްޒު އައްޑޫ ސިޓީއަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން މަރަދޫ އަދި މަރަދޫފޭދޫ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ވިދާޅުވީ، މި ސަރުކާރުން ކުރިއަށްގެންދަން ހުރި މަޝްރޫޢުތައް ކުރިއަށްގެންދާއިރުގައި ލޯނު ނަގާނީ، އެއްކަމަކަށް ރައްޔިތުން މުއްސަނދިވާގޮތަށް ކަމަށެވެ. އެއީ ރައްޔިތުންގެ ޖީބަށް ފައިސާ ލިބޭ ގޮތަށް ކަމަށް ރައީސް ވިދާޅުވިއެވެ.

ކުދި ވިޔަފާރިތަކަށް، މެދުފަންތީގެ ވިޔަފާރިތަކަށް އާރޯކަން އަންނާނެ ގޮތަށް ލޯނުތައް ނަގާނީ، ދެވަނަ ކަމަކަށް އެ ނަގާ ލޯނެއް ވިއްޔާ ދިގު މުއްދަތަކަށް ބަހާލައިގެން ވީހާވެސް ލުއި ގޮތަކަށް އަޅުގަނޑުމެންގެ އިގްތިސޯދަށް ކަތާ މިންވަރަކަށް ނެގޭ ލޯނުތަކެއް ނަގައިގެން އިގްތިސޯދު ކުރިއަރުވާ ތަރައްގީ ގެންނާނީ: ރައީސް މުޢިއްޒު

އެ މަސައްކަތް ކުރުމުގައި ޖެހޭނީ ބަހާލައިގެން އަހަރު ތެރެއަށް މަސައްކަތްތައް ތަރުތީބުކޮށްލަން ކަމަށް ރައީސް ވިދާޅުވިއެވެ.

މި ސަރުކާރުގެ މަސަައްކަތްތައް 17 ނޮވެމްބަރު ގައި ފެށިގެން ދިޔައިރު ޤައުމު އޮތީ ވަަރަށް ބޮޑު އަނދަވަޅެއްގެ ތެރެއަށް ވެއްޓިފައިކަމަށާއި، އެއީ އިޤްތިޞާދީ ބޮޑު އަނދަވަޅެއް ކަމުގައި އެމަނިކުފާނު ދަންނަވާފައިވާނެ ކަމަށާއި، 120 ބިލިއަން ރުފިޔާގެ ބޮޑު އަދަދުގެ ދަރަނި އެބަ އޮތް ކަން ރައީސް ފާހަގަކުރެއްވިއެވެ.

މި ސަރުކާރުގެ މަސަައްކަތްތައް ފެށިގެން ދިޔައިރުގައި 17 ނޮވެމްބަރު، އެ ދުވަހު އަޅުގަނޑު ރައްޔިތުންނާއި މުހާތަބު ކުރައްވާ ދެންނެވިން ގައުމު އޮތީ ވަަރަށް ބޮޑު އަނދަވަޅެއްގެ ތެރެއަށް ވެއްޓިފައޭ، އެއީ އިގްތިސޯދީ ބޮޑު އަނދަވަޅެކޭ. 120 ބިލިއަން ރުފިޔާގެ ބޮޑު އަދަދުގެ ދަރަނި އެބަ އޮތް: ރައީސް މުޢިއްޒު

މިދިޔަ 5 އަހަރު ނިމުނުއިރު 120 ބިލިއަން ރުފިޔާގެ ބޮޑު ދަރަންޏެއް އޮތްއިރު ރާއްޖޭގެ އިޤްތިޞާދީ ޙާލަތު ވަނީ މިއިން ޒަމާނަކު ނުވެއްޓޭހާ ބޮޑު އަނދަވަޅަކަށް ވެއްޓިފައި ކަމަށާއި، މިދިޔަ 5 އަހަރުގެ ތެރޭގައި އެތައް ސަތޭކަ ބިލިއަން ރުފިޔާގެ ލޯނު ކޮންމެ އަހަރަކު ނަގަމުން ގޮސްފައިވާކަން ރައީސް ފާހަގަކުރެއްވިއެވެ.

120 ބިލިއަން ރުފިޔާގެ ބޮޑު ދަރަންޏެއް، މިއި ޒަމާނަކު ރާއްޖޭގެ އިގްތިސޯދީ ހާލަތު ނުވެއްޓޭހާ ބޮޑު އަނދަވަޅަކަށް ވެއްޓިފައި އޮތީ، އެތައް ސަތޭކަ ބިލިއަން ރުފިޔާގެ ލޯނު ކޮންމެ އަހަރަކު ނަގަމުން ދިޔައީ: ރައީސް މުޢިއްޒު

ނިމިދިޔަ 5 އަހަރު އެކި މަޝްރޫޢުތައް ހިންގުމުގެ ނަމުގައި އެހާ ބޮޑެތި އަދަދުތަކުން ލޯނު ނަގާ ޤައުމުގެ އިޤްތިޞާދީ ޙާލަތު އަނދަވަޅަކަށް ވައްޓާލާފައިވާއިރު، ދިވެހި ރައްޔިތުންނަށް މި މަޝްރޫޢުތަކުން ލިބުނު މުއްސަނދި ކަމެއް ނެތް ކަމަށާއި، ރާއްޖޭގެ އިޤްތިޞާދަށް ފައިދާ ނުވިތާގައި ރައްޔިތުން މުއްސަންޖެއްވެސް ނުވި ކަމަށް ރައީސް ވިދާޅުވިއެވެ.