އަމިއްލަ ފަރުދުންނަށް ހެލްތު އިންޝުއަރެންސްގެ ޚިދުމަތް ހޯދުމުގައި ލުއިގޮތެއް ހޯދަން މަޝްވަރާކުރާނަން: ރައީސް
އަމިއްލަ ފަރުދުންނަށް ހެލްތު އިންޝުއަރެންސްގެ ޚިދުމަތް ހޯދުމުގައި ލުއިގޮތެއް ހޯދަން މަޝްވަރާކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ އަމިއްލަ ފަރުދުންނަށް ހެލްތު އިންޝުއަރެންސްގެ ޚިދުމަތް ހޯދުމުގައި އިތުރު ލުއިފަސޭހަ ލިބޭނެ ގޮތަކާމެދު ދ.ގައްދޫ، ގުލްޒާރުވާދީ، ޙުސައިން ތައުފީޤް، ދެންނެވި ސުވާލަށް ދެއްވި ޖަވާބުގައެވެ.
އިންޝުއަރެންސްގެ ނިޒާމަކީ ވަކި ގޮތަކަށް ވަކި އުސޫލުތަކެއް ކަނޑައެޅިފައޮންނަ ކަމެއްކަން ފާހަގަ ކުރައްވާ ރައީސް ވިދާޅުވީ ޚާއްސަކޮށް ޢާންމު ފަރުދުން އިންޝުއަރެންސްގެ ނިޒާމްގެތެރޭގައި ބައިވެރިވެގެން ކުރިޔަށް ދާއިރުގަ މިހާރަށްވުރެ ރަނގަޅުގޮތަކަށް އެކަން ހަމަޖެއްސޭތޯ ކަމާބެހޭ އިދާރާތަކުގަ ދަންނަވާނެ ކަމަށެވެ.
އިންޝުއަރެންސްގެ ނިޒާމަކީ ވަކި ގޮތަކަށް ވަކި އުސޫލުތަކެއް ކަނޑައެޅިފައޮންނަ ކަމެއްވީމަ ތިވިދާޅުވި ކަންތަކުގަ އަޅުގަނޑު މަޝްވަރާކުރާނަން އިނގޭތޯ ކަމާބެހޭ އިދާރާތަކުގަ ދަންނަވާލާނަން މިހާރަށްވުރެ ރަނގަޅުގޮތަކަށް ޚާއްސަކޮށް ޢާންމު ފަރުދުން އިންޝުއަރެންސްގެ ނިޒާމްގެތެރޭގައި ބައިވެރިވެގެން ކުރިޔަށް ދާއިރުގަ ތިވިދާޅުވިގޮތަށް އޮތުމަށްވުރެ ރަނގަޅުގޮތަކަށް އެކަން ހަމަޖެއްސޭތޯ ކަމާބެހޭ އިދާރާތަކުގަ ދަންނަވާނަން އެކަން ބަލައިދީ ރަނގަޅުގޮތެއް ހަދައިދިނުމަށް: ރައީސް މުޢިއްޒު
ރައީސުލްޖުމްހޫރިއްޔާއަށް ރައްޔިތުންގެ ފަރާތުން ހުށަހަޅުއްވާ ސުވާލުތަކަށް ކޮންމެ ދުވަހަކުވެސް ވަގުތު ލިބިވަޑައިގަތް ވަރަކުން އެމަނިކުފާނު ޖަވާބުދެއްވަމުން ގެންދަވާނެއެވެ. ވީޑިއޯ މެދުވެރިކޮށް ރައްޔިތުން ކުރާ ސުވާލަށް ދެއްވާ ޖަވާބު، ރައީސުލްޖުމްހޫރިއްޔާގެ އޮފީހުގެ ރަސްމީ މީސްމީޑިއާ މަންސަތަކުން ކޮންމެ ދުވަހަކުވެސް ޢާންމުކޮށް ހިއްސާކުރަމުން ގެންދާނެއެވެ.