ސާރފް ބޯޑު ގެނައުމަށް ނަގާ ޗާޖު ވީހާވެސް ބޮޑަކަށް ކުޑަ ކޮށްދޭނަން: ރައީސް
ރާޅާއެޅުން ނުވަތަ ސާރފިންގގައި އުޅޭ ފަރާތްތަކަށް ދިމާވެފައިވާ އެންމެ ބޮޑު އެއް މައްސަލަ ކަމަށްވާ ސާރފް ބޯޑު ގެނައުމަށް ނަގާ ޗާޖު ވީހާވެސް ބޮޑަކަށް ކުޑަކޮށް ދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ރާޅާއެޅުމަށް ފަތުރުވެރީން ބޭނުންކުރާ ކަނދު، މޯލްޑިވިއަންގެ މަތިންދާބޯޓުތަކުން އުފުލުމަށް ނަގާ ފީ ބޮޑުކަން ފާހަގަކޮށް ގދ. ގައްދޫ، ފެހިވިނަ، އަޙްމަދު ރަޝީދު، ދެންނެވި ސުވާލަށް ރައީސުލްޖުމްހޫރިއްޔާ ދެއްވި ޖަވާބުގައި ވިދާޅުވީ ތި އެކަންތަކަކީ ސާފިންގަ އުޅޭ ބޭފުޅުންނަށް ވަރަށް ބޮޑުވެފައި އޮތް ކަމެއް ކަމަށް ޤަބޫލުފުޅުކުރައްވާ ކަމަށާއި، އެކަމަށް ރަނގަޅު ހައްލެއް ގެނެސް ދެއްވާނެ ކަމަށެވެ.
ތި ވިދާޅުވި ކަންތަކަކީ ތިބޭފުޅުންނަށް ސާރފިންގަ އުޅޭ ބޭފުޅުންނަށް ވަރަށް ބޮޑުވެފަ އޮތް ކަމެއް ކަމަށް އަޅުގަނޑު ހަމަ ގަބޫލުކުރަން. މި ސަރަހައްދަކީ، ގައްދޫއަކީ ސާރފިންގަ ހަމަ ވަރަށް ކުރީގަ އުޅޭ ސަރަހައްދަކަށް ވެފަ މިޔޮތީ އެހެންވީމަ އެ ގޮތުންނާވެސް އެކީގަ އިރާދަ ކުރެއްވިއްޔާ ތި ވިދާޅުވި ކަންތަކުގަ އަޅުގަނޑު މަސައްކަތް ކޮށްދޭނަން އިނގޭތޯ: ރައީސް މުޢިއްޒު
މޯލްޑިވިއަނުން ސާރފް ބޯޑު ގެނައުމަށް ނަގާ ޗާޖު ވަރަށް ބޮޑުކަން ފާހަގަކުރައްވާ ރައީސް ދެއްވި ޔަޤީން ކަމަކީ ސާރފް ބޯޑު ގެނައުމަށް ނަގާ ޗާޖު ވީހާވެސް ބޮޑަކަށް ކުޑަކޮށް ދެއްވާނެކަމުގެ ޔަޤީންކަމެވެ.
މޯލްޑިވިއަނުން ސާރފް ބޯޑު ގެނައުމަށް ނަގާ ޗާޖު ވަރަށް ބޮޑު އެހެންނޫންތޯ. އެހެންވީމަ އަޅުގަނޑު އެކަމާ ވާހަކަ ދައްކައިގެން އަޅުގަނޑު އިރާދަކުރެއްވިއްޔާ މިއަށް ރަނގަޅު ހައްލެއް ގެނެސްދޭނަން އިނގޭތޯ. އަގު ކުޑަ ކޮށްދޭނަން އިރާދަ ކުރެއްވިއްޔާ ވީހާވެސް ބޮޑަކަށްއިނގޭތޯ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.