ކުޅިވަރު އެސޯސިއޭޝަންތަކާއި އެކަޑަމީތަކަށް އަދި ކޯޗުންނަށް ސަރުކާރުން އެހީދިނުމުގެ މަސައްކަތް ފަށާނަން: ރައީސް
ކުޅިވަރު އެސޯސިއޭޝަންތަކާއި އެކަޑަމީތަކަށް އަދި ކުދިން ތަމްރީންކުރާ ކޯޗުންނަށް ސަރުކާރުން އެހީދިނުމުގެ މަސައްކަތް ވީހާވެސް އަވަހަށް ފައްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ރަށްރަށުގައި ކުޅިވަރުގެ ތަމްރީންދޭ އެކަޑަމީތަކަށް، ކުންފުނިތަކުގެ އިޖްތިމާޢީ ޒިންމާގެ ދަށުން އެހީތެރިކަން ދިނުމާމެދު ލ.ފޮނަދޫ ޝާރާޒް، މުޙައްމަދު އަނަސް،ދެންނެވި ސުވާލަށް ޖަވާބު ދެއްވަމުންނެވެ.
ރައީސް ވިދާޅުވީ އެކަމަށް އެޑްރެސް ކުރައްވާނެ ކަމަށާއި، ކުޅިވަރާއިބެހޭ ވަޒީރު މެދުވެރިކޮށް ކުރިއަށް އޮތްތަނުގައި ސަރުކާރުގެ އެކި ކުންފުނިތަކުގެ ސީއެސްއާރުގެ ދަށުން ކުޅިވަރު އެސޯސިއޭޝަން ތަކާއި، އެކަޑަމީތަކުގެ އިތުރުން ކޯޗުންނަށްވެސް ސަރުކާރުގެ އެހީތެރިކަން ފޯރުކޮށްދެވޭނެ ގޮތަށް ރަނގަޅު ސިޔާސަތެއް ބައްޓަން ކުރައްވާނެ ކަމަށެވެ.
ތިކަމަށް އަޅުގަނޑު އެޑްރެސް ކުރާނަން. ސަރުކާރުގެ އެކިކަހަލަ ކުންފުނިތަކުން އެކިރަށްރަށުގަ މަސައްކަތްކުރަމުންދާއިރުގަ ސީއެސްއާރުގޮތުގަ ކުރިއަށްއޮތްތަނުގަ ތިބޭފުޅުންފަދަ ކޯޗުންނަށް އަދި އެކަޑަމީތަކަށް އެހީތެރިކަން ލިބޭނެފަދަ ގޮތްގޮތް ހޯދައިދިނުމަށް އަޅުގަނޑު ކުޅިވަރާއިބެހޭ ވަޒީރު މެދުވެރިކޮށް އަދި އެސޯސިއޭޝަންސް ތަކަށް ގޮތްގޮތް ހޯދައިދިނުމަށް ކުންފުނިތަކާއި ވާހަކަ ދައްކައިގެން ރަނގަޅު ސިޔާސަތެއް ބައްޓަންކުރުމުގެ މަސައްކަތެއް ފަށާނަން: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.