ރައީސް މުޢިއްޒު މިއަދު މަޖްލިސް ކެމްޕެއިން ފައްޓަވަނީ، ފުރަތަމަ ހެންވޭރު ހުޅަނގަށް!
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރިއަށްއޮތް ރައްޔިތުންގެ މަޖްލިސް ކެމްޕޭން ފެއްޓެވުމުގެ ގޮތުން މިއަދު މާލެސިޓީގައި ޙަރަކާތެއް ބޭއްވުމަށް ނިންމަވައިފިއެވެ.
އެގޮތުން ރައީސްގެ ކެމްޕޭން ޙަރަކާތް ފެއްޓެވުމުގެ ގޮތުން މިއަދު ވަޑައިގަތުމަށް ހަމަޖެހިފައިވަނީ ހެންވޭރު ހުޅަނގު ދާއިރާއަށެވެ. މި ޙަރަކާތުގެ ތެރެއިން ހެންވޭރު ހުޅަނގުގެ ބައެއް ގެތަކަށް ރައީސް ވަޑައިގަންނަވާނެއެވެ.
ރައީސްގެ އަރިހުގައި ހެންވޭރު ހުޅަނގު ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް އަލީ އިބްރާހިމް (ކައްޕި) ބައިވެރިވެ ވަޑައިގަންނަވާނެއެވެ.
މާލެސިޓީގެ ދޮރުންދޮރަށް ހިންގެވުން މިއަދު މެންދުރު ފަހު ހެންވޭރު ހުޅަނގު ދާއިރާއިން ފެށުމަށް ހަމަޖެހިފައިވަނީ 1:45 ގައި ސޯސަންމަގާއި ބޮޑު ރަސްގެފާނު ހިނގުން ގުޅޭ ކަންމަތިން ކަމަށް ޕީއެންސީއިން މަޢުލޫމާތު ދީފައިވެއެވެ.
ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފެއްޓެވުމަށް ނިންމަވާފައިވާއިރު، ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑާއިގެން ރައްޔިތުންގެ ހާލުއަހުވާލު ބައްލަވާފައެވެ.
