ޚާއްޞައެހީއަށް ބޭނުންވާ ކުދިންނަށް ކިޔަވައިދޭ ޓީޗަރުން ތަމްރީންކުރުމުގެ ޕްރޮގްރާމް މިއަހަރު ފެށޭނެ: ރައީސް
ޚާއްޞައެހީއަށް ބޭނުންވާ ކުދިން ނުވަތަ ނުކުޅެދުންތެރިކަން ހުންނަ ކުދިންނަށް ކިޔަވައިދޭ ޓީޗަރުން ތަމްރީންކުރުމުގެ ޕްރޮގްރާމް މިއަހަރުގެ މެދު ތެރޭގައި ފެށުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ނުކުޅެދުންތެރިކަން ހުންނަ ކުދީންނަށް ކިޔަވައިދޭ ޓީޗަރުން މަދުކަމާ، ލިބެމުން އައި ޚާއްޞަ އެލަވަންސާއިމެދު އެ ދާއިރާގެ ޚާއްޞަ ޓީޗަރެއްކަމުގައިވާ، މ.މުލަކު، ސޯސަންވިލާ، ޢާއިޝަތު ޝައުފާ، ދެންނެވި ސުވާލަށް ދެއްވި ޖަވާބުގައެވެ.
ނުކުޅެދުންތެރިކަން ހުންނަ ކުދީންނަށް ކިޔަވައިދޭ ޓީޗަރުން ތަމްރީންކުރުމަކީ އަޅުގަނޑުމެންގެ ވަރަށް މުހިންމު ސިޔާސަތެއް. މިއަހަރުގެ މެދު ތެރޭގައި ފަށަން މިހާރު ރާވާފައި އޮތީ ޚާއްޞައެހީގެ ދާއިރާ، އަދި ޓީޗަރުން މަދުކޮށް ތިބި އެހެން ދާއިރާތަކުގައިވެސް ޓީޗަރުން ހޯދުމުގެ މަސައްކަތާއި ތަމްރީނު ކުރުމުގެ މަސައްކަތް: ރައީސް މުޢިއްޒު
ރައީސް ވިދާޅުވީ އެ ޕްރޮގްރާމްގެ ތެރެއިން ސެން ޓީޗަރުންނަށް ޚާއްޞަ އިސްކަމެއްދީގެން އެ ދާއިރާއިން ޓީޗަރުން ތަމްރީނުކުރުމުގެ މަސައްކަތް މިއަހަރުގެ ތެރޭގައި ކުރިއަށް ގެންދެވޭނެ ކަމަށެވެ. އަދި އޭގެ ކުރިންވެސް މިހާރުން މިހާރަށްވެސް އެދާއިރާގައި ޓީޗަރުން ލިބެންހުރިވަރެއްބަލާ ޓީޗަރުން އިތުރުކުރުމުގެ މަސައްކަތް ސަރުކާރުން ކުރިއަށް ގެންދަވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.