ޚާއްޞައެހީއަށް ބޭނުންވާ ކުދިން ނުވަތަ ނުކުޅެދުންތެރިކަން ހުންނަ ކުދިންނަށް ކިޔަވައިދޭ ޓީޗަރުން (ސެން ޓީޗަރުން) ނަށް ރިސްކް އެލެވަންސްއެއް ނުވަތަ ޚާއްޞަ އިތުރު ފައިސާގެ އިނާޔަތެއް ސަރުކާރުން ހަމަޖައްސައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިފަދައިން ވިދާޅުވީ ނުކުޅެދުންތެރިކަން ހުންނަ ކުދީންނަށް ކިޔަވައިދޭ ޓީޗަރުން މަދުކަމާ، ލިބެމުން އައި ޚާއްޞަ އެލަވަންސާއިމެދު އެ ދާއިރާގެ ޚާއްޞަ ޓީޗަރެއްކަމުގައިވާ، މ.މުލަކު، ސޯސަންވިލާ، ޢާއިޝަތު ޝައުފާ، ދެންނެވި ސުވާލަށް ދެއްވި ޖަވާބުގައެވެ.

ރައީސް ވިދާޅުވީ އެލަވަންސް ދިނުމުގެ ކަންކަމަށް ބަދަލު އައިސްފައިވަނީ މިދިޔަ ސަރުކާރުން ފެށިގެން މިހާރު ޢަމަލުކުރަމުންދާ ޕޭ ފްރޭމް ވޯކްގެ ސަބަބުން ކަމަށެވެ. އެހެން ނަމަވެސް ސެން ޓީޗަރުންނަށް ރިސްކް އެލެވަންސްއެއް ނޫނީ ޚާއްޞަ އިތުރު ފައިސާގެ އިނާޔަތެއް ސަރުކާރުން ހަމަ ޖައްސައިދެއްވާނެ ކަމަށް ރައީސް ވިދާޅުވިއެވެ.

މިދިޔަ ސަރުކާރުން ފެށިގެން މިހާރު ޢަމަލުކުރަމުންދާ ޕޭ ފްރޭމް ވޯކްގެ ސަބަބުން ބަދަލެއް އައިއްސައޮތީ. އެހެން ނަމަވެސް ސެން ޓީޗަރުންނަށް ރިސްކް އެލެވަންސްއެއް ނޫނީ ޚާއްޞަ އިތުރު ފައިސާގެ އިނާޔަތެއް އިރާދަކުރެއްވިއްޔާ ސަރުކާރުން ހަމަ ޖައްސައިދޭނަން: ރައީސް މުޢިއްޒު

މީގެ އިތުރުން ރައީސް ވިދާޅުވީ ނުކުޅެދުންތެރިކަން ހުންނަ ކުދިންނަށް ކިޔަވައިދޭ ޓީޗަރުން ތަމްރީންކުރުމަކީ ސަރުކާރުގެ ވަރަށް މުހިންމު ސިޔާސަތެއް ކަމަށާއި، ޚާއްޞައެހީއަށް ބޭނުންވާ ކުދިންނަށް ކިޔަވައިދޭ ޓީޗަރުން ހޯދުމުގެ މަސައްކަތާއި ތަމްރީނު ކުރުމުގެ މަސައްކަތް މިއަހަރުގެ މެދު ތެރޭގައި ފަށަން މިހާރު ރާވާފައިވާ ކަމަށެވެ.

ރައީސް ވިދާޅުވީ އެ ޕްރޮގްރާމްގެ ތެރެއިން ސެން ޓީޗަރުންނަށް ޚާއްޞަ އިސްކަމެއްދީގެން އެ ދާއިރާއިން ޓީޗަރުން ތަމްރީނުކުރުމުގެ މަސައްކަތް މިއަހަރުގެ ތެރޭގައި ކުރިއަށް ގެންދެވޭނެ ކަމަށެވެ. އަދި އޭގެ ކުރިންވެސް މިހާރުން މިހާރަށްވެސް އެދާއިރާގައި ޓީޗަރުން ލިބެންހުރިވަރެއްބަލާ ޓީޗަރުން އިތުރުކުރުމުގެ މަސައްކަތް ސަރުކާރުން ކުރިއަށް ގެންދަވާނެ ކަމުގެ ޔަޤީންކަން ރައީސް ވަނީ ދެއްވާފައެވެ.