ގދ. ތިނަދޫ އިންޓަނޭޝަނަލް އެއާޕޯޓު ތަރައްޤީ ކުރާނީ މަދުވެެގެން 50 ހެކްޓަރުގެ ބިން ހިއްކާ ކޯޑް އެފް ރަންވޭއަކާއެކު: ރައީސް

ގދ. ތިނަދޫ އިންޓަނޭޝަނަލް އެއާޕޯޓު ތަރައްޤީ ކުރާއިރު، އެރަށުގައި މަދުވެެގެން 50 ހެކްޓަރުގެ ބިން ހިއްކާ ކޯޑް އެފް ރަންވޭއެއްވެސް ތަރައްޤީ ކުރެވިގެން ދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ތިނަދޫ އެއާޕޯޓު މަޝްރޫޢު ކުރިއަށްގެންދަން ހަވާލު ކޮށްފައި ވަނީ ތައިލެންޑުގެ ޕޭން ޕެސިފިކް ކޮމްޕެނީ ލިމިޓެޑް އާއެވެ.

ކުރިއަށް އޮތް ދުވަސްތަަކުގައި ކައުންސިލާއި، ރައްޔިތުންނާއި އެކީގައި ތަފްސީލުގެ ތެރެއަށް ދާއިރުގައި، އަޅުގަނޑުމެން މި ގަސްދު ކުރަނީ، އިރާދަކުރެއްވިއްޔާ ސަރުކާރުގެ ސިޔާސަތަކީ ތިނަދޫގައި މިހާރު ހިއްކާފައި އޮތް ގުޅިގެން، އަދި މިރަށުގެ ތަރައްޤީއަށްޓަކައި އިތުރު ބިން މަދުވެގެން 50 ހެކްޓަރުގެ ބިން އިތުރު ކުރުމާއި އެކީގައި އެ ބިމާއި ގުޅިގެން އެއްފަސް ވެެގެން ހަތަރު ކިލޯ މީޓަރުގެ ކޯޑްއެފް ރަންވޭއެއް ތަރައްޤީ ކުރުން، އަދި އެ އެއަރޕޯޓް ވެގެން ދާނީ ދުނިޔޭގައި އޭގެ ރީތިކަންވެސް ފާހަގަކުރެވޭ ވަަރަށް ލޭންޑް މާރކް ޑިޒައިނެއް ހިމެނޭ އެއަރޕޯޓަކަށް: ރައީސް މުޢިއްޒު

ރައީސް ވިދާޅުވީ އެ އެއަރޕޯޓްގެ ޓާމިނަލްއަކީ ފެނުގެ މަތީގައި ޤާއިމް ކުރެވޭ އޯވާ ވޯޓާ ޓާމިނަލްއެއް ކަމަށާއި، އެކަން ވެގެންދާނީ ޓޫރިޒަމް ތަރައްޤީ ކުރުމުގައިވެސް ވަރަށް ބޮޑު އެޓްރެކްޝަނަކަށް ކަމަށެވެ.

އަދި މި އެއާޕޯޓް ވެގެން ދާނީ އީކޯ ފްރެންޑްލީ ކޮންސެޕްޓަކަށް ކަަމަށްވެސް ރައީސް ވިދާޅުވިއެވެ. އަދި ސީޕްލޭން ޓާމިނަލް އާއި ފްލައިންގ ސާވިސް އާއި ޑީކޮމްޕްރެޝަން ޗެމްބާ އާއި 12 ރިސޯޓް ތަރައްގީ ކުރުން މި މަޝްރޫޢުގެ ތެރޭގައި ހިމެނޭ ކަމަށްވެސް ރައީސް ވިދާޅުވިއެވެ.

ރައީސް މުއިއްޒު ވިދާޅުވީ، ރައްޔިތުން ކުރެއްވި އިތުބާރު އެމަނިކުފާނު ދަމަހައްޓަވާނެ ކަމަށާއި، އަދި ތިނަދޫ ސިޓީ ޙަޤީޤީ ފުރިހަމަ ސިޓީއަކަށް ހައްދަވާ ދެއްވާނެ ކަަމަށެވެ.

މީގެއިތުރުން ރައީސް ވިދާޅުވީ، ދެކުނު ޒޯންގައި ތިނަދޫ ސިޓީއަކީ ސަރަޙައްދީގެ ތަރައްޤީގެ ނާރެހެއް ކަމަށެވެ. އަދި ތިނަދޫ ސިޓީ ތަރައްޤީ ކުރުމުގައި ދޭން ޖެހޭ އިސްކަން ދެއްވާނެ ކަަމުގެ ޔަޤިންވެސް ރައީސް ދެއްވިއެވެ. އޭގެ ސަބަބުން ތަރައްޤީ އަތޮޅާއި، މި ސަރަޙައްދަށްވެސް ލިބިގެން ދާނެ ކަމަށް ރައީސް ވިދާޅުވިއެވެ.