އެއާ އެމްބިއުލާންސް ޚިދުމަތަށް ބޭނުންކުރާ ސީ ޕްލޭންގެ ފޮޓޯ ރައީސް އާންމުކުރައްވައިފި
އެއާޕޯޓާ ދުރުގައި ހުންނަ ރަށްރަށުން ނުވަތަ އެއާޕޯޓު ނެތް ރަށްރަށުން ބަލިމީހުން އުފުލުމަށް ޚާއްޞަކޮށް ތައްޔާރުކޮށް، އެއާ އެމްބިއުލާންސްގެ ގޮތުގައި ބޭނުންކުރާ ސީ ޕްލޭނުގެ ފޮޓޯއެއް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އާންމުކުރައްވައިފިއެވެ.
މިސަރުކާރުން ޞިއްޙީ ނިޒާމް އިތުރަށް ހަރުދަނާ ކުރުމަށްޓަކާ އެއާ އެމްބިއުލާންސްގެ ޚިދުމަތް ފަށާފައިވަނީ މިމަހުގެ 1 ވަނަ ދުވަހުއެވެ. އެ ޚިދުމަތް ފެށުމަށް ފުރަތަމަ ބޭނުންކުރަން ފެށީ މޯލްޑިވިއަންގެ ޑޭޝް-8 މަރުކާގެ މަތިންދާބޯޓެކެވެ.
އެއާ އެމްބިއުލާންސްގެ ގޮތުގައި އެއްގަމަށް ޖައްސާ މަތިންދާބޯޓެއްގެ އިތުރަށް ސީ-ޕްލޭނެއް ބޭނުންކުރަން ނިންމާފައިވާކަން އެއާ އެމްބިއުލާންސްގެ ޚިދުމަތް ފެށުމުގެ ކުރިންވެސް ސަރުކާރުންވަނީ އިއުލާނުކޮށްފައެވެ. ސީ-ޕްލޭނުގެ ބޭނުމަކީ އެއާޕޯޓެއް ނެތް ރަށްރަށާއި އެއާޕޯޓުތަކާ ދުރު ރަށްތަކުން ބަލިމީހުން އުފުލުންކަމަށްވެސް ސަރުކާރުން ބުނެފައިވެއެވެ.
އެއާ އެމްބިއުލާންސްގެ ޚިދުމަތް ދިނުމުގައި ބޭނުންކުރާ ސީ-ޕްލޭނާއި ޑޭޝް މަތިންދާބޯޓުގައިވެސް ބަލިމީހުންނަށް ކުއްލި ފަރުވާ ދިނުމަށް ބޭނުންވާ ހުރިހާ އާލާތްތަކެއް ހަރުކޮށްފައި ހުންނާނެއެވެ. އެ އުޅަނދުތައް ބޭނުންކުރަން ފެށުމުން ބަލިމީހުން އުފުލުމުގައި މިހާރު ކުރިމަތިވާ ދަތިތައް ހައްލުކުރެވޭނެކަމަށް ސަރުކާރުން ބުނެއެވެ.
އަލަށް ފެށޭ އެއާ އެމްބިއުލާންސްގެ ޚިދުމަތް ދިނުމަށް ޓްރެއިންކުރެވިފައިވާ ޞިއްޙީ ޚިދުމަތްތެރިންގެ ޓީމެއް ހަރަކާތްތެރިވާނެއެވެ. އެޓީމުގައި ޑޮކްޓަރުންނާއި ނަރުހުންނާއި ޓެކްނީޝަނުން ހަރަކާތްތެރިވާނެއެވެ.
އެއާ އެމްބިއުލާންސް ތައާރަފުކޮށް ސިއްހީ ކުއްލި ހާލަތްތަކުގައި ބަލިމީހުން އުފުލުމުގެ ޚިދުމަތް ފަށައިގަތުމަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅެކެވެ