ރައީސް އިލްތިމާސް ކުރެއްވީ ދޮގުވާހަކަތަކުން މުޖުތަމަޢު ކިލަނބު ނުކުރަން!
ދޮގުވާހަކަތަކުން މުޖުތަމައު ކިލަނބު ނުކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިލްތިމާސް ކުރައްވައިފިއެވެ.
ރައީސް މިފަދައިން އިލްތިމާސް ކުރެއްވީ ރަމަޟާން މަހާއި ގުޅިގެން މިއަދު ފޮނުއްވެވި ޚިޠާބުގައެވެ.
ރައީސް ވިދާޅުވީ ދިވެހީންގެ ތާރީޚަށް ބަލާލިކަމުގައި ވީނަމަވެސް، ބަރަކާތްތެރި ރަމަޟާން މަހަކީ ދިވެހިން އެކަކު އަނެކަކަށް އެހީވުމުގެ ލާމަސީލު ނަމޫނާ ދައްކައިދީފައިވާ މައްސަރެއްކަމަށެވެ. އަދި ރޯދަމަހަށް ތައްޔާރުވުމުގައި ގޭގެ ފަންގިލައި މާރާމާތުކޮށް، ރަށުތެރެ ސާފުކުރުމާއި، މައިޒާންތައް ހެދުންފަދަ މަސައްކައްތައް ކުރަނީ އެންމެން ގުޅިގެންކަމަށް ރައީސް ވިދާޅުވިއެވެ. އަދި މި މަސައްކަތް ކުރެވިގެން ދަނީ އެންމެންގެ ފަސޭހަޔައްކަމަށް ވެސް ރައީސް ވިދާޅުވިއެވެ.
ރޯދަ ވީއްލަން މިސްކިތްތަކަށް ތަކެތި ތައްޔާރުކޮށްގެން ގެންދިޔުމާއި ރޯދަވީއްލާ ގަޑިއަށާއި ހާރުދަމަށް ތައްޔާރުކުރެވޭ ކާ ތަކެތި އެއްގެއިން އަނެއްގެޔަށް ގެންގޮސް ދިނުމާއި މި ފަދަ ރީތި އިޖުތިމާޢީ ސިފަތައް އާންމުކޮށް ދިވެހީންގެ މާޒީން ފެންނަކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ އިސްލާމީ އުންމަތަކީ އެއް ހަށިގަނޑެއް ފަދަ ބަދަހި އުންމަތެއްކަމަށެވެ. އަދި މި ބަރަކާތްތެރި މައްސަރުގައި މި މުޅި އުންމަތަށް ހެޔޮދުޢާ ކުރަން ރައީސްގެ ހިތޯބުގައި ވަނީ އިލތިމާސްކުރައްވާފައިއެވެ.