މާލެސިޓީގައި އެންމެ ފެންވަރު ރަނގަޅު ހޮސްޕިޓަލެއް ޤާއިމުކުރުމުގެ މަސައްކަތް ބާރު ސްޕީޑުގައި ކުރިއަށް އެބަދޭ: ރައީސް
މާލެސިޓީގައި އެންމެ ފެންވަރު ރަނގަޅު ހޮސްޕިޓަލެއް ޤާއިމުކުރުމުގެ މަސައްކަތް ބާރު ސްޕީޑުގައި ކުރިއަށްދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހުޅުމާލޭގައި ޞިއްޙީ ޚިދުމަތް ލިބިގަތުމުގައި ދަތިތަކެއް ހުރިކަން ފާހަގަކޮށް ހުޅުމާލެ، ފްލެޓް ނަންބަރު 51503، މުޙައްމަދު ރިޔާޒް، ދެންނެވި ސުވާލަށް ދެއްވި ޖަވާބުގައެވެ.
މާލެސިޓީ ސަރަޙައްދުގެ ޞިއްޙީ ނިޒާމް ވަރުގަދަކުރުމަކީ ސަރުކާރުން ވަރަށް އިސްކަމެއްދެއްވާ ކަމެއްކަން ފާހަގަކުރައްވާ ރައީސް ވިދާޅުވީ ދަރުމަވަންތަ ހޮސްޕިޓަލް އަދި ދަރުމަވަންތަ ގްރޫޕް އޮފް ހޮސްޕިޓަލްސް، އައިޖީއެމްއެޗް އަދި ހުޅުމާލެ، އާއި ވިލިމާލެ ހޮސްޕިޓަލް ހިމެނޭ ގޮތަށް ދަރުމަވަންތަ ހޮސްޕިޓަލްގެ މަސައްކަތްތަކެއް މިހާރު ވަރަށް ބާރު ސްޕީޑުގަ ފެށިފައިވާ ކަމަށެވެ. އަދި އެއާއިއެކު ހުޅުމާލެ ހޮސްޕިޓަލަށް ދިމާވެފައިވާ މައްސަލަ ހައްލުވެގެންދާނެ ކަމަށް ރައީސް ވިދާޅުވިއެވެ.
މާލެސިޓީ ސަރަޙައްދުގެ ޞިއްޙީ ނިޒާމް ވަރުގަދަކުރުމަކީ ސަރުކާރުން ވަރަށް އިސްކަމެއްދޭ ކަމެއް.ދަރުމަވަންތަ ހޮސްޕިޓަލްގެ މަސައްކަތް އެވަނީ މިހާރު ވަރަށް ބާރު ސްޕީޑުގަ ފެށިފަ. ދަރުމަވަންތަ ހޮސްޕިޓަލް އަދި ދަރުމަވަންތަ ގްރޫޕް އޮފް ހޮސްޕިޓަލްސް، އައިޖީއެމްއެޗް އޭގައި ހިމެނޭގޮތަށް ހުޅުމާލެ، އަދި ވިލިމާލެ ހޮސްޕިޓަލް ހިމެނޭ ގޮތަށް އެކުއެކީގަ މަސައްކަތްތަކެއް ވަނީ ފެށިފަ. އިރާދަކުރެއްވިއްޔާ ހުޅުމާލެ ހޮސްޕިޓަލްގަ ތި ފާހަގަކުރެއްވި ކަންކަން ހައްލުވެގެންދާނެ: ރައީސް މުޢިއްޒު
ހުޅުމާލެ ފޭ ސް 1 އަދި ފޭސް 2 އެއްކޮށްމިހާރު ލައްކައެއްހާ މީހުން ދިރިއުޅެމުންދާކަމަށް ޤަބޫލުކުރައްވާ ކަމަށާއި، އެހާ ގިނަ މީހުންނަށް ޚިދުމަތްދޭއިރު، ހުޅުމާލެ ހޮސްޕިޓަލްގެ ފެންވަރު ވަރަށް ބޮޑުތަނުން މަތިކުރަންޖެހޭ ކަމުގައި ރައީސް ވިދާޅުވިއެވެ. އަދި އިތުރު ހޮސްޕިޓަލެއްވެސް އަޅަންޖެހޭނެ ކަމަށާއި، އެހެންކަމުން މި މަސައްކަތްތައް ކުރިއަށް ގެންދަވާ ކަން ރައީސް ފާހަގަކުރެއްވިއެވެ.
ރައީސް ވިދާޅުވީ ހުޅުމާލޭގައި ދިރިއުޅޭ ރައްޔިތުންނާއި ޖުމްލަކޮށް މާލޭ ސިޓީގައި ދިރިއުޅޭ ހުރިހާ ރައްޔިތުންނަށް އެންމެ ރަނގަޅު ފެންވަރުގަ ޞިއްޙީ ޚިދުމަތް ރަނގަޅުކުރުމުގެ މަސައްކަތްތައް ހަމަ ވަރަށް ބާރު ސްޕީޑުގައި ކުރިއަށްދާކަމަށާއި، އެކަމުގެ ނަތީޖާ ފެންނަމުންދާނެ ކަމަށެވެ.
ހުޅުމާލޭގަ މިހާރު ލައްކައެއްހާ މީހުން ފޭސް 1 އަދި ފޭސް 2 އެއްކޮށް ދިރިއުޅެމުންދާކަމަށް އަޅުގަނޑުމެންނަށް ޤަބޫލުކުރެވޭ. އެހެންވީމަ އެހާ ގިނަ މީހުންނަށް ޚިދުމަތްދޭއިރު، ހުޅުމާލެ ހޮސްޕިޓަލްގެ ފެންވަރު ވަރަށް ބޮޑުތަނުން މަތިކުރަންޖެހޭ. އަދި އިތުރު ހޮސްޕިޓަލެއްވެސް އަޅަންޖެހޭނެ. އެހެންވީމަ މި މަސައްކަތްތައް އަޅުގަނޑުމެން ކުރިއަށް ގެންދާނީ. އިރާދަކުރެއްވިއްޔާ ހުޅުމާލޭގައި ދިރިއުޅޭ ރައްޔިތުންނަށް އަދި ޖުމްލަކޮށް މާލޭ ސިޓީގައި ދިރިއުޅޭ ހުރިހާ ރައްޔިތުންނަށް އެންމެ ރަނގަޅު ފެންވަރުގަ ޞިއްޙީ ޚިދުމަތް ރަނގަޅުކުރުމުގެ މަސައްކަތްތައް ހަމަ ވަރަށް ބާރު ސްޕީޑުގައި ކުރިއަށްދާކަން ދަންނަވާލަން. އަިރާދަކުރެއްވިއްޔާ ހަމަ އެކަމުގެ ނަތީޖާ ފެންނަމުންދާނެ.: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.