ވާނުވާ ބަންދުގައި ތިބި މީހުންނަށް އިންސާފު ލިބެންޖެހޭ: ރައީސް
ޝަރީޢަތްތައް ލަސްވެ، ވާނުވާ ބަންދުގައި ތިބި މީހުންނަށް އިންސާފު ލިބެންޖެހޭ ކަމަށް ރައީސުލްޖުމުހޫރިއްޔާ ޑރ މުޙައްމަދު މުޢިއްޒު ވިދާޅުވެއްޖެއެވެ.
އައްޑޫސިޓީއަށް ކުރަވަމުންދާ ދަތުރުފުޅުގެ ތެރެއިން ރޭ ފޭދޫގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައި ރައީސް ވިދާޅުވީ ވާނުވާ ބަންދުގައި ތިބި މީހުންނަށް އިންސާފު ލިބެންޖެހޭ ކަމަށާ، އެކަމުގެ މަސައްކަތް ފަށާފައިވާ ކަމަށެވެ.
ރައީސް މުޢިއްޒު ވިދާޅުވީ، މި ސަރުކާރަކީ ޢަދުލުވެރިކަން ގާއިމް ކުރާނެ ސަރުކާރެއް ކަމަށެވެ. އަދި ކުޑަ މީހެއް ނަމަވެސް ބޮޑު މީހެއް ނަމަވެސް، އެއްވެސް މީހަކަށް އަނިޔާވެރި ނުވާނެ ކަމަށެވެ.
ކުޑައެއް ބޮޑެއް ނޯންނާނެ. ވާނުވާ ގައި ތިބޭ މީހުންވެސް. ޝަރީޢަތް ނުނިމި ލަސްވެގެންދާ ދިޔުން. އެތައް ބަޔަކު އެތައް އަހަރެއް ވެއްޖެ. އަޅުގަނޑު ވަޢުދުވިން އެފަރާތްތަކަށް ގާއިމް ކޮށްދޭނެ ކަމަށް. އެއީ އިންސާފު ލިބެންޖެހޭ އެތައް ސަތޭކަ ދިވެހި ރައްޔިތުން. އެމީހުންނަށްވެސް މި ޢަދުލުވެރިކަން ލިބެންޖެހޭ: ރައީސް މުޢިއްޒު
އެހެންކަމުން، ޝަރީޢަތް ނުނިމި ތިބި މީހުން، ނުވަތަ ވާނުވާ ބަންދުގައި ތިބި މީހުންނަށްވެސް އިންސާފު ލިބެންޖެހޭ ކަމަށް އެމަނިކުފާނު ވިދާޅުވި އެވެ.
އެކިއެކި ކުށްތަކުގެ ތަޙްޤީޤުގައި، "ވާނުވާ"ގައި، ބަންދުކޮށްފައި ތިބޭ ތިބުން ނިމުމަކަށް ގެނައުމަކީ، ރިޔާސީ އިންތިޚާބުގައި ރައީސް މުޢިއްޒު ވެވަޑައިގެންނެވި ވަޢުދެކެވެ. އަދި އެ ވަޢުދު ފުއްދުމުގެ މަސައްކަތް މިމަހު ފަށްޓަވާނެ ކަމަށް އެމަނިކުފާނުގެ ރިޔާސީ ބަޔާނުގައި ވަނީ ވިދާޅުވެފަ އެވެ. އަދި ރައްޔިތުންގެ މަޖްލީހުގެ މި ފެށޭ ދައުރުތެރޭގައި ޤާނޫނަށް އިޞްލާޙު ހުށަހަޅުއްވާނެ ކަމަށްވެސް ރައީސް ވިދާޅުވެފައިވެއެވެ.
ރައީސް މުޢިއްޒު ވިދާޅުވީ، އެ ގާނޫނު އެކުލަވައިލެވި ތަސްދީގު ކުރެވުމުން ވާނުވާ ބަންދުގައި ތިބެންޖެހޭ ތިބުމަށް ތާ އަބަދަށް ނިމުމެއް އަންނާނެ ކަމަށެވެ.