ހިޔާ ފްލެޓްތަކުގައި ލިފްޓް ހަރުކުރުމުގެ މަސައްކަތް ވީހާވެސް އަވަހަށް ނިންމަން ބާރުއަޅާނަން: ރައީސް
ހިޔާ ފްލެޓްތަކުގައި ލިފްޓް ހަރުކުރުމުގެ މަސައްކަތް ވީހާވެސް އަވަހަށް ނިންމަން ބާރުއަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ހުޅުމާލެ ދެވަނަ ފިޔަވަހީގެ ހިޔާ ޓަވަރުތަކުގައި އިތުރު ލިފްޓް ހަރުކޮށް ނިމޭނެ ތާރީޚަކާމެދު ގދ. ފަރެސްމާތޮޑާ، ގަސްކޯނި، ޙަލީމާ ޝާހިޔާ، ދެންނެވި ސުވާލަށް ދެއްވި ޖަވާބުގައެވެ.
ރައީސް ވިދާޅުވީ ހިޔާ ފްލެޓްގައި ލިފްޓް ހަރުކުރުމަކީ އެމަނިކުފާނުގެ ވަޢުދުފުޅެއް ކަމަށާއި، މިހާރު އެ މަސައްކަތްތައް ބަޔަކާއި ހަވާލުކޮށް އެގްރީމެންޓްވެސް ހެދިފައިވާ ކަމަށެވެ. ރައީސް ވިދާޅުވީ މަސައްކަތް ނިމޭއިރު، ކޮންމެ އިމާރާތެއްގައި 2 ލިފްޓް ހަރުކުރެވޭނެ ކަމަށާއި، އެ ލިފްޓް ތަކަކީ ސްޓްރެޗާރ އެރުވޭ ބޮޑެތި ލިފްޓްތައް ކަމަށެވެ.
ލިފްޓްތަކުގެ ޑިޒައިނިންގ މަސައްކަތްތައް ކުރިއަށްދާކަން ފާހަގަކުރައްވާ ރައީސް ވިދާޅުވީ އޭޕްރީލް މަހުގެ ތެރޭގައި ޢަމަލީ މަސައްކަތް ފެށޭވަރު ވާނެ ކަމަށެވެ.
ހިޔާ ފްލެޓްގައި ލިފްޓް ހަރުކުރުމަކީ އަޅުގަނޑު ވީ ވަޢުދެއް. މިހާރު ވަނީ އެކަމާ ބަޔަކާ އެގްރީމެންޓްވެސް ހެދިފަ. ކޮންމެ އިމާރާތެއްގައި 2 ލިފްޓް ހަރުކުރެވޭނެ. އެ ލިފްޓް ތަކަކީ ސްޓްރެޗާރ އެރުވޭ ބޮޑެތި ލިފްޓްތައް. ޑިޒައިނިންގ މަސައްކަތްތައް އެބަ ކުރިއަށް ގެންދޭ. އޭޕްރީލް މަހުގެ ތެރޭގައި އިރާދަކުރެއްވިއްޔާ އެފަރާތުން ޢަމަލީ މަސައްކަތަށް ހިޔާ ފްލެޓް ސަރަޙައްދަށް މޮބިލައިޒް ކުރާނެ ކަމަށް އަޅުގަނޑަށް މަޢުލޫމާތު ލިބެނީ. ލިފްޓްތަކުގެ މަސައްކަތް ވީހާވެސް އަވަހަށް ނިންމަން ސަރުކާރުން ވަރަށް ބޮޑަށް ބާރު އަޅާނަން: ރައީސް މުޢިއްޒު
ހުޅުމާލެ ދެވަނަ ފިޔަވަހީގެ ހިޔާ ފްލެޓްތަކުގައި މިހާރު ހަރުކުރަމުންދާ އާ ލިފްޓުތައް ހަދަމުންދަނީ ބަލިމީހުން ބާލަން ފަސޭހަވާނެހެން ސްޓްރެޗާރ އެރުވޭނެ ގޮތަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެވެސް ވަނީ ވިދާޅުވެފައެވެ.