ގެމަނަފުށީ ސްކޫލްގެ މަލްޓިޕާޕަސް ހޯލް އާއިއެކު މަގު ހެދުމުގެ މަޝްރޫޢު ކުރިއަށް ގެންދާނީ ރައްޔިތުން ބޭނުންވާގޮތަށް: ރައީސް
ގެމަނަފުށީ ސްކޫލްގެ މަލްޓިޕާޕަސް ހޯލް އާއިއެކު މަގު ހެދުމުގެ މަޝްރޫޢު ކުރިއަށް ގެންދާނީ ރައްޔިތުން ބޭނުންވާގޮތަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ގެމަނަފުށީ ސްކޫލް މަލްޓި ޕާޕަސް ހޯލް އާއި އެރަށު މަގު ހެދުމުގެ މަޝްރޫޢާމެދު ގއ.ގެމަނަފުށީ، ހުސްނޫގޭ، ސަމީރު އަޙްމަދު، ދެންނެވި ސުވާލަށް ދެއްވި ޖަވާބުގައެވެ. ރައީސް ވިދާޅުވީ އެ މަސައްކަތް މި އަހަރުގެ ތެރޭގައި ފައްޓަވާނެ ކަމަށެވެ. އަދި މަގު ހެދުމުގެ މަސައްކަތްވެސް ރައްޔިތުން އެދޭ ގޮތަށް ގެންދަވާނެ ކަމުގެ ޔަޤީންކަން ރައީސް ދެއްވިއެވެ.
ދެން މި އަހަރުތެރޭގަ އިރާދަކުރެއްވިއްޔާ އަޅުގަނޑުމެން އެ މަސައްކަތް ފަށާނަން. އެހެންވީމަ އެކަމަށް އިރާދަކުރެއްވިއްޔާ ރަނގަޅު ހައްލެއް އަންނާނެ. ދެވަނަ ކަމަކަށް މަގުހެދުން، ގެމަނަފުށި މީ މަސްވެރިކަމުގެ ވަރަށް މުހިއްމު ރަށެއް. ވަރަށް ވަރުގަދަ ރަށެއް. އެހެންވީމަ އިޤްތިޞާދީ ގޮތުން ބަލާއިރުގަވެސް އަދި އާބާދީގެ ގޮތުން ބަލާއިރުވެސް މަގުހެދުމަކީ ރަށަށްލިބޭނެ ވަރަށް ބޮޑު ކުރިއެރުމެއް. ދެން އެހެންވީމަ މިރަށުގަ ހަދަންޖެހޭ މަގުތައް އަޅުގަނޑުމެން ހަދާނީ ދެންމެ ތިވިދާޅުވީ އެއްނު ފަސް މަގެއް، އެ އިތުރުކުރެވިގެން އިރާދަކުރެއްވީތީ ރަށަށް ފުރިހަމަ ފައިދާ އޭގެން މި ދެންނެވި ގޮތަށް މަސްވެރިކަމަށް އަދި ޖުމްލަކޮށް އާއްމު ދިރިއުޅުމަށްވެސް ފައިދާ ވާގޮތައް ރަނގަޅު ފެންވަރުގަ ރަނގަޅު މަޝްރޫއެއް ކުރިއަށް ގެންދާނެ އިރާދަކުރެއްވިއްޔާ އިނގޭތޯ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.