ކައުންސިލްތަކުގެ ސިވިލް މުވައްޒަފުންނަށް ކިޔެވުމާއި ވަޒީފާގެ ކުރިއެރުން ފަސޭހައިން ލިބޭނެގޮތް ހެދުމުގެ މަސައްކަތް ކުރާނަން: ރައީސް
ކައުންސިލްތަކުގެ ސިވިލް މުވައްޒަފުންނަށް ކިޔެވުމާއި ވަޒީފާގެ ކުރިއެރުން ފަސޭހައިން ލިބޭނެގޮތް ހެދުމުގެ މަސައްކަތްތައް ޤާނޫނަށް ގެންނަން ޖެހޭ އިސްލާހުތައް ގެނެސްގެން ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ލޯކަލް ކައުންސިލްތަކުގެ އިދާރީ މުވައްޒަފުންގެ މުސާރައާ ޢިނާޔަތްތަކާމެދު ނ.މަނަދޫ ކައުންސިލް އިދާރާގެ މުވައްޒަފެއްކަމަށްވާ، އެ ރަށު، ހޭޅި، ޢައްޒާ ޢަބްދުލްޣަފޫރު، ދެންނެވި ސުވާލަށް ދެއްވި ޖަވާބު ގައެވެ.
ރައީސް ވިދާޅުވީ އެކަމުގައި މައިގަނޑު މައްސަލައަކީ ރައްޔިތުންގެ މަޖްލީހުން ކެޓަގަރައިޒް ކޮށްފައި އޮންނަގޮތުން ކަމަށާއި މަޖްލީހުން ކައުންސިލްތައް ކެޓަގަރައިޒް ކޮށްފައި އޮންނަނީ އެންމެ ދަށް ފަންތީގެ ތެރޭގައި ކަމަށެވެ. އެހެންނަމަވެސް މި ސަރުކާރުގް ސްޓަކްޗަރ ތައްޔާރު ކުރާއިރު ކުރިއަށް އޮތްތަނުގައި އެކަމަށް ހައްލެއް ގެންނަން ބޭނުންވާ ކަމަށް ރައީސް ވިދާޅުވިއެވެ.
މައިގަނޑު މައްސަލައަކީ ތިކަމުގަ ރައްޔިތުންގެ މަޖްލީހުން ކެޓަގަރައިޒް ކޮށްފައި އޮންނަގޮތުން ކައުންސިލްތައް މި އޮންނަނީ އެންމެ ދަށް ފަންތީގެ ކެޓަގަރައިޒް ކޮށްފަ. އެހެންނަމަވެސް އަޅުގަނޑުމެންގެ ބޭސް ސްޓްރަކްޗަރ ހެދުމުގެ ކަންތަކުގެ ތެރޭގައި ކުރިއަށް އޮތްތަނުގައި ތިކަމަށް ހައްލެއް ގެންނަން އަޅުގަނޑުބޭނުން: ރައީސް މުޢިއްޒު
ރައީސް މުޢިއްޒު އަކީ ވަރަށް ގާތުން ކައުންސިލް މުވައްޒަފުން ދެކެފައި ހުރި ބޭފުޅެއްކަން ފާހަގަކުރައްވާ އެމަނިކުފާނު ވިދާޅުވީ ރެޔާއި ދުވާލު ކައުންސިލްތަކުގެ މުވައްޒަފުންކުރާ ބުރަ މަސައްކަތް އެނގި ވަޑައިގަންނަވާ ކަމަށެވެ. އަދި އެކަމުގައި ދިމާވަނީ ޤާނޫނީ މައްސަލަތަކެއް ކަމަށާއި، އެއީ ސިވިލް ސާރވިސް އާއި އެލްޖީއޭ އާއި ދޭތެރޭގައިވެސް ޚިޔާލު އެއްގޮތް ނުކުރެވިފައި ހުރި ކަމެއް ކަން ރައީސް ފާހަގަކުރެއްވިއެވެ.
އަޅުގަނޑު ހަމަ ވަރަށް ގާތުން ކައުންސިލް މުވައްޒަފުން ދެކެފައި ހުރި މީހެއްމިއީ. އެހެންވީމަ އަޅުގަނޑަށް އިނގޭ ކައުންސިލްތަކުގެ މުވައްޒަފުންކުރާ ބުރަ މަސައްކަތް ރެޔާއި ދުވާލު. އެހެން އޮފީސް ތަކާއި ޚިލާފަށް ބަންދުވެސް ކުރެވޭތަނެއް ނޫން ޙަޤީޤަތުގަ ރެޔާ ދުވާލު ޚިދުމަތްދޭން ޖެހޭ ބައެއް ކައުންސިލްގެ ސިވިލް މުވައްޒަފުންނަކީ. މިކަމުގައި ޤާނޫނީ އިޝޫސްތަކެއް މި އަންނަނީ. ސިވިލް ސާރވިސް އާއި އެލްޖީއޭ އާއި ދޭތެރޭގައިވެސް ޚިޔާލު އެއްގޮތް ނުކުރެވިފައި ހުރި ކަމެއް މިއީ. ޤާނޫނީ އިޝޫސް ތަކެއް ހުރީމަ. އެހެންވީމަ މަޖްލިސް ތެރެއިން ހައްލު ކުރަންޖެހޭ ބައެއް ޤާނޫނީ މާއްދާތަކަށް ގެންނަންޖެހޭ ބައެއް އިސްލާހުތަކެއްވެސް ހުރިކަމެއް މިއީ. މާލޭގެ މޭޔަރަކަށް ހުރިއިރުވެސް އެ މައްސަލަ ހައްލުކުރަން އުޅުނީމަ އަޅުގަނޑަށް އެކްސްޕީރިއަންސް ކުރެވިފަހުރި ކަމެއް ތިއީ: ރައީސް މުޢިއްޒު
މިއާއިއެކު ރައީސް ދެއްވި ޔަޤީން ކަމަކީ ރައްޔިތުންގެ މަޖްލީހުގެ ތެރެއިން މަސައްކަތް ކުރައްވައިގެން ކައުންސިލްތަކުގެ ސިވިލްސާރވިސް މުވައްޒަފުންނަށް ވަޒީފާގައި އުޅޭއިރު ކިޔެވުމަށާއި، އަދި ދެން ބަލަންޖެހޭ މިންގަނޑުތަކުގެ ތެރެއިން ކުރިއެރުންތައް ފަސޭހައިން ލިބޭނެ މަގުފަހިކޮށްދެއްވާނެ ކަމަށެވެ.
އެހެންވީމަ ރައްޔިތުންގެ މަޖްލީހުގެ ތެރެއިން އަޅުގަނޑު އިރާދަކުރެއްވިއްޔާ މަސައްކަތް ކުރާނީ ކައުންސިލްގެ ސިވިލްސާރވިސް ސްޓާފުންނަށް ވަޒީފާގައި އުޅޭއިރު ކިޔެވުމަށް ބޭސްޑްކޮށް އަދި ދެން ބަލަންޖެހޭ މިންގަނޑުތަކުގެ ތެރެއިންވެސް ކުރިއެރުންތައް ފަސޭހައިން ލިބޭނެ މަގުފަހިކޮށްދޭން އިރާދަކުރެއްވިއްޔާ. އެހެންވީމަ އެކަމުގަ އަޅުގަނޑުމެން މަސައްކަތްކުރާނަން. މިދެންނެވިހެން ގެންނަންޖެހޭ އިސްލާހުތައް ޤާނޫނުތަކާއި، ޤަވާއިދުތައް ގެނައުމާ އެކީގަ: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.