ކުރިން ފްލެޓް ލިބޭނެ ކަމުގެ ލިޔުން ލިބިފައިވާ އެންމެނަށް މި ސަރުކާރުން ހަދާ ފުރަތަމަ ސޯޝަލް ހައުސިން މަޝްރޫޢުގެ ތެރެއިން ފްލެޓް ލިބޭނެ: ރައީސް
ކުރިން ފްލެޓް ލިބޭނެ ކަމުގެ ލިޔުން ލިބިފައިވާ އެންމެނަށް މި ސަރުކާރުން ހަދާ ފުރަތަމަ ސޯޝަލް ހައުސިން މަޝްރޫޢުގެ ތެރެއިން ފްލެޓް ލިބޭނެ ކަމަށް ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހިޔާ ފްލެޓް ލިބޭނެކަމުގެ ލިޔުން މީގެ ކުރީން ލިބިފައިވާ ފަރާތްތަކަށް ފްލެޓް ލިބޭނެތޯ ގދ.ގައްދޫ މާފެހި، މުޙައްމަދު ޝުހައިލް،ދެންނެވި ސުވާލަށް ޖަވާބު ދެއްވަމުންނެވެ.
ރައީސް ޔާމީންގެ ސަރުކާރުގައި ހިޔާ މަޝްރޫޢުގެ ދަށުން ފްލެޓްލިބިފައިވާ ބައެއް ފަރާތްތަކަށް އޭރުގެ ހައުސިންގ މިނިސްޓްރީއިން ލިޔުން ދީފައިވީނަމަވެސް ނިމިދިޔަ ސަރުކާރުން ވަނީ އޭގެތެރެއިން ގިނަބައެއްގެ ފްލެޓް ނުދީ ހިފަހައްޓާފައެވެ.
ރައީސް މުޢިއްޒު ވަނީ އެލިޔުން ލިބިފައިވާ ހުރިހާ ފަރާތްތަކަށް ފްލެޓް ލިބޭނެ ކަމުގެ ޔަޤީންކަން ދެއްވާފައެވެ.
އާދެ އަޅުގަނޑު ވައުދުވި ގޮތައް އެކަން ހަމަ ފުއްދަދޭނަން. މި ސަރުކާރުން ހަދާ ފުރަތަމަ ސޯޝަލް ހައުސިން މަޝްރޫގެ ތެރެއިން ކުރީގަ ފްލެޓް ލިބޭނެ ކަމަށް ގެޒެޓްގަ ނަން ހިމެނިފަ އެހެންނަމަވެސް ފްލެޓް ނުލިބޭނެ ކަމަށް ފަހުނއ ކަނޑައެޅުނު ހުރިހާ އެއްމެންނަށް އިރާދަ ކުރެއްވިއްޔާ ފްލެޓް ހަމަޖައްސަދޭނަން. އެކަމުގަ ހަމަ ޔަޤީންކަން ދެން އިރާދަކުރެއްވިއްޔާ އެކަން އެންމެ އަވަހަށް ފެށޭ ސޯޝަލް ހައުސިން މަޝްރޫޢެއްގެ ތެރެއިން ހަމަ ކުރިއަށް ދާނެ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.