ޕީޕީއެމް/ޕީއެންސީގެ މަޖްލިސް ކެމްޕޭން ޙަރަކާތް ރައީސް ފައްޓަވަފައިފި
ޕީޕީއެމް/ޕީއެންސީން ކުރިއަށް އޮތް ރައްޔިތުންގެ މަޖްލީސް އިންތިޚާބުގެ ކެމްޕޭން ޙަރަކާތްތައް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވަފައިފިއެވެ.
ކުރިއަށްއޮތް ރައްޔިތުންގެ މަޖްލިސް ކެމްޕޭން ފެއްޓެވުމުގެ ގޮތުން ފުރަތަމަ ޙަރަކާތް މިއަދު މާލެސިޓީގައި ވަނީ ކުރިއަށް ގެންގޮސްފައެވެ. ރައީސްގެ އަރިހުގައި ހެންވޭރު ހުޅަނގު ދާއިރާއިން މަޖްލިސް އިންތިޚާބުގައި ވާދަކުރައްވާ ސަރުކާރުގެ ކެންޑިޑޭޓް އަލީ އިބްރާހިމް (ކައްޕި) ބައިވެރިވެ ވަޑައިގެންނެވިއެވެ.
ކެމްޕޭން ޙަރަކާތް ފެއްޓެވުމުގެ ގޮތުން ރައީސް ޑރ. މުޢިއްޒު މިއަދު ވަޑައިގަތީ ހެންވޭރު ހުޅަނގު ދާއިރާއަށެވެ. މި ޙަރަކާތުގެ ތެރެއިން ހެންވޭރު ހުޅަނގުގެ ބައެއް ގެތަކަށް ރައީސް ވަޑައިގެންނެވިއެވެ. އަދި އެ ދާއިރާއަށް ސަރުކާރުގެ ފަރާތުން ވާދަކުރައްވާ ކެންޑިޑޭޓް ޢަލީ އިބްރާހިމް (ކައްޕި) ގެ ކެމްޕޭނު ޖަގަހައަށް ރައީސް ޒިޔާރަތް ކުރެއްވިއެވެ.
މާލެސިޓީގެ ދޮރުންދޮރަށް ހިންގެވުން ފެށުނީ މިއަދު މެންދުރު ފަހު 1:45 ގައި ސޯސަންމަގާއި ބޮޑު ރަސްގެފާނު ހިނގުން ގުޅޭ ކަންމަތިންނެވެ. މިއަދުގެ ޙަރަކާތުގައި ސަރުކާރުގެ ބައެއް ވަޒީރުންނާއި، ކުންފުނިތަކުގެ ވެރިންގެ އިތުރުން، ސްޓޭޓް މިނިސްޓަރުން އަދި ނައިބު ވަޒީރުން މި ޙަރަކާތުގައި ބައިވެރިވެ ވަޑައިގެންނެވިއެވެ.
ރައީސް ޑރ. މުޢިއްޒު މަޖްލިސް ކެމްޕެއިން ރަސްމީކޮށް މާލެ ސަރަޙައްދުގައި ފެއްޓެވުމަށް ނިންމަވާފައިވާއިރު، ދާދި ފަހުން ރައީސް ވަނީ، ރައީސުލްޖުމްހޫރިއްޔާގެ ހައިސިއްޔަތުން ރާއްޖޭގެ ބައެއް ރަށްރަށަށް ވަޑާއިގެން ރައްޔިތުންގެ ހާލުއަހުވާލު ބައްލަވާފައެވެ.