އެއާ އެމްބިއުލާންސްގެ ފުރަތަމަ ދަތުރާއިއެކު ރައީސް މުޢިއްޒު ތާރީޚުގެ ތެރެއަށް!

ރައީސް ޑރ. މުޢިއްޒުގެ ވަޢުދުފުޅާއި އެއްގޮތަށް މާރޗް 1 ވަނަ ދުވަހު ފެށިގެން ދިޔަ އެއާ އެމްބިއުލާންސްގެ ޚިދުމަތާއިއެކު ފުރަތަމަ ދަތުރު ކުޅުދުއްފުށި ސިޓީއަށް ކޮށް، ރާއްޖޭގެ ތާރީޚުން ޖާގަ ހޯދައިފިއެވެ.

ކުޅުދުއްފުށިސިޓީ ރީޖަނަލް ހޮސްޕިޓަލުގައި އޮތް ބަލި މީހަކު ބަލައި އެއާ އެމްބިއުލާންސް ކުޅުދުއްފުއްޓަށް ދިޔައީ ރޭ ދަންވަރުގެ ވަގުތެއްގައެވެ.

ރޭ ދަންވަރު ކުޅުދުއްފުށިން ބަލި މީހަކު ގެނައުމަށް އައި ރިކުއެސްޓާއިއެކު، ރޭ ދަންވަރު 1:00 ގައި މާލެއިން ކުޅުދުއްފުއްޓަށް އެއާ އެމްބިއުލާންސް ފުރައިގެން 1:50 އަށް ވަނީ ލޭންޑް ކޮށްފައެވެ. އަދި ދަންވަރު 2:20 ގައި ބަލި މީހާ ގޮވައިގެން މާލެއަށް ފުރި އެވެ.

ރައީސް އޮފީހުގެ އަންޑަ ސެކްރެޓަރީ މުހައްމަދު ފިރުޒުލް އަބްދުﷲ ޚަލީލް ވިދާޅުވީ އެއަރ އެމްބިއުލާންސް ބަލި މީހާ ބަލައި ދާނީވެސް އެކަމަށް ޓްރެއިން ކޮށްފައި ތިބި ޑޮކްޓަރުންނާއި ނަރުހުންގެ ޓިމަކާއެކު ކަމަށެވެ. އަދި މާލެ އާދެވެންދެންވެސް ބަލި މީހާއަށް ފަރުވާ ދެވެނެ ކަމަށް ވިދާޅުވިއެވެ.

މާޗް މަހު އެއާ އެމްބިއުލާންސްގެ ޚިދުމަތް ފަށަން ވަޒީރުންގެ މަޖިލީހުން ފާސްކުރީ މިދިޔަ ޑިސެމްބަރު މަހުގެ 25 ވަނަ ދުވަހު އެވެ. މި ޚިދުމަތަށް މޯލްޑިވިއަން ޑޭޝް8ގެ އިތުރުން، އެއާ އެމްބިއުލާންސްގެ ގޮތުގައި ސީޕްލޭނެއް ވެސް ބޭނުން ކުރާނެެވެ.

މިއީ ރައީސް ޑރ. މުޢިއްޒުގެ ރިޔާސީ ވަޢުދުގެ ތެރެއިން އެ މަނިކުފާނުގެ އެންމެ އިސް އެއް ވަޢުދުކަން ފާހަގަކޮށްލެވެއެވެ.އެއާ އެމްބިއުލާންސްގެ ގޮތުގައި ގޮތުގައި ބޭނުންކުރަނީ އައިލެންޑް އޭވިއޭޝަނުގެ މަތިންދާ ބޯޓަކާއި ސީޕްލޭނެކެވެ. އެ ދެ ބޯޓު އެކީ ބަދަލުކޮށްލާފައި ވަނީ އިމަޖެންސީ ޙާލަތުގައި ބަލި މީހާއަށް ބޭނުންވާ ހުރިހާ ސާމާނެއް ވެސް އޭގެ ތެރެއިން ލިބޭ ގޮތަށެވެ.

ރާއްޖޭގެ އެކި ކަންކޮޅުތަކުން ފަރުވާ ލިބެން ހުރި އެންމެ ކައިރީ ޓާޝަރީ ހޮސްޕިޓަލުތަކަށް ބަލި މީހުން އުފުލުމަށް ހަމަޖެހިފައިވާއިރު،އެ ބޯޓުގައި އަވަސް ޞިއްޙީ ފަރުވާ ދެވޭގޮތަށް ވަސީލަތްތަކާއެކު ތަމްރީން ކޮށްފައިވާ 15 ޞިއްޙީ ޚިދުމަތްތެރިން ތިބޭނެއެވެ.އެއީ ފަސް ޑޮކްޓަރަކާއި ފަސް ނަރުހުންގެ އިތުރުން އެމެޖެންސީ މެޑިކަލް ޓެކްނީޝަނުންނެވެ.