ވަޢުދާއި އެއްގޮތަށް މާދަމާ ޚިދުމަތް ފަށާ، އެއާ އެމްބިއުލާންސްގެ ފޮޓޯ ރައީސް ޑރ. މުޢިއްޒު އާންމުކުރައްވައިފި
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް މާދަމާ ފަށާ އެއާ އެމްބިއުލާންސްގެ ޚިދުމަތަށް ބޭނުންކުރާ މަތިންދާބޯޓުގެ ފޮޓޯ ރައީސް އެކްސްގައި ކުރެއްވި ޕޯސްޓެއްގައި އާންމުކުރައްވައިފިއެވެ.
އެއާ އެމްބިއުލާންސްގެ ގޮތުގައި ބޭނުންކުރަން ނިންމާފައިވާ މޯލްޑިވިއަންގެ މަތިންދާބޯޓުގެ ފޮޓޯ ރައީސް ޑރ.މުޙައްމަދު މުޢިއްޒު އާންމު ކުރެއްވީ މިރޭގެ ވަގުތެއްގައެވެ.
އެއާ އެމްބިއުލާންސް ޚިދުމަތް ފެށުމަށް ވާންޖެހޭ ތައްޔާރީތައްވެ އެ ޚިދުމަތް ވެރިކަމުގެ ފުރަތަމަ 14 ހަފުތާ ތެރޭގައި ފެށުމަކީ ރައީސްގެ ވަޢުދުފުޅެކެވެ. އެގޮތުން ރާއްޖޭގެ ރަށްތަކުން އެކި ތަންތަނަަށް ބަލިމީހުން އުފުލުމަށް އެއާ އެމްބިއުލާންސް ބޭނުންކުރުމުގެ އިތުރަށް ރާއްޖެއިން ބޭރަށްވެސް ބަލިމީހުން އުފުލުމަށް އެއާ އެމްބިއުލާންސް ބޭނުންކުރެވޭނެކަމަށް ރައީސްވަނީ ވިދާޅުވެފައެވެ.
މާދަމާ އެއާ އެމްބިއުލާންސްގެ ޚިދުމަތް ފެށިގެންދާއިރު އެންމެ ފުރަތަމަ އެއާ އެމްބިއުލާންސްގައި ރާއްޖެއިން ބޭރަށް ބަލިމީހުން އުފުލާނީ އަވައްޓެރި އިންޑިއާއާއި ސްރީލަންކާއަށެވެ. އެއަށްފަހު އެއާ އެމްބިއުލާންސްގެ ޚިދުމަތް މިހާރަށްވުރެ ފުޅާކޮށް ތައިލެންޑާ ހަމައަށް ބަލިމީހުން އުފުލޭނެ އިންތިޒާމު ހަމަޖައްސަވަން ރައީސްވަނީ ވަޢުދުވެވަޑައިގެންފައެވެ.